قول-اياعىن قيمىلداتا المايتىنى, اياق-قولى شىنتاق پەن تىزەدەن تومەن قاراي دامىماي قالعانى ومىرگە كەلە سالىسىمەن بەلگىلى بولعان. اتا-اناسى: «ورتالىقتا جۇرسە قاتارعا قوسىلىپ كەتە مە؟» دەگەن ۇمىتپەن گازني پروۆينتسياسىنان كابۋلگە قونىس اۋدارادى.
«كابۋلدەگى مەديتسينا تاعدىرعا مويىنسۇنۋدان باسقا امالىڭ جوق» دەگەننەن ءارى اسا المادى. ال مەن مويىنسۇنعىم كەلمەدى. 5 جاسىمنان باستاپ قارىنداشتى تىسىممەن تىستەپ, ەرنىممەن باسقارىپ اياق-قولىم جەتە الماعان اينالامداعى كورىنىستەردى قاعاز بەتىنە ءتۇسىرە باستادىم. العاشقى كەزدە ءتىس پەن ەرنىم ەركىمە باعىنبادى. كەيىن ءبارى قالىپقا تۇسكەنى, مەنىڭ ەركىمە باعىنعانى سونشالىقتى, قۇداي اۋىز, ەرىن, ءتىس كوز الدىمداعى جارىق الەمدى قاعاز بەتىندە زەردەلەۋ ءۇشىن جاراتقانداي بولىپ كورىنەدى», – دەيدى روبابا بىزبەن ءاڭگىمەسىندە.
روبابا قىلقالامنىڭ قۇدىرەتى ونى شاراسىزدىق پەن ۇمىتسىزدىكتىڭ شىرماۋىنان الىپ شىققانىن, ومىرىنە جارىق ءساۋلە سىيلاعانىن ايتادى.
«قازىر مەن ءومىرىمدى سۋرەتشىلىككە دەيىن جانە سۋرەتشىلىكتەن كەيىن دەپ ەكىگە بولەمىن. قىلقالام قۇدىرەتى ارقىلى دەنەم كوتەرىلە المايتىن بيىككە كوتەرىلدىم. ءوزىمنىڭ قول-اياعىن قيمىلداتا المايتىن شاراسىز ەكەنىمدى ۇمىتتىم», – دەيدى روبابا.
روبابا كابۋلدە وتىرىپ, باتىس الەمىنىڭ تەرەزەسىن اشۋعا ىقپال ەتىپتى. «اقش-تىڭ, جاپونيا جانە گەرمانيانىڭ جۋرناليستەرى كەلىپ جاعدايىممەن, شىعارماشىلىعىممەن تانىستى, مەن تۋرالى دۇنيەلەردى باسىلىمدارىندا جاريالادى. مەنى قازىر ازيا ەمەس, ەۋروپا, باتىس ەلدەرى كوبىرەك بىلەدى. قازىر سول ەلدەردە دوستارىم كوپ. سول دوستارىمنىڭ قارجىلاي, اقپاراتتىق قولداۋىمەن «روبابا» مادەني-ەستەتيكالىق ورتالىق اشتىم. اۋعانستاننىڭ الەمدىك وركەنيەتكە دەگەن ينتەگراتسياسىنا مەن باسقاراتىن ورتالىق ىقپال ەتە السا, ەڭبەگىمنىڭ جانعانى. ال ازيادان, ورتالىق ازيادان, ءتىپتى مۇسىلمان مەملەكەتتەرىنەن ءسىز ءبىرىنشى بولىپ بايلانىسقا شىعىپ تۇرسىز», – دەيدى روبابا.
روبابانىڭ پورترەتتىك ستيلدەگى اۆتورلىق شىعارمالارىنىڭ اراسىنان قازاقستاننىڭ تۇڭعىش پرەزيدەنتى نۇرسۇلتان نازارباەۆتىڭ سۋرەتى ءبىردەن كوزگە ءتۇستى. «قازاقستاننىڭ تۇڭعىش پرەزيدەنتىنىڭ سۋرەتىن ءۇش اي بۇرىن اياقتادىم. التى اي بويى سالدىم. قالامدى تىسپەن تىستەپ, ەرىنمەن باسقارىپ ەركىڭە باعىندىرۋ وڭاي ەمەس. مەن كارتينانى بىتىرگەن كۇنى پرەزيدەنتتەرىڭىز وتستاۆكاعا كەتتى. «قازاقستان پرەزيدەنتىنىڭ سۋرەتىن سالۋعا نە سەبەپ بولدى؟» دەگەن سۇراعىڭىزعا جاۋاپ بەرۋ ماعان قيىن. شىندىقتى ايتسام – ماقتاۋ بولىپ كورىنەدى. اۋمالى-توكپەلى زاماندا قازاقستاندى قاقتىعىسقا جول بەرمەگەن, شەكاراسى شەگەندەلگەن مەملەكەت رەتىندە ساقتاپ قالعان پرەزيدەنتتەرىڭىز قانداي قۇرمەتكە بولسا دا لايىقتى», – دەيدى روبابا اڭگىمە اراسىندا.
روبابا ءسوز اراسىندا قازاقستاندى تۇسىندە كورەتىنىن ايتتى. سەبەبى اينالاسىندا ءوزى قۇرالپىلاس جولداستارىنىڭ اراسىندا قازاقستاندا وقىپ جاتقاندار كوپ ەكەن. ءبىزدىڭ ەل جايلى تۇسىنىگى سولاردىڭ اڭگىمەسىمەن قالىپتاسىپتى.
ۇزاق جىلدارعا سوزىلعان قاقتىعىستار, قايىرشىلىق مۇگەدەك اۋعانداردىڭ ءوز ماقساتتارىنا جەتۋىنە جول بەرمەيدى. «الەمدى اياق-قولمەن ەمەس, سالقىن جۇرەك, ميمەن باسقارادى. سول سياقتى جۇرەگىڭ ءسۇزگىدەن وتكىزگەن قۇندىلىقتاردى قاعاز بەتىندە تۇسىرۋگە اياق-قولدىڭ بولماۋى كەدەرگى ەمەس ەكەن», – دەيدى روبابا.
روبابانىڭ ءۇش ءسىڭلىسى بار. ءوزىنەن 3 جاس كىشى ءسىڭلىسى شاكيلا موحاممادي اپاسىنا سۋرەتتى ەرنىمەن باسقارىپ, ءتىسىمەن سالۋعا قۇدايدىڭ ءوزى ءمۇمكىندىك بەرگەنىن, دارىنى تابيعاتتان دارىعانىن ايتتى. «ءبىز ونىڭ تالانتىنا كۇماندانعان ەمەسپىز. ول مۇمكىن ەمەستەردىڭ ءبارىن ءساتتى ورىنداپ شىعادى. روبابانىڭ اۋعانستانعا قاتىستى سالعان كارتينالارىنىڭ بارىندە مۇڭ بار. باسقاشا سالۋعا جۇرەگى رۇحسات بەرمەيدى. ءجۇرەكتى الداۋ مۇمكىن ەمەس قوي», – دەيدى ول بىزبەن اڭگىمەسىندە.
روبابا ءسىڭلىسىنىڭ ايتقانىنا كەلىسكەندەي ءۇنسىز قالدى. «مەنىڭ اۋعانستانىما قاتىستى تاقىرىبىم وزگەرەدى. ءالى ءبىزدىڭ اۋىلدا دا توي بولادى. مەن الداعى ۋاقىتتا قاقتىعىستار مەن سوعىستاردان قالجىراعان اۋعانستاندى ەمەس, شايقالعان تۇنىعى باستاپقى قالپىنا كەلگەن, بىرلىگى مەن بەرەكەسى جاراسقان اۋعانستان تۋرالى سۋرەتتەرىمدى كورەتىن بولاسىزدار. قازىر-اق سالعىم كەلەدى. بىراق وعان جاعداي مۇمكىندىك بەرمەيدى عوي. اتىس پەن جارىلىستاردان ادام ەمەس, قالام دا سەلك ەتەدى ەكەن. سەلك ەتكەن قالام تەك مۇڭدى عانا كورەدى», – دەپ ءسوزىن تۇيىندەدى روبابا.
ءبىز دە ونىمەن قالام دا, جۇرەك تە سەلك ەتپەيتىن جاقسى كۇندەردە كەزدەسەيىك دەپ تىلەدىك.
الماتى
