ۋنيۆەرسيتەت جەتەكشىلەرى ساپالى بىلىمگە قول جەتكىزۋدىڭ باستى جولى پروفوريەنتاتسيالىق جۇمىستاردى, ياعني تالاپكەرلەرگە الدىن-الا باعىت-باعدار بەرۋ ءۇشىن جۇيەلى جولعا قويۋ دەپ سانايدى. بۇل ءىس جالاڭ جارنامانىڭ جەتەگىندە كەتپەۋگە ءتيىس. سوندىقتان مەكتەپ تۇلەكتەرىنە عانا ەمەس, سونىمەن بىرگە 8-ءشى جانە 9-شى سىنىپ وقۋشىلارىنا دا قاجەتتى باعىت-باعدار بەرۋ كوزدەلگەن. مۇنداعى باستى تەمىر قازىق ماماندىق تاڭدايتىن ءجاسوسپىرىم مەن اتا-انانىڭ جانە ءپان مۇعالىمدەرى مەن سىنىپ جەتەكشىلەرىنىڭ ءوزارا بايلانىستارىنا نەگىزدەلگەن. ەڭ قورقىنىشتى دا قاۋىپتى ءجايت قابىلداۋ كوميسسياسىنا قۇجات تاپسىراتىن كەزگە دەيىن جاس جەتكىنشەكتىڭ بولاشاقتا الاتىن ماماندىعىن بەلگىلەي الماۋى. بۇعان سەلسوق, ەنجار قاراۋعا مۇلدەم بولمايدى. ولار ماماندىق تاڭداۋدا قاتەلەسپەۋى كەرەك دەپ تۇجىرىمدايدى پەداگوگ-ماماندار. مىنە, وسىنداي كەشەندى كوزقاراس ورنىقتىرا بىلگەن وڭىرلىك جوو-نىڭ بۇگىنگى جەتىستىكتەرى جەتەرلىك. ارينە ونىڭ تاعى ءبىر باستى سىرى قوس ديپلوم مەن ارالاس جانە دۋالدىق ءبىلىم بەرۋ باعدارلامالارىنىڭ ىسكە اسا باستاۋىندا. مۇنىڭ ءوزى تۇلەكتەردىڭ ەڭبەك نارىعىندا قاجەتتى سۇرانىستارعا يە بولۋىنا ىقپال ەتۋدە.
بيىل وقۋ جىلىندا ۋنيۆەرسيتەت بازاسىندا اشىلعان جوعارى كوللەدج دە تۇلەكتەردىڭ جۇمىسقا ورنالاسۋ دەڭگەيىن كوتەرۋگە قىزمەت جاساي باستادى دەسەك قاتەلەسە قويماسپىز. بيىل مۇنداعى ستۋدەنتتەردىڭ سانى قازاقستاندىق قوعامعا قاجەتتى ماماندىقتاردى اشۋ ەسەبىنەن كوبەيەدى دەپ كۇتىلۋدە.
ق.جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتى ۇجىمىنىڭ باستى قاعيداتى جوعارىدا ايتىلعانداي سان مەن ساپانىڭ بىرلىگىن ساقتاۋعا نەگىزدەلگەن. ەگەر «اتامەكەن» ۇلتتىق پالاتاسى جۇرگىزەتىن جوو-لاردىڭ رەيتينگتىك باعالاۋى نەگىزىندە سوڭعى ورىنداردان كورىنگەن ماماندىقتار باسەكەگە قابىلەتسىز دەپ تابىلسا, بۇدان كەلەر پايدا شامالى. ەندەشە مۇنىڭ جابىلعان ءجون.
بۇل باعىتتا ۋنيۆەرسيتەت باسشىلارىنىڭ ۇستانىمى بىرەۋ عانا. بۇل –ساپا جانە ساپالىق كورسەتكىشتەر. ياعني, ماماندار مەن ستۋدەنتتەر سانىنىڭ ءوسۋى ساپاعا كولەڭكەسىن تۇسىرمەۋگە ءتيىس. وسى ارادا ايتا كەتەرلىك تاعى ءبىر ماسەلە الداعى وقۋ جىلىندا وڭىرلىك ۋنيۆەرسيتەتتە ءبىلىم الۋشىلار سانى باكالاۆريات پەن ماگيسترانتتاردى جانە دوكتورانتتاردى قوسا ەسەپتەگەندە 16 مىڭنان اسادى دەپ بەلگىلەنگەن. ياعني مۇنداي بيىك بەلەس ساننىڭ كوبەيۋى ساپانى ەكىنشى كەزەككە سىرماۋى كەرەك. كەرىسىنشە سان وسكەن جاعدايدىڭ وزىندە ساپا ءوز ۇستەمدىگى مەن مەرەيىن ساقتاپ قالۋى قاجەت. ياعني ساننىڭ كوبەيۋىنە بايلانىستى ساپاعا دا ۇلكەن كوڭىل بولىنبەك. ۇلگەرىمى تومەن, تاربيەسى تولىسپاعان كەز-كەلگەن جاس وقۋدان شىعارىلادى. سولاي بولىپ تا ءجۇر. ۋنيۆەرسيتەت رەكتورى ب.ا.ەردەمبەكوۆ گازەت تىلشىسىنە وسىلاي دەپ مالىمدەدى.
بيىلعى جىل اتالعان جوعارى وقۋ ورنىندا ساپا جىلى دەپ جاريالانعان. وسى ارقىلى ءبىلىم بەرۋ قىزمەتىنىڭ ساپالىق دەڭگەيىن كوتەرۋگە باسا كوڭىل بولىنگەن. ساپا جىلى دەپ ارناۋلى اتاۋ بەرۋىڭىزدىڭ ءوزى ۋاقىت تالابىنان تۋىندادى. ساپاسىز ءبىلىم –ساپاسىز كادردى تۋعىزادى. ونىڭ كىمگە قاجەتى بار؟ ءوز ماماندىعىن دۇرىس تاڭداي الماعان تۇلەك ء–السىز ستۋدەنت. بىلىكسىز مامان دا وسىنداي ءالسىز ستۋدەنتتەردەن شىعادى دەيدى باۋىرجان امانكەلدى ۇلى. يا, مۇنداي مامانداردىڭ جۇمىسقا تۇرا المايتىنى دا بەسەنەدەن بەلگىلى. قىزمەتكە قابىلدانا قالعان كۇننەن وزىندە جۇمىس بەرۋشىنىڭ تالابىنان شىعا المايتىنى تاعى دا ايان.
بۇل كريتەري ياعني جوو تۇلەكتەرىنىڭ جۇمىسقا تۇرۋى جونىندەگى ماسەلە, بۇعان قاتىستى جۇمىس بەرۋشىنىڭ ۇسىنىس-تىلەكتەرى بۇگىندە كەز-كەلگەن جوو-نىڭ رەيتينگىن ايقىندايتىن باستى پارامەترلەردىڭ ءبىرى. ونىڭ باستى ايقىنداۋشىلارى –ساپالى پروفەسسور-وقىتۋشىلار قۇرامى مەن زەيىندى ستۋدەنتتەر بولماق. وسى ورايدا جۇبانوۆ ۋنيۆەرسيتەتىندە پروفەسسور-وقىتۋشىلار قۇرامىنىڭ قىزمەتىن باعالاۋدىڭ رەيتينگتىك جۇيەسى تۋرالى ەرەجە قابىلدانعان. ولارعا قوسىمشا تولەماقى تولەۋ, تەڭگەرمەشىلدىكتى جويۋ –وسى رەيتينگتىڭ ناتيجەلەرىنە بايلانىستى جۇرگىزىلەدى.
وسى ارقىلى وڭىرلىك جوعارى وقۋ ورنىندا پروفەسسورلار مەن دوتسەنتتەردىڭ بارىنە بىردەي بىركەلكى قوسىمشا تولەماقى تولەۋ جۇيەسى كەلمەسكە كەتىپ بارادى. سونداي-اق مۇندا جاقسى, ناتيجەلى جۇمىس ىستەيتىن جاس ماگيستردىڭ جىلىنا بىردە-ءبىر ماقالا جازبايتىن نەمەسە وقۋ جانە قوسىمشا ادىستەمەلىك قۇرالدار شىعارۋعا ارالاسپايتىن جانە كۋراتورلىق قىزمەت اتقارمايتىن پروفەسسوردان نەمەسە دوتسەنتتەن كوبىرەك قوسىمشا تولەماقى الۋ ءتارتىبى دە ەنگىزىلمەك. مىنە وسىلايشا جۇبانوۆ ۋنيۆەرسيتەتىندە بىلىكتىلىك پەن بەلسەندىلىك تانىتا الماعان وقىتۋشىلار كەيىنگى كەزەككە ىسىرىلىپ, كەرىسىنشە جاس تاجىريبەلى, ءبىلىم بەرۋگە قۇلشىنىسى مول جاس ماماندار جۇمىسقا قابىلدانۋدا.
ال ستۋدەنتتەر ساپاسى تۋرالى نە دەۋگە بولادى؟ ونى جاقسارتۋ ءۇشىن جاڭا نورماتيۆتىك قۇقىقتىق اكتىلەرگە سايكەس ۋنيۆەرسيتەتتى اكادەميالىق ساياساتى جاڭعىرتىلدى. سونىمەن بىرگە ساپا كەپىلدىگى تۇتقاسى ايقىندالدى. بەلگىلى ءبىر وقۋ جىلىنا ارنالعان ساپا مونيتورينگىنىڭ كەشەندى جوسپارى دا ونى كوتەرۋ جونىندەگى ءىستىڭ اۋقىمىن وسىرە تۇسۋدە. وسى ارقىلى كۋرستان كۋرسقا كوشۋدىڭ GPA وتپەلى بالل كورسەتكىشى جوعارىلاتىلدى. سونىمەن قاتار ستۋدەنتتەر اراسىندا جاۋاپكەرشىلىك دەڭگەيىن كوتەرۋ ءۇشىن وقىتۋ مەن قورىتىندى باقىلاۋ ۇدەرىستەرى ايقىندالدى. سوعان سايكەس الداعى ۋاقىتتا جالپى ءبىلىم بەرۋ پاندەرى بويىنشا ارالىق اتتەستاتاۋ جانە قازاقستاننىڭ قازىرگى زامانعى تاريحى بويىنشا مەملەكەتتىك ەمتيحان كومپيۋتەرلىك تەستىلەۋ تۇرىندە وتكىزىلمەك. ال بازالىق جانە بەيىندى پاندەر تسيكلدارىنىڭ ەمتيحاندارى جازباشا تۇردە قابىلدانباق.
كاسىبي جانە ساپالى ءارى ومىرگە يكەمدى ماماندار ازىرلەۋ ءىسىنىڭ باستى ءبىر جولى وندىرىسپەن بايلانىس بولماق. وسى ورايدا 2019-2023 جىلدارعا ارنالعان مودۋلدىك ءبىلىم بەرۋ باعدارلامالارى مەن وقۋ جوسپارلارى اقتوبە وڭىرىندەگى 138 كاسىپورىندار مەن ۇيىمدار وكىلدەرىنىڭ قاتىسۋىمەن ازىرلەنگەن. سونىمەن بىرگە ولاردىڭ ۇسىنىستارى بويىنشا 400-گە جۋىق ءپان ەنگىزىلگەن. رەكتوردىڭ مالىمدەۋىنشە ۋنيۆەرسيتەتتە 30 ماماندىقتىڭ ءبىلىم بەرۋ باعدارلامالارىنا 57 تراەكتوريا ەنگىزىلگەن. بۇل دەگەنىمىز ءبىر ديپلوم الۋ اياسىندا جان-جاقتى ماماندار ازىرلەۋ دەگەن ءسوز دەيدى ول.
بيىلعى جىلى اتالعان وقۋ ورنىندا «كاسىبي دامۋ جانە مانساپ ورتالىعى» ءوز جۇمىسىن باستادى. مۇنداي ورتالىقتار ەلىمىزدىڭ 5 ۋنيۆەرسيتەتىندە قۇرىلعان. بۇگىنگى تاڭدا ۋنيۆەرسيتەت جۇبانوۆ ۋنيۆەرسيتەتىندە 230 وندىرىستىك نىساندار مەن ءار ءتۇرلى مەنشىك تۇرىندەگى مەكەمەلەرمەن ءتيىستى كەلىسىم-شارتتار جاسالعان. سونىمەن بىرگە ءبىلىم بەرۋ ۇيىمدارى مەن كاسىپورىندار بازاسىندا كافەدرالاردىڭ 82 فيليالى قۇرىلدى. 35 ماماندىقتىڭ 114 ءپانى بويىنشا دۋالدى وقىتۋ ەلەمەنتتەرى ەنگىزىلدى. تاجىريبەنى دامىتۋ باعىتىنداعى پاندەر مەن ساباقتار تاجىريبەلىك جانە زەرتحانالىق بازالاردا وتكىزىلۋدە.
مىنە, ق.جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتىندە ساپالى ماماندار مەن كادرلەر ازىرلەۋ ءىسىنىڭ كەيبىر قىرلارى وسىنداي.
اقتوبە
سۋرەتتە: ق.جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەت عيماراتىنىڭ سىرتقى كورىنىسى
