كاسىپكەردىڭ «كاسىبى»
سەيسەنبى, 21 مامىر 2013 1:21
«دانىككەننەن قۇنىققان جامان» دەيدى قازاق. جۇرت كاسىپكەر دەپ ارقا سۇيەپ, جۇمىسى جوقتار ناپاقا ايىرۋىما سەپتىگى تيە مە دەپ ءۇمىت ەتكەن جان قاناعاتسىز بولىپ شىقتى. ادال ەڭبەكپەن جيعانىم بۇيىرسىن دەمەي, مەملەكەتتى الداپ, ءبىردى-بىرگە قاعىستىرىپ قارجى يەمدەنۋ دە ونىڭ «كاسىپكەرلىگىنە» جاتادى ەكەن.
سەيسەنبى, 21 مامىر 2013 1:21
«دانىككەننەن قۇنىققان جامان» دەيدى قازاق. جۇرت كاسىپكەر دەپ ارقا سۇيەپ, جۇمىسى جوقتار ناپاقا ايىرۋىما سەپتىگى تيە مە دەپ ءۇمىت ەتكەن جان قاناعاتسىز بولىپ شىقتى. ادال ەڭبەكپەن جيعانىم بۇيىرسىن دەمەي, مەملەكەتتى الداپ, ءبىردى-بىرگە قاعىستىرىپ قارجى يەمدەنۋ دە ونىڭ «كاسىپكەرلىگىنە» جاتادى ەكەن.
بۇل دەرەك ماڭعىستاۋ وبلىسىنىڭ قاراقيا اۋدانىندا «جۇمىسپەن قامتۋ-2020» باعدارلاماسى بويىنشا «وقىتۋ جانە جۇمىسقا ورنالاسۋعا ءجاردەمدەسۋ», «كاسىپكەرلىكتى دامىتۋعا جاردەمدەسۋ», «ەڭبەك رەسۋرستارىنىڭ ۇتقىرلىعىن ارتتىرۋ» جانە «اۋىلدىق ەلدى مەكەندەردى دامىتۋ» باعىتىندا سوڭعى ءۇش جىلدا جۇمسالعان قارجىنىڭ تيىمدىلىگىنە تەكسەرۋ جۇرگىزىلگەندە انىقتالدى.
2011 جىلى «قاراقيا اۋداندىق جۇمىسپەن قامتۋ ورتالىعى» مەملەكەتتىك مەكەمەسى جۇمىسسىز كەيبىر ازاماتتاردى سول اۋىلداعى جەكە كاسىپكەر گ.ب-عا سىلتەيدى. قازاقستان رەسپۋبليكاسى ۇكىمەتىنىڭ 31.03.2011 جىلعى №316 قاۋلىسىمەن بەكىتىلگەن «جۇمىسپەن قامتۋ-2020» باعدارلاماسىنا قاتىسۋشى رەتىندە جولدانعان ازاماتتاردىڭ 8-ءى جۇمىسسىزداردىڭ قاتارىنا قوسىلۋعا ءوتىنىش بەرگەن, بىراق ورتالىقپەن الەۋمەتتىك كەلىسىمشارت جاساماعان, ەشقانداي قۇجاتتارعا قول قويماعان. جەكە كاسىپكەر الگى سەگىز ازاماتتى سىرتىنان «جۇمىسقا قابىلداپ», «قاراقيا اجقو» مم-نەن باعدارلاماعا قاتىسۋشىلار ءۇشىن بولىنگەن قاراجات ەسەبىنەن 8 ازاماتقا 2012 جىلدىڭ سوڭعى 4 ايىنا ايلىق «بەرەدى». ءسويتىپ, جالاقى رەتىندە بيۋدجەتتەن بولىنگەن 442 مىڭ تەنگەنى جەكە كاسىپكەر ءوزى يەمدەنەدى. العانى بويىنا جۇققان كاسىپكەر بيىل دا وسى ارەكەتىن جۇزەگە اسىرا باستايدى. وزىنە ورتالىقتان جولدانعان 6 قاراقيالىقتى «جۇمىسقا الىپ», ولارعا 2013 جىلدىڭ قاڭتار, اقپان, ناۋرىز ايلارىنا جالاقى رەتىندە بيۋدجەتتەن بولىنگەن 520 مىڭ تەڭگەنى ءوزى جىمقىرادى.
قاراقيا اۋدانى پروكۋرورىنىڭ ورىنباسارى د.ساعىندىقوۆتىڭ ايتۋىنشا, تەكسەرۋ بارىسىندا ازاماتتاردىڭ ەشقايسىسىنىڭ جەكە كاسىپكەردى تانىمايتىندىعى, ونىڭ مەكەمەسىندە جۇمىس جاساماعاندىعى, جالاقى الماعاندىعى انىقتالىپتى.
اشكوزدىكپەن مەملەكەتكە 962 مىڭ تەڭگە شىعىن كەلتىرگەن جەكە كاسىپكەرگە قاتىستى قىلمىستىق ءىس قوزعالدى. ەندى ول ارتىق ىشكەن-جەگەنىن «قۇسىپ» قانا قويماي, جەمقورلىق ءۇشىن جازاسىن الاتىن بولادى.
جۇمىسسىزدارىنىڭ جايى نە بولىپ جاتقانىن قاداعالاماي, اقشانى اۋدارا بەرگەن «قاراقيا اۋداندىق جۇمىسپەن قامتۋ ورتالىعى» مەملەكەتتىك مەكەمەسىندەگىلەر قايدا قاراپ وتىرعان؟
گۇلايىم شىنتەمىرقىزى,
«ەگەمەن قازاقستان».
ماڭعىستاۋ وبلىسى.
