ەكى باسشىنىڭ اراسىندا نە بايلانىس بار؟
سەنبى, 18 مامىر 2013 2:59
قازىر وڭتۇستىكتە ەكى كۇننىڭ بىرىندە ەلدى ەلەڭ ەتكىزەرلىك جايتتار ورىن الۋدا. الدىمەن اۋىز سۋ ماسەلەسىنەن باستاساق… وسىدان ءبىر ايداي ۋاقىت بۇرىن وبلىستىق پروكۋراتۋرا وڭىردەگى «اقبۇلاق» باعدارلاماسىنىڭ ورىندالۋىنا بايلانىستى ءتيىستى باسشىلارعا اۋىر ايىپتاۋلار تاقتى. ءتىپتى, پروكۋراتۋرا وكىلدەرى تاراتقان پاراقشالاردا اۋىلدارعا سۋ قۇبىرىن تارتۋدا سۋ قۇردىمعا كەتكەن قارجىلار سوماسى بىرنەشە ميللياردتى قۇرايتىنى ناقتى كورسەتىلگەن ەدى.
سەنبى, 18 مامىر 2013 2:59
قازىر وڭتۇستىكتە ەكى كۇننىڭ بىرىندە ەلدى ەلەڭ ەتكىزەرلىك جايتتار ورىن الۋدا. الدىمەن اۋىز سۋ ماسەلەسىنەن باستاساق… وسىدان ءبىر ايداي ۋاقىت بۇرىن وبلىستىق پروكۋراتۋرا وڭىردەگى «اقبۇلاق» باعدارلاماسىنىڭ ورىندالۋىنا بايلانىستى ءتيىستى باسشىلارعا اۋىر ايىپتاۋلار تاقتى. ءتىپتى, پروكۋراتۋرا وكىلدەرى تاراتقان پاراقشالاردا اۋىلدارعا سۋ قۇبىرىن تارتۋدا سۋ قۇردىمعا كەتكەن قارجىلار سوماسى بىرنەشە ميللياردتى قۇرايتىنى ناقتى كورسەتىلگەن ەدى. بىراق ارتىنشا وبلىستىق ەنەرگەتيكا جانە تۇرعىن ءۇي, كوممۋنالدىق شارۋاشىلىق باسقارماسىنىڭ باستىعى ارنايى ءباسپاسوز ءماسليحاتىن ۇيىمداستىرىپ, ميللياردتاردى تۇگەندەپ, قالاي جۇمسالعانىن ءتۇسىندىرىپ, كىنالىنى باسقا جاقتان ىزدەدى. و باستا جەر استى سۋ قورلارىن دۇرىس زەرتتەمەۋدەن بۇگىندە بىرنەشە اۋىلعا تارتىلعان اۋىز سۋ كەرمەك تاتىپ كەتكەن. قازىر ول اۋىلدارعا سۋدى تازارتاتىن قوندىرعىلار ورناتىلۋدا.
وسىمەن وڭتۇستىك حالقى ءبىرشاما ۋاقىت تىنشىعان سياقتى ەدى. وسى اپتانىڭ دۇيسەنبىسىندە دۇربەلەڭ قايتادان باستالدى. بۇل جولى قارىمساققا قولدى قارجى پوليتسياسى سالدى. وڭتۇستىك قازاقستان وبلىسىنىڭ جولاۋشىلار كولىگى جانە اۆتوموبيل جولدارى باسقارماسىنىڭ باستىعى ابىلسەيىت راباەۆ قاماۋعا الىندى. تاعىلعان كىنا وتە اۋىر. بۇل ءىس بويىنشا كەم دەگەندە تاعى ءۇش شەنەۋنىك كۇدىكتى رەتىندە تانىلىپ وتىر ەكەن. بۇلار جوندەۋدى قاجەت ەتپەيتىنىن بىلە تۇرا كوكسايەك-اقسۋ-شايان-مىڭبۇلاق تاس جولىن قالپىنا كەلتىرۋ جۇمىستارىنا بيۋدجەتتەن 131 ميلليون تەڭگە بولگەن. بۇل ىسپەن قازىر رەسپۋبليكادان كەلگەن قارجى پوليتسياسىنىڭ قىزمەتكەرلەرى اينالىسۋدا.
ەندى كەشە وڭتۇستىك قازاقستان وبلىسى اكىمىنىڭ ورىنباسارى بولاتبەك ناجمەدين ۇلى اليەۆ قىزمەتىنەن بوساتىلدى. بۇل لاۋازىمدى تۇلعا ءدال وسى جولاۋشىلار كولىگى جانە اۆتوموبيل جولدارى باسقارماسىنىڭ جۇمىسىنا جەتەكشىلىك ەتەتىن. ارينە, اكىم ورىنباسارى جۇمساق كرەسلوسىنان وڭايلىقپەن ايىرىلعىسى كەلمەيتىنى بەلگىلى. ونىڭ ۇستىنە بولاتبەك ناجمەدين ۇلى وسى قىزمەتىندە ءجۇرىپ قانشاما قيىندىقتاردى, قانشاما اقپاراتتىق شابۋىلداردى باستان وتكەردى دەسەڭىزشى. بىرقاتار اقپارات قۇرالدارى ونىڭ وتكەن ەڭبەك جولدارىنا شولۋ جاساپ, بۇرىن قۇقىق قورعاۋ سالاسىندا جۇرگەندە ءىستى بولعانىن قايتا-قايتا كوزگە شۇقىپ كورسەتە بەردى. شىنىندا ءبىر كەزدەرى كەدەن سالاسىندا جۇرگەندە بىرقاتار كەلەڭسىزدىكتەرگە ۇرىنىپ, قىزمەتىنەن قوشتاسقان با؟! بىراق, ونى قارالايتىنداي دالەل از بولدى عوي دەيمىن, بولاتبەك بارلىق «ديىرمەننەن» ءدىن-امان شىقتى. ايتسە دە وسىدان كەيىن «اليەۆ» دەگەن تەگىن الىپ تاستاپ, ونىڭ رەسمي تۇردە «بولاتبەك ناجمەدين ۇلى» دەپ قۇجات اۋىستىرعانىنا دا كوپ بولا قويعان جوق ەدى. مىنە, وسىنداي تارتىستان كەيىن بولاتبەك ناجمەدين ۇلىنىڭ اياق استىنان جۇمىستان كەتۋ تۋرالى ارىز جازعانىن قالاي تۇسىنۋگە بولادى؟ بىزدىڭشە اكىم ورىنباسارىنىڭ ورنىنان كەتۋىن ابىلسەيىت راباەۆتىڭ جوعارىداعى «تىرلىگى» تەزدەتكەن, ءتىپتى ماجبۇرلەگەن سياقتى. ءبىر كەزدەرى بولاتبەك تە وبلىستىق جولاۋشىلار كولىگى جانە اۆتوموبيل جولدارى باسقارماسىنىڭ باستىعى قىزمەتىن اتقارعان. ءدال سول كەزدەرى راباەۆ ونىڭ قول استىندا جۇمىس ىستەپتى. جاپ-جاس جىگىتتىڭ كەيىننەن باعى جانىپ, بولاتبەك ناجمەدين ۇلى وبلىستىق اكىمدىككە قىزمەت اۋىستىرعاندا بۇل ونىڭ ورنىن باسىپ, باسقارماعا باستىق بوپ قالادى. قالاي ايتساق تا, اكىم ورىنباسارىنىڭ قىزمەتىمەن قوش ايتىسۋى مەن باسقارما باسشىسىنىڭ «بىلىعى» اراسىندا ءبىر بايلانىس بار سياقتى. ارينە, اق-قارانى ايىرۋ قۇقىق قورعاۋ ورگاندارىنىڭ, ال, ماسەلەنىڭ ءمان-جايىن ءبىلۋ الداعى كۇندەردىڭ ەنشىسىندە.
اپتا ورتاسىندا بارلىق سايتتاردا شىمكەنت قالاسىنىڭ اكىمى قايرات مولداسەيىتوۆ ءوز ەركىمەن جۇمىستان كەتەدى ەكەن دەگەن اقپاراتتار جارىق كوردى. ارتىنشا قالا اكىمىنىڭ سىرقاتتانىپ قالۋىنا بايلانىستى, قىسقا مەرزىمدى دەمالىسقا شىققانى بەلگىلى بولدى. قايرات قۇسەيىن ۇلىنىڭ بۇل قىزمەتىنە كەلگەنىنە ءبىر جىلدان ەندى استى. تاعى دا وسى اپتادا وبلىستىق سپورت جانە تۋريزم باسقارماسىنىڭ باستىعى پولات قىرىقباەۆتىڭ استاناعا ات اۋىستىرعانىن ەستىپ ءبىلدىك. ارينە, بۇل ەكى ازاماتتىڭ دا جوعارىداعى جول داۋىنا ەشقانداي قاتىسى جوق. ءبارى ءومىردىڭ زاڭى عوي. بىرەۋلەر بيزنەستى قالايدى, بىرەۋلەر بيلىكتى قالايدى.
ورالحان ءداۋىت,
«ەگەمەن قازاقستان».
وڭتۇستىك قازاقستان وبلىسى.
