ارالداعى ەلگە دە ارالاسى بار
بەيسەنبى, 16 مامىر 2013 1:39
ەرلى-زايىپتى حراپۋنوۆتاردىڭ كيپر بانكتەرىنەن قارجىسى تابىلدى
بىرقاتار شەتەلدىك باق-تاردىڭ مالىمدەۋلەرىنشە, الماتى قالاسىنىڭ بۇرىنعى اكىمى ۆيكتور حراپۋنوۆ پەن ونىڭ زايىبى لەيلا حراپۋنوۆانىڭ كيپر بانكتەرىندە ساقتاۋلى تۇرعان اقشالارىنىڭ دەرەكتەرى تابىلعان. بۇل قارجىلاردى ولاردىڭ «الدەقانداي كۇن تۋا قالعان جاعداي ءۇشىن» اپارىپ جاسىرىپ قويعاندارىن «نوماد» جازدى.
بەيسەنبى, 16 مامىر 2013 1:39
ەرلى-زايىپتى حراپۋنوۆتاردىڭ كيپر بانكتەرىنەن قارجىسى تابىلدى
بىرقاتار شەتەلدىك باق-تاردىڭ مالىمدەۋلەرىنشە, الماتى قالاسىنىڭ بۇرىنعى اكىمى ۆيكتور حراپۋنوۆ پەن ونىڭ زايىبى لەيلا حراپۋنوۆانىڭ كيپر بانكتەرىندە ساقتاۋلى تۇرعان اقشالارىنىڭ دەرەكتەرى تابىلعان. بۇل قارجىلاردى ولاردىڭ «الدەقانداي كۇن تۋا قالعان جاعداي ءۇشىن» اپارىپ جاسىرىپ قويعاندارىن «نوماد» جازدى.
ەرلى-زايىپتى شونجارلار بۇل دەپوزيتتى ۆيكتور حراپۋنوۆ الماتى قالاسىنىڭ اكىمى بولىپ تۇرعان كەزدىڭ وزىندە-اق اشىپ قويعان ەكەن. سوعان قاراعاندا, بۇلار مۇعادجىرلىققا كەتۋدى كۇنى بۇرىن جوسپارلاپ العان سياقتى. سول ماقساتتارى ءۇشىن ارالداعى مەملەكەتتى دە بەكەر تاڭداماعاندارى كورىنىپ تۇر. الەمگە وفشورلىق ايماق رەتىندە تانىلعان ەلدىڭ اقشا قويمالارىنا قازىنا جاسىرۋ ارقىلى ولار ءوز ىزدەرىن بىلدىرمەي كەتەمىز دەگەن بولسا كەرەك. الايدا, اياق استىنان پايدا بولا قالعان «تابىسكەر» بيزنەسۆۋمەن, ياعني ايەل-بيزنەسمەن كەلەشەك كيپردە قارجى داعدارىسىنىڭ ورىن الاتىنىن جانە ونىڭ ەشكىمدى دە ايامايتىنىن, وسى ارقىلى قىرىق قابات تورقانىڭ استىندا تىعىلىپ جاتقان ۇرى-قارى بايلاردىڭ تازا سۋدىڭ بەتىنە قالقىپ شىعاتىنىن, سوسىن قولدارىنان سۋسىپ كەتىپ بارا جاتقان اقشالارىن ساقتاپ قالۋ ءۇشىن ادۆوكاتتاردىڭ قالىڭ ارمياسىن جالداۋلارىنا تۋرا كەلەتىندەرىن الدىن الا پايىمداي الماسا كەرەك.
باسىلىم سونىمەن قاتار, حراپۋنوۆتاردىڭ شۆەيتسارياداعى نەگىزگى اكتيۆتەرى – وزدەرىنىڭ ۇلدارى يلياس حراپۋنوۆ نەگىزىن قالاعان Swiss Development Group (SDG) كومپانياسىن ساتقاندارىن ەسكە ءتۇسىرىپ وتەدى. ول شۆەيتساريانىڭ بەدەلى بيىك اۋداندارى مەن شەتەلدەردە ەليتالى جىلجىمايتىن م ۇلىكتەر قۇرۋعا مامانداندىرىلعان كومپانيا ءبىراز قارجى دا تاپتى.
وسىعان وراي, باسىلىم يلياستىڭ جەكە ءوزىنىڭ تىرلىكتەرى تۋرالى دا شولۋ جاساي كەتەدى. «وسى ءبىر 28 جاسار جاس جىگىتتىڭ شۆەيتسارياداعى ءجۇرىس-تۇرىسى تۋرالى قازىر مۇندا شىن مانىندە شىندىققا بەرگىسىز اڭىز تاراپ ءجۇر», دەپ جازادى ول. ال يلياس حراپۋنوۆ ءوزىنىڭ قارىنداسى ەلۆيرامەن بىرگە شۆەيتساريادا 14 جاسىنان بەرى تۇرىپ كەلە جاتىر. ول جەنەۆاداعى ەليتالى ۇيدە تۇردى, سوندا ءجيى شۋلى كەشتەر ۇيىمداستىراتىنىمەن اتى شىقتى. باسىلىمنىڭ جازۋىنشا, يلياس سول سياقتى كوپتەگەن جول-كولىك وقيعالارىن جاساۋى ارقىلى جەرگىلىكتى پوليتسياعا دا ابدەن تانىمال بولىپ ۇلگەرگەن كورىنەدى. الايدا, ول پوليتسياعا جول ەرەجەسىن بۇزعان ءوز اناسى باسقاراتىن كومپانيانىڭ قىزمەتكەرلەرى ەكەنىن ايتىپ, ۇدايى سولاردىڭ اتتارىن اتاپ تۇرعان. سوندىقتان ءىرى كولەمدەگى ايىپپۇل قاعازدارى ەشقاشان شۆەيتسارياعا بارىپ كورمەگەن قازاقستاندىق ازاماتتاردىڭ اتتارىنا ءبىزدىڭ ەلىمىزگە جونەلتىلىپ كەلگەن. وسىدان-اق, ونىڭ بالاقاي كۇنىندە قالاي قالىپتاسقانىن انىق بايقاۋعا بولادى.
2008 جىلى يلياس حراپۋنوۆ قازاقستاندىق پاسپورتىن شۆەيتساريالىق قۇجاتقا ايىرباستاۋعا ارەكەت جاساپ كورەدى. الايدا, بۇعان كەلىسىم الا المايدى. سول كەزدە ونىڭ جول ءتارتىبىن بۇزعاندارى ايعاقتالىپ شىعا كەلەدى. وسىنىڭ نەگىزىندە حراپۋنوۆقا ايتارلىقتاي ءىرى مولشەردەگى ايىپپۇل سوماسىن ءوزىنىڭ تولەۋىنە تۋرا كەلدى. بۇل جولى ول تيەسىلى تولەمىن ەشبىر قينالماستان بىردەن تولەيدى. سەبەبى, كەلەشەكتە شۆەيتساريا ازاماتتىعىن الا الماي قالۋ قاۋپىنەن قورىققان. ول سونداي-اق, ءوزىنىڭ ءىرى اكتيۆتەردىڭ يەسى ەكەنىن, سول ارقىلى شۆەيتساريا ەكونوميكاسىنا ينۆەستيتسيا اكەلىپ جۇرگەنىن دە ايتىپ سالادى.
وسى جەردە ايتا كەتەيىك, ۆيكتور جانە لەيلا حراپۋنوۆتار قازىرگى كۇندەرى 20 قىلمىستىق ءىس بويىنشا تەرگەلىپ جاتىر. تەرگەۋ ءمالىمەتتەرىنە قاراعاندا, بۇل وتباسى 2003 جىلدان 2007 جىلعا دەيىن شۆەيتساريا مەن وففشورلىق ايماقتارداعى شەتەلدىك بانكتەرگە 48 ملن. دوللار مەن 7,7 ملن. ەۋرو اۋدارعان. 2012 جىلعى قازان ايىندا لەيلا حراپۋنوۆاعا ءىرى كولەمدە الاياقتىق جاساعانى ءۇشىن ىزدەۋ جاريالاندى. ال جەلتوقسان ايىندا ول جەنەۆا پروكۋراتۋراسىمەن جۇمىس جاساسۋعا دايىن ەكەنىن مالىمدەدى. سودان باستاپ حراپۋنوۆتار وتباسى مۇشەلەرىنىڭ اقشا اينالدىرۋ ءجونىندەگى ارەكەتتەرىن تەكسەرۋ باستالىپ كەتتى.
رۋسلان يگىلىك.
