قىزمەتتىڭ قۇپياسى
بەيسەنبى, 9 مامىر 2013 2:06
ەگەر قول استىنداعى قىزمەتكەرى اياق استىنان جۇمىستان كەتۋ جونىندە ارىزىن جازىپ الىپ كەلسە, باسشى ادام نە ىستەۋى كەرەك؟ بالكىم, «نە ءۇشىن, نە بولىپ قالدى؟» دەپ ءبىر اۋىز ءمان-جايدى سۇرايتىن دا شىعار. بىراق, «جۇمىستان بوسايمىن» دەپ شەشىم قابىلداپ, ءبىرجولاتا بەلدى بەكەم بۋعان ادام ەشقانداي بۇيرىققا باعىنبايتىنى انىق. بايلاپ ۇستاپ تۇرا المايسىز. وتىنىشىنە قول قويىپ بەرىپ, بەس كۇننىڭ ىشىندە ەسەپ ايىرىساسىز. قايبىر كۇنى وڭتۇستىك قازاقستان وبلىستىق تارتىپتىك كەڭەسىندە وتكەن ماجىلىستە وسى تەكتەس سۇراققا بىرقاتار اۋدان اكىمدەرى وسىلاي جاۋاپ بەردى.
بەيسەنبى, 9 مامىر 2013 2:06
ەگەر قول استىنداعى قىزمەتكەرى اياق استىنان جۇمىستان كەتۋ جونىندە ارىزىن جازىپ الىپ كەلسە, باسشى ادام نە ىستەۋى كەرەك؟ بالكىم, «نە ءۇشىن, نە بولىپ قالدى؟» دەپ ءبىر اۋىز ءمان-جايدى سۇرايتىن دا شىعار. بىراق, «جۇمىستان بوسايمىن» دەپ شەشىم قابىلداپ, ءبىرجولاتا بەلدى بەكەم بۋعان ادام ەشقانداي بۇيرىققا باعىنبايتىنى انىق. بايلاپ ۇستاپ تۇرا المايسىز. وتىنىشىنە قول قويىپ بەرىپ, بەس كۇننىڭ ىشىندە ەسەپ ايىرىساسىز. قايبىر كۇنى وڭتۇستىك قازاقستان وبلىستىق تارتىپتىك كەڭەسىندە وتكەن ماجىلىستە وسى تەكتەس سۇراققا بىرقاتار اۋدان اكىمدەرى وسىلاي جاۋاپ بەردى.
بىراق, قانشا ءوز ەركىمەن باس تارتىپ, جۇمىستان كەتۋگە وزدەرى ءوتىنىش بەردى دەسەك تە, بۇلاردى وسىلاي ىستەۋگە ءبىر جاعداي ماجبۇرلەگەن سەكىلدى. ايتەۋىر, وسىندا ءبىر گاپ بار. وتىرار اۋدانى, بالتاكول اۋىل وكرۋگىنىڭ اكىمى, سوزاق اۋدانى, قاراتاۋ اۋىل وكرۋگىنىڭ اكىمى, تۇركىستان قالاسىنىڭ ساۋلەت جانە قالا قۇرىلىسى ءبولىمىنىڭ باستىعى, شىمكەنت قالاسى, ءال-فارابي اۋدانى بويىنشا مەملەكەتتىك سانيتارلىق-ەپيدەميولوگيالىق قاداعالاۋ باسقارماسىنىڭ جەتەكشى مامانى… بارلىعى دا ۇستەرىنەن قىلمىستىق ءىس قوزعالىپ جاتقان كەزدە ارىزدارىن جازىپ, قىزمەتتەرىنەن بوساپ كەتكەن. ارادا بىرنەشە ۋاقىت وتكەننەن كەيىن بارىپ, بارلىعى سوتتى بولىپ, شارتتى جازا العان.
بۇل قىزمەتكەرلەر جۇمىستان بوساۋعا نەگە سونشالىقتى اسىقتى؟ الدە الدىن-الا ءوز ەركىمەن بوساپ كەتسە, جازاسى جەڭىلدەيدى مە؟ ءتىپتى, ماجىلىستە «بۇلار مەملەكەتتىك قىزمەتتەن كۇنى بۇرىن كەتىپ قالعاندىقتان سوتتالعانى تۋرالى مالىمەتتەر پروكۋراتۋرانىڭ ارنايى ەسەبىنە تىركەلمەيدى, ۋاقىت وتە كەلە قايتادان مەملەكەتتىك قىزمەتكە ورالۋعا بولادى» دەگەن دە پىكىرلەر ايتىلدى. بىراق, پروكۋراتۋرا وكىلدەرى «كەز كەلگەن قىلمىستىق ءىس ەسەپكە تىركەلەدى» دەپ, ول پىكىردى جوققا شىعاردى. «مەملەكەتتىك قىزمەت تۋرالى» زاڭىنىڭ 28-بابىنىڭ 1-تارماعىندا مەملەكەتتىك قىزمەتشىنىڭ تەرىس سەبەپتەرمەن جۇمىستان بوساتۋعا اكەپ سوعاتىن تارتىپتىك تەرىس قىلىق جاساعان ادامداردى ءوز ەركىمەن جۇمىستان بوساتقانى ءۇشىن مەملەكەتتىك قىزمەتشىلەرگە تارتىپتىك جازالار قولدانىلۋ مۇمكىندىگى بەرىلگەن.
بىراق تارتىپتىك جازا تەرىس قىلىق انىقتالعان كۇننەن باستاپ ءبىر اي ىشىندە قولدانىلادى, التى ايدان كەيىن قولدانىلا المايدى دەيدى بۇل جونىندە مەملەكەتتىك قىزمەت ىستەرى اگەنتتىگىنىڭ وڭتۇستىك قازاقستان وبلىسى بويىنشا باسقارماسىنىڭ باستىعى بەرىك بەكجانوۆ. وسى ماسەلە بويىنشا ەكى اۋداننىڭ اكىمى تارتىپتىك كەڭەس مۇشەلەرى الدىندا ەسەپ بەردى.
ال, كەرىسىنشە سارىاعاش اۋداندىق ءماسليحاتىنىڭ قىزمەتكەرى ە.ماحمۋدوۆتىڭ قىزمەتكە تۇرۋى ءبىر قىزىق. قر مەملەكەتتىك قىزمەت ىستەرى اگەنتتىگىنىڭ وڭتۇستىك قازاقستان وبلىسى بويىنشا باسقارماسى اۋداندىق ماسليحاتقا حات جازىپ, كادر رەزەرۆىندەگى ەكى ادامدى ۇسىنعان. سول حات سارىاعاشقا جەتكەنشە جول-جونەكەي تىزىمگە ءۇشىنشى ادام, ياعني, ماحمۋدوۆ قوسىلىپ كەتەدى. كىم قوستى, قالاي قوسىلدى, ەشكىم بىلمەيدى. سونىمەن, ول ماسليحاتقا جۇمىسقا قابىلدانعان. ال, ماحمۋدوۆ بۇعان دەيىن كادر رەزەرۆىندە تۇردى ما؟ «وتىرار اۋدانى اپپاراتىنان كونكۋرس ارقىلى تۇردىم» دەيدى ءوزى. كەيىنىرەك تۇسىنىكتەمە الۋ بارىسىندا ول اۋداننان ماحمۋدوۆتىڭ ەشقانداي كونكۋرس ارقىلى رەزەرۆكە قابىلدانباعانى ءمالىم بولعان. سوندا اۋداندىق ءماسليحات پەن مەملەكەتتىك قىزمەت ىستەرى باسقارماسىنىڭ اراسىندا مىسىق-تىشقان ويناپ وتىرعان كىم؟
سونىمەن, وڭتۇستىكتە قىزمەتتەن كەتۋدىڭ دە, تۇرۋدىڭ دا قۇپياسى كوپ بولىپ تۇر.
ورالحان ءداۋىت,
«ەگەمەن قازاقستان».
وڭتۇستىك قازاقستان وبلىسى.
