وسكەمەندىك ولەرمەن ءوندىرىسشى
جۇما, 26 ءساۋىر 2013 3:05
مەملەكەتتەن ەكى ميلليارد تەڭگە جىمقىرعان
جۇمىرتقادان ءجۇن قىرقاتىن كاسىپكەر تاياۋ جىلدار ىشىندە مەملەكەتتىڭ قازىناسىن 2 ملرد. تەڭگەدەن استام قارجىعا ولقى ءتۇسىرىپ بەرگەن. بۇل تۋرالى شىعىس قازاقستان وبلىستىق پروكۋراتۋراسىنىڭ ءباسپاسوز قىزمەتى حابارلادى.
جۇما, 26 ءساۋىر 2013 3:05
مەملەكەتتەن ەكى ميلليارد تەڭگە جىمقىرعان
جۇمىرتقادان ءجۇن قىرقاتىن كاسىپكەر تاياۋ جىلدار ىشىندە مەملەكەتتىڭ قازىناسىن 2 ملرد. تەڭگەدەن استام قارجىعا ولقى ءتۇسىرىپ بەرگەن. بۇل تۋرالى شىعىس قازاقستان وبلىستىق پروكۋراتۋراسىنىڭ ءباسپاسوز قىزمەتى حابارلادى.
باقىلاۋشى ورگانداردىڭ ءمالىمەتىنە قاراعاندا, «پرەدگورنىي ەلەۆاتورى» اكتسيونەرلىك قوعامىنىڭ باسشىسى ا.مەرزلوۆ بىرنەشە جىلدىڭ كولەمىندە قىلمىستىق جولمەن مەملەكەتكە تيەسىلى ءداندى داقىلدار قورىن جىمقىرىپ كەلگەن.
Altaynews.kz ءتىلشىسى بارماعىن جالاپ ۇيرەنىپ قالعان بيزنەسمەننىڭ وسى ارقىلى مەملەكەتتى 2 ملرد. تەڭگەدەن استام قارجىعا تاقىرعا وتىرعىزىپ قويعانىن جازادى. ماماندار قالادا نان ونىمدەرى باعاسىنىڭ بىردەن كۇرت ءوسىپ كەتۋىنە وسىنىڭ نەگىزگى تۇرتكى بولعانىن دا جوققا شىعارمايدى…
تەرگەۋ بارىسى انىقتاعانداي, جوعارىدا اتالعان كومپانيا مەن «ازىق-ت ۇلىك كەلىسىم-شارت كورپوراتسياسى ۇلتتىق كومپانياسى» اكتسيونەرلىك قوعامى اراسىندا 2008 جىلعى 3 قاڭتاردا-اق كەلىسىم-شارت جاسالىپ قويىلعان ەكەن. سونىڭ نەگىزىندە ارتىنشا پرەدگورنىي ەلەۆاتورىنا ءۇشىنشى كلاستى 58 569 توننا استىق شەكسىز مەرزىمگە ساقتاپ قويۋعا بەرىلەدى.
الايدا, ارادا ءبىرشاما ۋاقىت وتكەننەن كەيىن اتالمىش داقىل قامباسىنىڭ كەنەرەسى ايتارلىقتاي تومەن ءتۇسىپ كەتكەنى انىق اڭعارىلادى.
–ۇستىمىزدەگى جىلعى ناۋرىز ايىندا وبلىستىق پروكۋراتۋراعا اۋىل شارۋاشىلىعى مينيسترلىگى اگروونەركاسىپتىك كەشەنىندەگى وبلىستىق اۋماقتىق ينسپەكتسياسىنىڭ باستىعى ا.جاقىپباەۆتان «پرەدگورنىي ەلەۆاتورى» اق قويماسىندا ساقتاۋلى تۇرعان استىقتىڭ ءىس جۇزىندەگى كولەمىن انىقتاپ بەرۋ جونىندە ءوتىنىش ءتۇستى, – دەدى وسىعان ارنالعان بريفينگتە شىعىس قازاقستان وبلىسى پروكۋرورىنىڭ ءبىرىنشى ورىنباسارى بولات شەلەكەنوۆ. – ال پروكۋراتۋرا قىزمەتكەرلەرى ولشەپ تەكسەرۋدىڭ ناتيجەسىندە ءىس جۇزىندە 46 069 توننا كولەمىندەگى استىقتىڭ قولدى بولعانىن انىقتادى. وسى ارقىلى مەملەكەتكە 2 ميلليارد تەڭگەدەن ارتىق زالال كەلتىرىلگەنى بەلگىلى بولىپ وتىر.
پروكۋراتۋرا اتالمىش فاكت بويىنشا بيىلعى 26 اقپاندا قىلمىستىق ءىس قوزعاعان. وندا «پرەدگورنىي ەلەۆاتورى» اق ديرەكتورى ا.مەرزلوۆقا قىلمىستىق كودەكستىڭ 176-بابى 4-تارماعى بويىنشا ايىپ تاعىلعان. بۇل «وزىنە سەنىپ تاپسىرىلعان وزگەنىڭ مۇلكىن يەمدەنۋ جانە تالان-تاراجعا سالۋ» دەگەندى بىلدىرەدى.
قازىرگى تاڭدا قىلمىستىق ءىس بويىنشا تەرگەۋ امالدارىن قارجى پوليتسياسى جۇرگىزىپ جاتىر.
– تەرگەۋ كەزىندە مەرزلوۆ الماتىدا بولدى. بۇگىندە ول شىعىس قازاقستانعا جەتكىزىلدى. كۇدىكتى ءوزىنىڭ استىق ۇرلاعانى جونىندەگى كىناسىن تولىق مويىندادى, – دەيدى ب.شەلەكەنوۆ.
تاعى ءبىر ايتاتىن ءجايت, پروكۋراتۋرا ا.مەرزلوۆتىڭ ءوز ايىبىن مويىنداپ وتىرعانىنا قاراماستان, بۇل قىلمىسقا مەملەكەتتىك ورگانداردىڭ استىقتى باقىلاۋ مەن ساقتاۋعا جاۋاپ بەرەتىن باسقا دا لاۋازىمدى تۇلعالارىنىڭ قاتىسى بولۋى مۇمكىن دەپ سانايدى.
– سوندىقتان تاعى دا مۇقيات تەكسەرۋ جۇرگىزىلىپ, مەملەكەتتىك ورگانداردىڭ وسىعان مۇددەلى تۇلعالارىنىڭ ءىس-ارەكەتتەرىنە باعا بەرىلەتىن بولادى, – دەپ ءتۇسىندىردى مۇنى پروكۋراتۋرا وكىلى. – بۋحگالتەريالىق قۇجاتتارعا سايكەس, استىقتىڭ سىرتقا شىعارىلعانى تۋرالى مالىمەتتەر ساقتالعان. ال مەرزلوۆتىڭ ءوزى بۇل اۆتوكولىك ارقىلى جۇزەگە اسىرىلدى دەگەندى ايتادى. بىراق, وزدەرىڭىز ويلاپ كورىڭىزدەرشى, ورتا ەسەپپەن ءاربىرى 15-20 توننا عانا تارتا الاتىن كاماز كولىگىمەن 43 000 توننا استىقتى سىرتقا تاسۋ ءۇشىن قانشا ماشينە جانە قانشا كۇن كەرەك بولادى؟ بۇل – ونشالىقتى اقىلعا سىيمايتىن نارسە. دەمەك, مۇندا ازىرگە ءبىز بىلمەيتىن جاسىرىن جاتقان باسقا دا قىلمىستاردىڭ ىزدەرى بولۋى كادىك.
سونىمەن بىرگە, قولدا بار مالىمەتتەر ۇرلانعان استىقتىڭ قازاقستان اۋماعىندا جاراتىلعانىن ايعاقتايدى. قازىر قىلمىستىق ءىستىڭ قوزعالۋىنا بايلانىستى مەرزلوۆتىڭ مۇلكى مەن شوتىنا, سونداي-اق «پرەدگورنىي ەلەۆاتورى» اكتسيونەرلىك قوعامىنىڭ ءوندىرىستىك بازاسىنا تىيىم سالىندى.
رۋسلان يگىلىك.
