كۇبىسىنە قاراي پىسپەگى
سارسەنبى, 24 ءساۋىر 2013 1:43
رەسەي بيزنەسمەندەرى بتا بانكتەن م.ءابىلازوۆ ءۇشىن 70 ملن. دوللار كولەمىندە اقشا اكەتكەن.
جاقىندا رەسەي ىشكى ءىستەر مينيسترلىگىنىڭ تەرگەۋ دەپارتامەنتى «دەلو» ليزينگىلىك كومپانياسى يەلەرىنىڭ ءبىرى دميتري پاك پەن كاسىپورىننىڭ باس ديرەكتورى ولەگ تسارەۆكە قاتىستى تەرگەۋدى شەگىنە جەتكىزدى. ماسكەۋدىڭ «كوممەرسانت» گازەتىنىڭ جازۋىنا قاراعاندا, وسى تەرگەۋدىڭ ارقاسىندا بۇل ەكەۋدىڭ ايرىقشا ءىرى كولەمدە الاياقتىق جاساپ, مەملەكەتتىڭ اقشاسىن تالان-تاراجعا سالعاندارى اقي-تاقي ايعاقتالعان كورىنەدى.
سارسەنبى, 24 ءساۋىر 2013 1:43
رەسەي بيزنەسمەندەرى بتا بانكتەن م.ءابىلازوۆ ءۇشىن 70 ملن. دوللار كولەمىندە اقشا اكەتكەن.
جاقىندا رەسەي ىشكى ءىستەر مينيسترلىگىنىڭ تەرگەۋ دەپارتامەنتى «دەلو» ليزينگىلىك كومپانياسى يەلەرىنىڭ ءبىرى دميتري پاك پەن كاسىپورىننىڭ باس ديرەكتورى ولەگ تسارەۆكە قاتىستى تەرگەۋدى شەگىنە جەتكىزدى. ماسكەۋدىڭ «كوممەرسانت» گازەتىنىڭ جازۋىنا قاراعاندا, وسى تەرگەۋدىڭ ارقاسىندا بۇل ەكەۋدىڭ ايرىقشا ءىرى كولەمدە الاياقتىق جاساپ, مەملەكەتتىڭ اقشاسىن تالان-تاراجعا سالعاندارى اقي-تاقي ايعاقتالعان كورىنەدى. بۇل تاندەم ءوزارا تىزە قوسا جۇمىس جاساي وتىرىپ, قاعازداعى قانشاما قارجىنى قولما-قول اقشاعا دا اينالدىرىپ ۇلگەرىپتى. تەك بەرەكەسىز تىرلىككە وسى بىلەكتەرىن ءتۇرىپ, بەلسەنە كىرىسكەن وسى ەكەۋدىڭ كۇش سالۋىمەن عانا بتا بانك ليزينگىلىك كومپانياعا ءوزى بەرگەن 70,3 ميلليون دوللار مەن 16 ميلليون رۋبل (506,8 مىڭ دوللار) نەسيەنى تالاپ ەتۋ قۇقىعىنان ايىرىلىپ قالادى.
ءبىر قىزىعى, قازىر قۋعىندا جۇرگەن قازاقستاندىق بانكير مۇحتار ءابىلازوۆتىڭ بۇرىننان اۋىز جالاسقان اعايىنى بولىپ تابىلاتىن دميتري پاك پەن ونىڭ قولبالاسى ولەگ تسارەۆ اقشانى الىپ كەتۋدىڭ بارلىق تاسىلدەرى مەن ايلا-امالدارىن وسى اۋەزەسى جوعارى ارىپتەسىنەن كۇندەلىكتى ساباق الۋ ارقىلى جۇزەگە اسىرعانعا ۇقسايدى. تەرگەۋدىڭ ءبىر بولجامى بويىنشا, 2009 جىلى سول كەزدەگى جەكە مەنشىكتەگى بتا بانكتىڭ ءالى يەسى بولىپ تابىلاتىن ءابىلازوۆ قىزمەتكەرلەرگە ءوزىنىڭ باقىلاۋىنداعى كومپانيانىڭ مەيلىنشە قۇندى اكتيۆتەرىن ءبولىپ شىعارۋدى تاپسىرادى. سوندا بۇلاردىڭ اراسىندا رەسەيدىڭ «دەلو» كومپانياسىنىڭ ونداعان ميلليون دوللار كرەديتى دە سۋدىڭ بەتىنە قالقىپ شىعا كەلەدى. سول ارالىقتا اتالمىش ليزينگىلىك ۇجىم بتا بانكتەن جالپى قۇنى 70 ميلليون دوللاردان اساتىن ۇزىن سانى 70 كرەديت الىپ ۇلگەرگەن ەكەن.
بۇدان ءارى قازاقستاندىق بانكيردىڭ تىكەلەي تاپسىرماسى بويىنشا «التى جالعان كەلىسىم دايىندالادى». ونىڭ ءمانى «دەلونىڭ» وسى قارىزدارىنىڭ ءبارىن جابۋ سىرتتاعى باسقا ۇيىمدارعا ءوتكىزىلەدى. بۇعان قوسا, بانكتىڭ زايمشىنىڭ اتىنا بۇل وپەراتسيانى ماقۇلداعان كەپىلدەمەسى دە ءجىبەرىلەدى. اسپانداعى اقشانىڭ اۋاعا ۇشىپ, بۋعا اينالىپ, جوق بولىپ كەتۋىنە قۇرالعان بۇل سىزبانى بۇدان دا ءارى شاتاستىرا, كۇردەلەندىرە ءتۇسۋ ءۇشىن ونى ويلاپ تابۋشىلار (نەگىزىنەن م.ءابىلازوۆ دەپ ءتۇسىنىڭىز – ر.ي.) قارىزدى ءبىر-بىرىنە كەزەكپە-كەزەك جولمەن وتكىزىلەتىن جۇيەسىن جاساپ, بىرنەشە وفشورلىق كومپانيانى قاتارعا تارتادى. ناتيجەسىندە كرەديتتەر بويىنشا بارلىق تولەمدەردى الاتىن ريگاداعى «بالتيكۋمس» بانكى وسى ماقساتتا ارنايى شوتىن اشىپ بەرگەن كيپردىڭ «كيموس» اتتى كومپانياسى بولىپ شىعادى.
بىراق بۇل قۋلىقتىڭ قۇيرىعى ءبىر-اق تۇتام ەدى. سول 2009 جىلدىڭ وزىندە-اق رەسەي بانكىنىڭ جاڭا باسشىلىعى بتا-دان اقشا ۇرلانعانى جونىندە, سونىڭ ىشىندە «دەلو» جاۋاپكەرشىلىگى شەكتەۋلى قوعامىنا قاتىستى دا تالاپتار بولدى, ارنايى ماسەلە كوتەردى. وسىنىڭ نەگىزىندە بۇل ماسەلە توڭىرەگىندە بىرنەشە قىلمىستىق ءىس قوزعالدى. سول بويدا ماناعى دميتري پاك قاماۋعا الىندى. بىراق كەپىلدىگىن تولەگەننەن كەيىن تۇتقىننان بوساتىلدى. ال ولەگ تسارەۆ 2012 جىلى ۇستالدى. قازىر ول ءۇي قاماقتا وتىر. ال تەرگەۋ ناتيجەلەرى وسىدان بىرەر كۇن عانا بۇرىن ايىپتاۋ قورىتىندىسىن بەكىتۋ ءۇشىن پروكۋراتۋراعا وتكىزىلىپتى. بۇل تۇستا پاك ءوزىنىڭ ايىبىن مويىنداي قويماپتى. مۇنىڭ ەسەسىنە جاندايشابى ءبىراز نارسەنى موينىنا العان سياقتى.
بۇل ءىس ءبىر جاعىنان ايراندى بىرەۋدىڭ ءىشىپ, شەلەكتى ەكىنشى بىرەۋلەردىڭ جالاعانىنا ۇقسايدى. بىرەۋلەردىڭ قولىمەن وسىلاي وت كوسەپ, قىمقىرىلعان اقشانىڭ باسىم بولىگىن قالتاسىنا باسىپ كەتكەن مۇحتار ءابىلازوۆتىڭ بۇل تىرلىگى ونىڭ جەكە باسىنىڭ مۇددەسى ءۇشىن ەشكىمدى دە ايامايتىنىن تاعى دا بايقاتىپ بەرەدى.
قازاقتا «ەكى قۋ نامازدىگەر مەن نامازشامدا جولىعادى» دەگەن ءسوز بار. تەگىندە, بۇلاردىڭ ميلليوننىڭ ىشىنەن ءبىرىن-ءبىرى تاۋىپ الىپ جۇرگەندەرى دە بەكەر ەمەس قوي. پىسپەكتىڭ دە كۇبىسىنە قاراي سايلانىپ كەلەتىنى دە راس-اۋ.
رۋسلان يگىلىك.
