الەۋمەتتىك سەزىمتال ازاماتتار ءۇشىن تۇرعىن ءۇي بەرۋ تەتىكتەرىن جەتىلدىرۋ, وسى پروتسەستىڭ اشىقتىعىن قامتاماسىز ەتۋ, زاڭ بۇزۋشىلىقتاردى بولدىرماۋ, سونداي-اق ازاماتتاردىڭ اقپاراتقا قولجەتىمدىلىگىن قامتاماسىز ەتۋ ماقساتىندا بيىلعى جىلدىڭ سوڭىنا دەيىن كەزەكتەگىلەردىڭ بىرىڭعاي ەلەكتروندى بازاسى قۇرىلادى.
«بۇل دەرەكتەر بازاسى بۇكىل ەل ءۇشىن بىرىڭعاي بولادى. ءبىزدىڭ ازاماتتارىمىزدىڭ ەلىمىزدىڭ ءتۇرلى قالالارىندا كەزەكتە تۇرعانى جاسىرىن ەمەس, بۇل جاڭىلىستىرادى, «ەگىزدەرى» پايدا بولادى. اركەلكىلىك بار, سودان دا دەرەكتەردىڭ سايكەسسىزدىگى تۋىندايدى. ادام تۇرعىلىقتى جەرىن اۋىستىرادى, ونىڭ الەۋمەتتىك ستاتۋسى وزگەرەدى. ماسەلەن, ونىڭ ەندى بۇل كەزەكتە تۇرۋعا قۇقىعى جوق دەلىك, بىراق ول سوندا قالا بەرەدى. بىرىڭعاي دەرەكتەر بازاسىن قۇرۋ وسىنداي جاعدايلاردى بولدىرمايدى», — دەدى مينيستر.
بۇل ازاماتتارعا ءوزىنىڭ كەزەگىن ونلاين رەجيمدە باقىلاۋعا مۇمكىندىك بەرەدى.
اكىمدىكتەردىڭ مالىمەتتەرى بويىنشا, بيىلعى جىلدىڭ ءى توقسانىندا كەزەكتە تۇرعانداردىڭ بارلىق سانى 496 مىڭ ادامنان استى. 2017 جىلى جەلتوقساندا ينۆەنتاريزاتسيا جۇرگىزۋ ماقساتىندا «كەزەكتەگىلەردىڭ بىرىڭعاي رەسپۋبليكالىق بازاسى» سەرۆيستىك باعدارلامالىق ءونىم جاسالدى, ول 2018 جىلى كەزەكتەن 30 مىڭعا جۋىق ادامدى الىپ تاستاۋعا مۇمكىندىك بەردى.
قر يدم اقپاراتىنا سايكەس, از قامتىلعان ازاماتتار مەن جۇمىس ىستەيتىن جاستاردى تۇرعىن ۇيمەن قامتاماسىز ەتۋ ماقساتىندا «نۇرلى جەر» باعدارلاماسى اياسىندا قارجىلاندىرۋ قاراستىرىلعان. رەسپۋبليكالىق بيۋدجەتتەن جىلىنا 50 ملرد تەڭگە نەمەسە 7 جىل بويى 350 ملرد تەڭگە ءبولۋ كوزدەلگەن. جىل سايىن تۇرعىن ۇيمەن 6 مىڭ كوپ بالالى وتباسى قامتىلاتىن بولادى. بيىل مامىر ايىنان بەرى 1480 كوپ بالالى وتباسىعا تۇرعىن ءۇي بەرىلدى.
