اقشا جاساۋشىلار سوتتالدى
جۇما, 19 ءساۋىر 2013 0:31
ەلىمىزدەگى مۇنايلى ايماق سانالاتىن اتىراۋ وبلىسىندا كاسىپتىڭ جاڭا ءتۇرىن مەڭگەرگەن, الۋان ءتۇرلى ەلدەردىڭ ۆاليۋتاسىن جاساي بەرەتىن «ماماندار» دا شىعىپ جاتىر. قىلمىستىڭ مۇنداي اۋىر ءتۇرىن كاسىپ ەتكەن توپ مۇشەلەرى كۇنى كەشە عانا سوت جۇزىندە جازالارىن الدى.
جۇما, 19 ءساۋىر 2013 0:31
ەلىمىزدەگى مۇنايلى ايماق سانالاتىن اتىراۋ وبلىسىندا كاسىپتىڭ جاڭا ءتۇرىن مەڭگەرگەن, الۋان ءتۇرلى ەلدەردىڭ ۆاليۋتاسىن جاساي بەرەتىن «ماماندار» دا شىعىپ جاتىر. قىلمىستىڭ مۇنداي اۋىر ءتۇرىن كاسىپ ەتكەن توپ مۇشەلەرى كۇنى كەشە عانا سوت جۇزىندە جازالارىن الدى.
شىنى كەرەك, وبلىس قارجى پوليتسياسى دەرەگىن ءبىلىپ, مەكەنىن تاۋىپ, قىلمىستىق توپتى قولعا تۇسىرگەنشە, جايىقتىڭ جاعاسىن جايلاعان جۇرت ورتالارىندا وسىنداي ويلىلاردىڭ جۇرگەندەرىن ونشالىقتى بىلە قويماپتى.
اتىراۋلىق اقشا جاساعىش توپ بەس ادامنان قۇرالعان ەكەن. ولار اقش-تىڭ دوللارىنان باستاپ, ءوزىمىزدىڭ تەڭگەگە دەيىن دايىنداۋدى كادىمگىدەي ۇيرەنىپ العانعا ۇقسايدى. تۋرا «مالينوۆكاداعى ۇيلەنۋ تويى» دەپ اتالاتىن كەڭەستىك ەسكى ءبىر فيلمدەگى پاپاندوپۋلو سەكىلدى, بۇلار دا كەزىندە ءارتۇرلى ۆاليۋتالاردى زۋىلداتىپ سالىپ شىعارا بەرگەن.
اتىراۋدىڭ اقشاگەرلەرى نەگىزىنەن 100 اقش دوللارلارىن جاساۋعا ماماندانعان كورىنەدى. ال توتەننەن بارعان تەكسەرۋ كەزىندە ولار ۇيىمداستىرعان استىرتىن تسەحتان HEIDELBERG GTO ماركالى باسپا ستانوگى تابىلعان. ونىڭ جانىندا بانكنوت جاساۋعا كەرەكتى بوياۋلار, ارنايى قاعازى, فوتو شىعارۋ قۇرالى قولعا تۇسكەن. سونىمەن بىرگە, جالپى سوماسى 244 300 اقش دوللارىن قۇرايتىن 100 تسيفرلى كەسىلگەن كۋپيۋرالار الىنعان. بۇلاردان باسقا, ءالى كەسىلمەگەن, جالپى سوماسى 293 600 اقش دوللارى بولاتىن كۋپيۋرالار تۇرعان. تەكسەرۋ بارىسىندا توپتىڭ مۇشەلەرىنىڭ اتىراۋ وبلىسى اۋماعىندا 2000, 5000 جانە 10000 تەڭگەلىك جالعان اقشالاي بەلگىلەرىن جاساپ, ساتقانى دا انىقتالعان.
اتالمىش قىلمىستىق ءىستى قاراعان سوت توپتىڭ جەتەكشىسى ەرعاليەۆكە 13 جىلعا بەرسە, توپ مۇشەلەرى شامشيدەنوۆتى – 12 جىلعا, ا.ايمۇراتوۆ پەن ە.ورىنباساروۆتى 9 جىلدان باس بوستاندىقتارىنان ايىردى. سول سياقتى, ابۋعاليەۆ ەسىمدى تاعى ءبىر ازامات شارتتى تۇردە 5 جىلعا باس بوستاندىعىنان ايىرۋعا كەسىلدى.
جولداسبەك شوپەعۇل,
«ەگەمەن قازاقستان».
اتىراۋ قالاسى.
