ايماقتار • 01 شىلدە، 2019

ەرجان سالعان ءان قانداي!

194 رەت كورسەتىلدى

نەبارى 12 جاستا ەلوردا تورىندە جەكە شىعارماشىلىق كەشىن وتكىزۋ كەز كەلگەن بالدىرعان ءۇشىن تەك ەرتەگىلەردە عانا بولاتىن قيال-عاجايىپتاي كورىنۋى زاڭدىلىق. بىراق شىن ارمانداپ، سول جولدا ايانباي ەڭبەك ەتە بىلگەن تالانت ءتۇبى تاس جارادى. ونەرلى ورەن ەرجان ماكسيمنىڭ ءان الەمىندەگى تەڭدەسسىز جەتىستىگى سونىڭ دالەلى.

وتكەن جۇمادا باس قالاداعى ەڭ ۇلكەن ساحنالاردىڭ ءبىرى – ورتالىق «قازاقستان» كونتسەرت زالىندا جاس تالانت، رەسەيلىك «گولوس. دەتي» جوباسىنىڭ جەڭىمپازى ەرجان ماكسيم ءوزىنىڭ العاشقى شىعارماشىلىق كەشىن زور تابىسپەن وتكىزدى. زالعا ينە شانشار ورىن قالدىرماي جينالعان حالىقتىڭ ىستىق ىقىلاسىنان-اق كونتسەرتتىڭ كوپشىلىك كوڭىلىنەن شىققانىن بايقاۋعا بولادى.

بۇل كەشكە ەرجان ۋاقىت از بولسا دا، بارىنشا تىڭعىلىقتى دايىندالىپتى. سيمفونيالىق وركەستردىڭ جانە بەلگىلى كومپوزيتورلار – ۇلىقپان جولداسوۆ پەن رينات گايسيننىڭ سۇيەمەلدەۋىندە ورىندالعان ەرجاننىڭ جەكەلەي جانە ساكەن مايعازيەۆ، ايقىن تولەپبەرگەن، ءمولدىر اۋەلبەكوۆا باستاعان ەسترادا انشىلەرىمەن دۋەت بولىپ قوسىلا شىرقاعان اندەرى ماۋسىمنىڭ مامىراجاي كەشىن شىن مانىندە ونەردىڭ ۇلكەن دۋمانىنا اينالدىرىپ جىبەرگەندەي. استانا اسپانى جاس تالانتتىڭ انىمەن بىرگە تەربەلە تولقىپ، بۇلتتار بيلەپ كەتكەندەي اسەر سىيلاعانىن ونەردى ءتۇسىنىپ، ءان اسەمدىگى مەن ورىنداۋ شەبەرلىگىن باعالاي بىلەتىن كەز كەلگەن تىڭدارمان جوققا شىعارمايدى دەپ ويلايمىز.

وتاندىق بەلگىلى ديزاينەر قايروللا ابىشەۆتىڭ وسى كەش ءۇشىن ارنايى تىككەن ۇلتتىق ناقىشتاعى التىن تۇستەس اۆتورلىق كيىمىمەن كەش شىمىلدىعىن تۇرگەن ءدۇلدۇل دارىن ەكى ساعاتقا سوزىلعان كون­تسەرتتى ۇلكەن شوۋعا اينالدىردى. كەشتە ەرجان رەسەيلىك «گولوس. دەتي» جوباسىندا شىرقاعان ءان­دە­رىنەن بولەك، ارىستانبەك مۇحا­مەدي ۇلىنىڭ «جاينا، ەلوردا»، رينات گايسيننىڭ «تۋعان ولكەم» تۋىندىلارىن كەمەلىنە كەلتىرە ورىندادى. سونداي-اق ءانشىنىڭ رەپەرتۋارىنداعى ورىس، اعىلشىن، يتاليان تىلدەرىندە شىرقالعان اندەر دە كونتسەرتكە جينالعان تىڭدارمان كوڭىلىنەن شىعىپ، كەش سوڭىندا ەرجانعا تولاسسىز قوشەمەت كورسەتىلدى. ءبۇ­گىندە اتاعى ەلدەن اسىپ، تانى­مالدىلىعى تورتكۇل دۇنيەگە تاراپ ۇلگەرگەن دارىننىڭ قاي­تالانباس قۋاتتى ءۇنى ونىڭ تالانت قارىمىن حالىق الدىندا تاعى ءبىر مارتە ايگىلەگەندەي. شىمىلدىق جابىلعان سوڭ دا زالدان ۇزاق ۋاقىت ۇزىلمەي ەستىلىپ تۇرعان كوپ­شىلىكتىڭ ىستىق قوشەمەتى مەن شا­پالاق ءۇنى تەك ەرجانعا ەمەس، كۇللى قازاق ونەرىنە كورسەتىلگەن قۇرمەت پەن ىقىلاس ەدى...

سوڭعى جاڭالىقتار

تمد ءسامميتى قازان ايىندا وتەدى

پرەزيدەنت • بۇگىن، 19:56

ۇقساس جاڭالىقتار