«ءتارتىپ ساقشىلارى جەرگىلىكتى تۇرعىندارعا مالدارى جوعالىپ, ولگەن جاعدايدا قايدا بارۋ كەرەكتىگىن ءتۇسىندىرىپ, كەڭەس بەرەدى جانە پاتەر, تۇرعىن ۇيدەن بولعان ۇرلىقتار, اۆتوكولىكتەردى ايداپ كەتۋ جايتتارى بويىنشا دەرەكتەرىن تىركەپ, ارىزدارىن قابىلداۋدا. ازاماتتارعا ىڭعايلى بولۋ ءۇشىن ءموبيلدى حقو ۇيىمداستىرىلدى. اۋدان ورتالىعىنداعى 17 سەكتوردىڭ ارقايسىسىندا تۇركىستان وبلىسى پوليتسيا دەپارتامەنتىنىڭ قىزمەتكەرلەرىنەن قۇرىلعان ەكى جەدەل-تەرگەۋ توبى جۇمىس جاساۋدا» دەلىنگەن xابارلامادا.
جارىلىستان كەيىنگى تاۋلىكتەردە پوليتسەيلەر جۇرگىزگەن رەيدتىك شارالار بارىسىندا 4 قىلمىس انىقتالدى. ونىڭ ىشىندەگى ەكەۋى مال ۇرلىعىنا قاتىستى. سونداي-اق «نيۆا» اۆتوكولىگىن ۇرلاۋ ماقساتىندا ايداپ اكەتۋ جانە تۇرمىستىق تەحنيكا دۇكەنىندەگى ۇرلىق دەرەكتەرى تىركەلدى. بۇگىنگى تاڭدا بارلىق ماتەريالدار بويىنشا سوتقا دەيىنگى تەرگەپ-تەكسەرۋ شارالارى جۇرگىزىلۋدە.
«24-28 ماۋسىم كۇندەرى ارالىعىندا ءتارتىپ ساقشىلارى 155 يەسىز قوي مەن 22 ءىرى قارا مالدى تاۋىپ, پوليتسيا ءبولىمىنىڭ جانىنان ارنايى ۇيىمداستىرىلعان ورىنعا اپارعان. ارىس قالاسىنا جەرگىلىكتى تۇرعىنداردىڭ كەلۋىنە وراي بارلىق مالدار زاڭدى يەلەرىنە قايتارىلدى» دەلىنگەن پوليتسيا دەپارتامەنتىنىڭ مالىمەتىندە.
