كىمنەن جاسىرىنادى؟
سارسەنبى, 27 ناۋرىز 2013 1:10
وبلىس ورتالىعىندا وبلىستىق پروكۋراتۋراعا ارنالعان جاڭا عيمارات بوي كوتەردى. لەزدە اينالاسىنا تەمىر قورشاۋ ءبىتتى. بۇرىنعى عيماراتى قورشاۋسىز, ارىزدانۋشىلارعا ەسىك اشىق بولاتىن. سوندا ءتىپتى بۇرىنعى وبلىس پروكۋرورى, قازىر ەلىمىزدىڭ باس پروكۋرورىنىڭ ورىنباسارى نۇرماحان يساەۆ ءبىر ايدىڭ وزىندە ەكى-ءۇش رەتتەن باسپاسوز وكىلدەرىمەن كەزدەسىپ, جۋرناليستەردىڭ سۇراقتارىنا جاۋاپ بەرەتىن. قابىلداۋىنا بارۋ كەرەك بولسا دا ۇنەمى ەسىك اشىق ەدى.
سارسەنبى, 27 ناۋرىز 2013 1:10
وبلىس ورتالىعىندا وبلىستىق پروكۋراتۋراعا ارنالعان جاڭا عيمارات بوي كوتەردى. لەزدە اينالاسىنا تەمىر قورشاۋ ءبىتتى. بۇرىنعى عيماراتى قورشاۋسىز, ارىزدانۋشىلارعا ەسىك اشىق بولاتىن. سوندا ءتىپتى بۇرىنعى وبلىس پروكۋرورى, قازىر ەلىمىزدىڭ باس پروكۋرورىنىڭ ورىنباسارى نۇرماحان يساەۆ ءبىر ايدىڭ وزىندە ەكى-ءۇش رەتتەن باسپاسوز وكىلدەرىمەن كەزدەسىپ, جۋرناليستەردىڭ سۇراقتارىنا جاۋاپ بەرەتىن. قابىلداۋىنا بارۋ كەرەك بولسا دا ۇنەمى ەسىك اشىق ەدى. سول سياقتى قازىرگى وڭتۇستىك قازاقستان وبلىسىنىڭ پروكۋرورى, «ەگەمەننىڭ» تۇراقتى وقىرمانى يبراگيم يمانوۆ ءبىزدىڭ وبلىستا پروكۋروردىڭ ورىنباسارى قىزمەتىن اتقارعان كەزدە دە ۇنەمى حابارلاسىپ, سۇراقتارىمىزعا جاۋاپ الاتىنبىز. وبلىستا پروكۋرور بولعان حاكىم كوشقاليەۆ, مۇرات احمەتجانوۆتار دا اشىقتىق, جاريالىلىق قاعيداتىن ۇستاندى.
ال ەندى قازىرگى وبلىس پروكۋرورى داستان سارتاەۆ جايلى جۋرناليستەر وعان «كورىنبەيتىن ادام» («چەلوۆەك نەۆيديمكا») دەپ ەرىكسىز ات قويىپ الدى. ءتىپتى, جاڭادان تاعايىندالعان ورىنباسارلارى دا «كورىنبەيتىندەر» قاتارىندا سياقتى. عيماراتتىڭ شەتكى بۇرىشىندا پروكۋرورلاردى «كۇزەتەتىن» كۇزەت بولمەسى ورنالاسقان. قاراپايىم حالىق وسى جەردەن كەرى قايتادى. عيمارات سوندا پروكۋرورلار ءۇشىن عانا سالىنعان با؟ نەگە حالىقتان بولەكتەنەدى؟ بولمە ءىشىنە وبلىس پروكۋرورى داستان سارتاەۆتىڭ, ورىنباسارلارى قۋات ارتىقباەۆ, بەرىك قۇلتاسوۆتىڭ قابىلداۋ كۇندەرى جازىلىپ تۇرعان تاقتايشا ءىلىنىپتى. ءبىز كەزدەسكەن ەكى-ءۇش ادام قابىلداۋ كۇندەرىنە جازىلعانىمەن, ماسەلەلەرىنىڭ ءمان-جايىن جەتكىزە الماي ءجۇرگەندەرىن ايتتى. سول جەردەن ءبىز دە وبلىس پروكۋرورىنىڭ ءباسپاسوز حاتشىسى ايىمگۇل دەگەن قىزعا تەلەفون شالىپ: «ىشكە جىبەرۋگە بولماسا, ءوزىڭىز كەلىپ كەتىڭىزشى, قولىمىزداعى حاتتى بەرەيىك», – دەپ ەدىك. – «جو… جوق! ماعان دالاعا شىعۋعا بولمايدى! ءسىز تۇرعان جەرگە مەن بارا المايمىن!» – دەدى سول جەردەگى بايلانىس تەلەفون ارقىلى. اڭ-تاڭبىز.
ەلباسى قاراپايىم حالىققا اشىق بولىڭدار, ارىز-شاعىمدارىن تىڭداڭدار, قابىلداڭدار دەپ ۇنەمى ايتادى. وبلىستاعى باسقا قۇقىق قورعاۋ ورىندارىنىڭ, ءتىپتى اكىمدىكتەردىڭ دە ەسىكتەرى اشىق. ەلىمىز تىنىش, جۇرتىمىز امان. سوندا بۇل پروكۋرورلار حالىق اراسىنا شىعىپ, مۇڭ-مۇقتاجىن تىڭداپ, ارىزدانىپ كەلگەندەردىڭ ۇنىنە قۇلاق تۇرمەسە, نە ىستەيدى؟ كىمنەن ىعادى؟
فاريدا بىقاي,
«ەگەمەن قازاقستان».
پاۆلودار.
