ۇيىققا باتقان ۇرى
جۇما, 15 ناۋرىز 2013 1:15
قازاقستاننىڭ قۇقىق قورعاۋ ورگاندارى ەلىمىزدە باسشىلىق قىزمەت تىزگىنىن ۇستاپ تۇرعان كەزدەرىندە سىبايلاس جەمقورلىق سيپاتىنداعى قىلمىستار جاساعان اتىشۋلى ۆيكتور حراپۋنوۆ پەن باسقا دا وسىنداي تۇلعالارعا قاتىستى قىلمىستىق ىستەردى تەرگەۋدى ودان ءارى جالعاستىرىپ جاتىر. مۇنى كەشە باس پروكۋراتۋرانىڭ ءباسپاسوز قىزمەتى تاعى دا ءمالىم ەتتى.
جۇما, 15 ناۋرىز 2013 1:15
قازاقستاننىڭ قۇقىق قورعاۋ ورگاندارى ەلىمىزدە باسشىلىق قىزمەت تىزگىنىن ۇستاپ تۇرعان كەزدەرىندە سىبايلاس جەمقورلىق سيپاتىنداعى قىلمىستار جاساعان اتىشۋلى ۆيكتور حراپۋنوۆ پەن باسقا دا وسىنداي تۇلعالارعا قاتىستى قىلمىستىق ىستەردى تەرگەۋدى ودان ءارى جالعاستىرىپ جاتىر. مۇنى كەشە باس پروكۋراتۋرانىڭ ءباسپاسوز قىزمەتى تاعى دا ءمالىم ەتتى.
بۇقارالىق اقپارات قۇرالدارىنىڭ وكىلدەرىمەن وتكىزىلگەن بۇل بريفينگتە ايتىلىپ وتىرعان ايىپتالۋشىلاردىڭ زاڭسىز العان شەتەلدىك اكتيۆتەرىن انىقتاۋ جانە يەلىك ەتۋگە تىيىم سالۋ ماقساتىندا باس پروكۋراتۋرانىڭ شۆەيتساريانىڭ قۇزىرلى ورگاندارىنا حالىقارالىق تەرگەۋ تاپسىرماسىن جىبەرگەنى تىلگە تيەك ەتىلدى. جيىندا وسىنىڭ نەگىزىندە قازىرگى تاڭدا جەنەۆا كانتونى پروكۋراتۋراسىنىڭ ءتيىستى تەرگەۋدى جۇرگىزىپ جاتقانى ايتىلدى. مىنە, وسى شارانىڭ شەڭبەرىندە ۆ. حراپۋنوۆتىڭ شۆەيتساريالىق بانكتەردەگى شوتتارىنا 2012 جىلعى 22 قاراشادا يەلىك ەتۋگە تىيىم دا سالىندى.
شۆەيتساريا پروكۋرورلارى كەزىندە الماتى قالاسىن بيلەپ تۇرعان شاعىندا «ءۇرىپ ءىشىپ, شايقاپ توككەنىمەن» قويماي, ەلدىڭ قىرۋار بايلىعىن ۇرلىق جولىمەن شەتەلگە اسىرىپ ۇلگەرگەن «ميلليونەردىڭ» ءىسىن اقىرىنا دەيىن اپارۋعا مۇددەلى بولىپ وتىرعان قالىپ تانىتادى. ولار ەرلى-زايىپتى ۆيكتور جانە ءلايلا حراپۋنوۆتاردىڭ شوتتارىن جاۋىپ قانا قويا سالماي, ولاردىڭ اقشا جىمقىرعانى جونىندەگى دەرەكتەرىن دە مۇقيات تەكسەرىپ جاتىر. البەتتە, حراپۋنوۆ مىرزا بولسا, وزىنە تاعىلعان ايىپتىڭ ءبارىن ءالى كۇنگە دەيىن قولىنان كەلگەنىنشە جوققا شىعارۋعا تىرىسىپ باعۋدا. ايتالىق, ءوز سوزىنە قاراعاندا, ونىڭ بايلىعى تىم اسىرا كورسەتىلگەن كورىنەدى. الماتىنىڭ بۇرىنعى اكىمى وسى جەردە وزىندە زاۋىت تا, كەمە دە جوق دەگەندى ايتىپ, قارعانىپ قويادى. ول سونىمەن قاتار, قىزىنىڭ اتىنداعى ۆيللانىڭ دا نەسيەگە (!) الىنعانىن ايتىپ, الدەكىمدەردى يلاندىرعىسى-اق كەلەدى. بىراق وعان سەنە قوياتىن اقىماق ازىرگە كورىنبەيدى.
بۇگىندە وتىرىك ايتۋدان ەرتەدەگى تازشا بالانىڭ ءوزىن جارتى جولدا قالدىرىپ كەتەتىنى بەلگىلى بولعان حراپۋنوۆتىڭ مۇنداي ءمانى قاشقان «ءالاۋلايلارىنا» قازىر شۆەيتساريانىڭ مەرزىمدى باسىلىمدارى دا سەنبەي وتىر. الپى تاۋىنىڭ تەرىسكەي بەتىن الىپ جاتقان ەلدىڭ بۇقارالىق اقپارات قۇرالدارى بۇگىندەرى ونسىز شىقپايتىن بولىپتى. مۇنداعى گازەتتەردىڭ بارلىعى دەرلىك ۆيكتور ۆياچەسلاۆوۆيچ تۋرالى كۇنىنە ءبىر رەت ءلام ايتىپ ءوتۋدى وزدەرىنىڭ پارىزى ساناپ العان سياقتى. ولاردا وڭدى-سولدى سۇحبات بەرۋگە دە توسەلىپ قالعان ونىڭ سوزدەرىنە گازەت تىلشىلەرى دە, وقىرمان قاۋىم دا ميىعىنان ك ۇلىپ قارايتىن كۇنگە جەتكەن. سەبەبى, «وتىرىكشىنىڭ قۇيرىعى ءبىر-اق تۇتام» ەكەنىن مۇنداعىلار دا سەزىپ ءجۇر. ايتقان ءۋاجى مەن ىستەگەن تىرلىگى ۇيلەسە قويمايتىن ەكس-اكىمنىڭ سوزدەرى كىل جالعاندىقتىڭ جىلعاسىنان سۋ ۇرتتاپ شىققانىن تەك بۇل ەلدەگىلەر عانا ەمەس, بۇگىندە كۇللى الەم ءبىلىپ قالعان سىڭايى بار.
وتىرىكتى شىنداي, شىندى قۇداي ۇرعانداي ەتىپ ايتاتىن ۆيكتور حراپۋنوۆتىڭ «تىم تازا ەمەس» ەكەنىن وسىنداعى فرانتسۋز ءتىلدى «لياگەفي» باسىلىمى وتكەن كۇزدەن بەرى ءبىر ەمەس, بىرنەشە رەت اشكەرەلەپ ۇلگەردى. مۇنى ىلە-شالا جەنەۆانىڭ رتس دەپ اتالاتىن تەلەارناسى قاعىپ الىپ كەتتى. ونداعى جۋرناليستەردىڭ مالىمەتى بويىنشا, حراپۋنوۆ ايەلىمەن ەكەۋى قازاقستاننان لاس جولمەن الىنعان اقشالاردى جىمقىرىپ كەتكەندەرى ءۇشىن ايىپتالۋدا. شۆەيتساريا تەلەشولۋشىلارىنىڭ قولدارىنا سونداي-اق قازاقستان بيلىگىنىڭ تاپسىرىسى دا تۇسكەنگە ۇقسايدى. وندا ءبىر كەزدەردە حراپۋنوۆتاردىڭ ورتاق وتباسى رەتىندە وراسان زور كولەمدەگى بايلىقتى قولدارىنا جيىپ العاندارى ايتىلادى. تەلەارنا سيۋجەتىندە ۆيكتور ۆياچەسلاۆوۆيچتىڭ اكىم رەتىندە ايەلىنىڭ الماتىدان 336 مىڭ فرانككە بالالار باقشاسى ءۇيىن ساتىپ الۋىنا, سوسىن ونى 13 ميلليون فرانككە قايتا ساتۋىنا جاردەم بەرگەنى ءسوز بولادى. البەتتە, ءبىزدىڭ كەيىپكەرىمىز مۇنى دا جوققا شىعارۋعا تىرىسىپ باقتى. سول كەزدە تىلشىلەر قىزى ەلۆيرا حراپۋنوۆانىڭ 32 ميلليون فرانككە ساتىپ الىنعان كەرەمەت ۆيللاسىن العا شىعارا قويدى. ەگەر اۋلەتتە 300 ملن. فرانك كولەمىندە بايلىق بولماسا, مۇنداي عاجايىپ جايدى ساتىپ الۋعا ولاردىڭ قالاي شاماسى جەتكەن؟ ءجۋرناليستىڭ بۇل سۇراعى دا ناقتى جاۋاپسىز قالعان.
قازاقتا وسىنداي كەزدە ايتىلاتىن «جەڭىلگەن ادامنىڭ ءسوزى قۇرىسىن», دەگەن ءسوز بار. سول گاپ قازىر ۆيكتور حراپۋنوۆتىڭ باسىنا كەلىپ وتىر. ول قازاقستان قۇقىق قورعاۋ ورگاندارىنان دا, شۆەيتساريا ادىلەت جۇيەسىنەن دە جەڭىلىپ بولدى. ونىڭ ەندىگى كۇنى «سۋعا كەتكەن تال قارمايدىنىڭ» كەرى. ال ءوزى تۇسكەن سول سۋدىڭ يىرىمىنەن ونىڭ شىعا قويۋى ەندى ەكىتالاي. جارتى الەمدى شۋلاتقان حراپۋنوۆتىڭ كەسكىنى قازىر ۇيىققا باتقان ۇرىنىڭ كەيپىن كەلتىرەدى. دەمەك, ونىڭ زاڭ جۇزىندە جازا الاتىن شاعىنا دا تىم قاشىق قالعان جوق.
رۋسلان يگىلىك.
