اراق ءىشىپ الجاسقاندار
بەيسەنبى, 7 ناۋرىز 2013 7:14
سۋديالىق قىزمەتتە جۇرگەنىمە 17 جىلداي ۋاقىت بولدى. وسى جىلداردا ىشىمدىك ءىشىپ الىپ نەمەسە ناشاقورلىقتىڭ اسەرىنەن قىلمىس جاساعان ادامداردىڭ ءىسىن كوپ قارادىم. سول قىلمىستىق ىستەردى سارالاپ وتىرسام, اراق ىشەتىن ازاماتتار ءۇشىن ونىڭ قاۋپى ەسىرتكىنىڭ كەساپاتىنان الىس ەمەس ەكەن. «اراق تەك قۇمىرانىڭ ىشىنە عانا سيادى» – دەگەن ءسوزدىڭ ومىردەن الىنعانىنا كوز جەتتى. جايشىلىقتا قويدان جۋاس ازاماتتاردىڭ ىشىمدىك ءىشىپ العاننان كەيىن مۇلدەم وزگەرىپ شىعا كەلەتىنىن قايتەرسىڭ. قىلمىس جاساپ بۇلدىرگەن سوڭ, ەرتەڭىنە سوتتا «نەگە عانا ءىشتىم وسى ءپالەنى؟» دەپ بارماعىن ءتىستەگەندەر قانشاما.
بەيسەنبى, 7 ناۋرىز 2013 7:14
سۋديالىق قىزمەتتە جۇرگەنىمە 17 جىلداي ۋاقىت بولدى. وسى جىلداردا ىشىمدىك ءىشىپ الىپ نەمەسە ناشاقورلىقتىڭ اسەرىنەن قىلمىس جاساعان ادامداردىڭ ءىسىن كوپ قارادىم. سول قىلمىستىق ىستەردى سارالاپ وتىرسام, اراق ىشەتىن ازاماتتار ءۇشىن ونىڭ قاۋپى ەسىرتكىنىڭ كەساپاتىنان الىس ەمەس ەكەن. «اراق تەك قۇمىرانىڭ ىشىنە عانا سيادى» – دەگەن ءسوزدىڭ ومىردەن الىنعانىنا كوز جەتتى. جايشىلىقتا قويدان جۋاس ازاماتتاردىڭ ىشىمدىك ءىشىپ العاننان كەيىن مۇلدەم وزگەرىپ شىعا كەلەتىنىن قايتەرسىڭ. قىلمىس جاساپ بۇلدىرگەن سوڭ, ەرتەڭىنە سوتتا «نەگە عانا ءىشتىم وسى ءپالەنى؟» دەپ بارماعىن ءتىستەگەندەر قانشاما. وكىنىشكە وراي, ءىشىمدىكتەن كەيىن ءوزىن-ءوزى دۇرىس ۇستاي الماعاندار, تەك وزدەرىنىڭ عانا تاعدىرىن بالتالاماي وزگە جانداردى دا جىلاتاتىنى تاعى انىق.
الماتى وبلىسى, الاكول № 2 اۋداندىق سوتى بىلتىرعى جىلى ا.مۇرزاباەۆقا قاتىستى قك-ءنىڭ 103-بابى, 3-تارماعىمەن تاعايىندالعان قىلمىستىق ءىستى قارادى. سوت تەرگەۋىندە انىقتالعانداي, ا.مۇرزاباەۆ 2011 جىلدىڭ قازان ايىنىڭ 29-نان 30-نا قاراعان ءتۇنى ساعات 23:30 شاماسىندا اراق ءىشىپ ماس كۇيىندە الاكول اۋدانىنا قاراستى توقجايلاۋ اۋىلىنىڭ تۇرعىنى د.وماروۆپەن, پ.شاكاريموۆپەن بىرگە, وسى اۋىلدىڭ كۋيبىشەۆ كوشەسى №18 ءۇي تۇرعىنى ن.ايتقۇلوۆتىڭ ۇيىنە بارىپ, وزدەرىمەن الىپ كەلگەن ءبىر ءشولمەك اراقتى ءىشىپ وتىرعان كەزدە پ.شاكاريموۆ ۇيدەن شىعىپ كەتىپ قالعان. ودان كەيىن د.وماروۆ تا دالاعا شىعىپ كەتكەن. سول كەزدە ن.ايتقۇلوۆتىڭ «ۇيدەن كەت» دەگەن سوزىنە شىداماي ا.مۇرزاباەۆ ونىڭ باسىنان جۇدىرىقپەن ۇرعان. سوققىعا شىداماي جەرگە قۇلاعان ن.ايتقۇلوۆتى ونى باسىنان, كەۋدەسىنەن تەپكىلەپ جاتقان كەزدە سىرتتان د.وماروۆ كەلىپ قالىپ اراشالاپ الىپ, ۇيلەرىنە قايتىپ كەتكەن. ن.ايتقۇلوۆ سول دەنە جاراقاتتارىنان 2011 جىلى 2 قاراشادا قايتىس بولعان.
2012 جىلعى 10 قاڭتارداعى سوت-دارىگەرلىك ساراپتامانىڭ قورىتىندىسى بويىنشا جابىرلەنۋشى ن.ايتقۇلوۆتىڭ ءولىمى جابىق ءتۇردە مي سۇيەگى جارىلۋىنان ميىنا قان قۇيىلىپ, ميىنىڭ ىسىنۋىنەن بولعان.
وسى قىلمىسى ءۇشىن ا.مۇرزاباەۆ 8 جىلعا باس بوستاندىعىنان ايىرىلدى. قايتىس بولعان ن.ايتقۇلوۆتىڭ تۋىسقاندارى ءبىر جاقتان جىلاسا, ەكىنشى جاقتان ا.مۇرزاباەۆتىڭ تۋىسقاندارى دا جىلاپ قالدى. ەگەر ا.مۇرزاباەۆ اراق ىشكەننەن كەيىن ءوزىن-ءوزى دۇرىس ۇستاپ, ءىس ارەكەتىنە جاۋاپ بەرە العان بولسا نەمەسە مۇلدەم اراق ىشپەسە وسىنداي قاندى وقيعانىڭ بولماسى انىق ەدى. ول ءوزىنىڭ اكەسىمەن جاستى ادامدى ولتىرمەس ەدى.
ءوز ۇيىندە, ماس كۇيىندە بوتەن بىرەۋدى ەمەس, ءوزىنىڭ تۋعان اكەسىن تاياققا جىعىپ, اۋىر دەنە جاراقاتىن سالىپ, سونىڭ سالدارىنان ونى ءولتىرىپ العان ۆ.گلاديلوۆ دەگەن ازاماتتىڭ ءىسى دە وسى سوتپەن قارالىپ, ءتيىستى شەشىمىن تاپتى. تۋعان اكەسىمەن بىرگە اراق ءىشىپ وتىرىپ سوزگە كەلىپ قالىپ, سونىڭ سالدارىنان اكەسىن ۇرعان. ەرتەسى كۇنى ەسىن جيعاننان كەيىن, ەكى كوزى قان ارالاس جاسقا تولدى. وسى ءىسى ءۇشىن سوتتالىپ كەتكەن ۆ.گلاديلوۆ امان-ەسەن بولسا جازاسىن وتەپ شىعار, بىراق وزەكتى ءورتەگەن وكىنىشتىڭ ۇمىتىلماسى انىق.
وسى ماقالانى جازىپ وتىرعاندا, اكىمشىلىك قۇقىق بۇزۋشىلىق تۋرالى كودەكستىڭ 79-5-بابىنىڭ 1-تارماعىمەن ءىس قارادىم. ءىستىڭ ءمان-جايى بويىنشا ق. ەسىمدى قىز بالا ءوزىنىڭ اكەسىنە قارسى ارىزدانعان. سەبەبى, ول كۇندە اراققا تويىپ كەلىپ, ۇيدەگى ادامداردىڭ ءبارىن بالاعاتتاپ, ەسىك-تەرەزەلەردى سىندىرىپ مازا بەرمەگەن. سوت وتىرىسىندا ءوزىنىڭ قولىن ءوزى كەسە الماعان ق. امالدىڭ جوعىنان اكەسىن كەشىرىپ, وعان ەشقانداي شارا قولدانباۋدى سۇرادى. ال جاسى ەگدە تارتقان قۇقىق بۇزۋشى بولسا, ايتار ءۋاجى جوق اپپاق باسىن تومەن قاراتىپ تۇردى.
باقىتجان نيازوۆ,
الاكول اۋداندىق
№2 سوتىنىڭ توراعاسى.
الماتى وبلىسى.
