بيىل 8 ماماندىق بويىنشا 135 كۋرسانت اسكەري وقۋ ورنىن ءتامامدادى, ولاردىڭ 32-ءسى ۇزدىك ديپلوممەن, ال 3 كۋرسانت «اسكەري وقۋ ورنىن ۇزدىك بىتىرگەنى ءۇشىن» توسبەلگىسىمەن ماراپاتتالدى.
سالتاناتتى شاراعا حالىق قاھارمانى, كوسموناۆت, قازاقستاننىڭ اسكەري-اۋە كۇشتەرىنىڭ گەنەرال-مايورى ايدىن ايىمبەتوۆ, ءماجىلىس دەپۋتاتى باقىتجان سماعۇل, قورعانىس مينيسترلىگىنىڭ باسشىلىعى, قارۋلى كۇشتەرىنىڭ ارداگەرلەرى, اۋەزوۆ اۋداندىق اكىمشىلىگىنىڭ وكىلدەرى جانە بىتىرۋشىلەردىڭ اتا-انالارى مەن جاقىندارى قاتىستى.
جاس وفيتسەرلەر سالتاناتتى مارشپەن ءجۇرىپ ءوتىپ, ماڭگىلىك الاۋعا گۇل شوقتارىن قويدى. قارۋمەن ساپتىق دەفيلە كورسەتكەن سوڭ اسكەري وقۋ ورنىنىنىڭ جاۋىنگەرلىك تۋىمەن قوشتاستى. بىتىرۋشىلەر جۇپتارىمەن قوشتاسۋ ءۆالسىن بيلەپ, كوككە اق كەپتەرلەردى ۇشىردى.
– بۇگىن سىزدەر وفيتسەر پوگونىن تاعىپ, جوعارعى اسكەري وقۋ ورنىن بىتىرگەنى تۋرالى ديپلومعا يە بولدىڭىزدار. ناعىز ەر ازاماتتارعا ءتان ماماندىقتى تاڭداعان سوڭ نامىس تۋىن بيىكتە ۇستاپ, «قازاقستان اسكەرىنىڭ وفيتسەرى» دەگەن جوعارى اتقا لايىق بولاسىزدار دەگەن سەنىمدەمىن, - دەدى رەجباي-ءدىڭ باستىعى گەنەرال-مايور اسقار مۇستابەكوۆ.
جاس لەيتەنانت, التىن مەدال يەگەرى الماز امانتاي ۇلى اسكەريلەر اۋلەتىنەن شىققانىن, سوندىقتان وقۋدا ۇنەمى الدا بولۋعا تىرىسقانىن ايتادى.
– اسكەري ينستيتۋت قابىرعاسىندا بولعان 5 جىلدا ءبىلىم مەن دوستىقتىڭ قادىرىنە جەتتىم. ءبىزدىڭ يىعىمىزعا پوگونمەن قوسا ەلىمىز ءۇشىن جاۋاپكەرشىلىك پەن مىندەت جۇكتەلدى. حالقىمىز بەن ونىڭ پرەزيدەنتى – قارۋلى كۇشتەردىڭ جوعارعى باس قولباسشىنىڭ سەنىمىن اقتايمىز, اقتىق دەمىمىز قالعانشا ادال قىزمەت ەتەمىز, - دەدى ول.
قورعانىس مينيسترلىگىنە قاراستى راديوەلەكترونيكا جانە بايلانىس اسكەري-ينجەنەرلىك ينستيتۋتى ورتا ازيا ايماعى بويىنشا راديوتەحنيكالىق ماماندىقتار بويىنشا مامان دايىندايتىن جالعىز اسكەري وقۋ ورنى بولىپ تابىلادى. جوعارعى اسكەري ينستيتۋت زەنيتتى زىمىراندى, راديوتەحنيكالىق اسكەرلەرى, اسكەرلەر مەن قارۋ-جاراقتى اۆتوماتتاندىرىلعان باسقارۋ جۇيەلەرى ينجەنەرلەرى, بايلانىس اسكەرلەرى, اۆياتسيانى راديوتەحنيكالىق قامتاماسىز ەتۋ ماماندىقتارى ءۇشىن بىلىكتى وفيتسەرلەردى دايارلايدى. ينستيتۋت قۇرىلعالى بەرى (2001 ج. باستاپ) 320 كۋرسانت ۇزدىك ديپلوممەن, ال 30 كۋرسانت «اسكەري وقۋ ورنىن ۇزدىك بىتىرگەنى ءۇشىن» توسبەلگىسىمەن ماراپاتتالعان.
