مانەرلەپ سىرعاناۋشىنىڭ سوچي وليمپياداسىنىڭ فينالدىق باعدارلاماسىن ورىنداپ تۇرعان ءساتىن ورنەكتەگەن ەڭسەلى ەسكەرتكىشتىڭ ءمۇسىنى قولادان, تۇعىرى گرانيتتەن قۇيىلعان. بيىكتىگى – 2,4 مەتر. ەسكەرتكىش قالاداعى دەنيس تەن قاپىدا قازا تاپقان قۇرمانعازى مەن بايسەيىتوۆا كوشەلەرىنىڭ قيىلىسىندا ورىن تەپكەن. اق ايدىندا اققۋداي قالىقتاعان ايبوز ۇلدىڭ جارقىن بەينەسىن كوز الدىڭا اكەلەتىن ونەر تۋىندىسىن سومداعان سانكتپەتەربۋرگتىك ءمۇسىنشى ماتۆەي ماكۋشكين. ونەر يەسى بۇعان دەيىن شاھارداعى جاستار ءجيى باس قوسىپ ءان سالاتىن ورىنعا اينالعان ۆيكتور تسويدىڭ ايرىقشا ءمۇسىنىن كەيىپتەگەن ەدى.
ەسكەرتكىشتىڭ اشىلۋ راسىمىنە دەنيستىڭ ونەرى مەن ءومىر جولىن باعالايتىن الماتى تۇرعىندارى, سونداي-اق تانىمال سپورتشىلار مەن قوعام قايراتكەرلەرى قاتىستى. ولار تاس تۇعىرعا گۇل شوقتارىن قويىپ, تاس ءمۇسىنگە اينالعان تاڭعاجايىپ تالانت يەسىن قۇرمەتپەن ەسكە الدى.
دەنيس ءوزىنىڭ ءبىر سۇحباتىندا العا قويعان ماقساتتارىنىڭ كوپتىگىن, ءوزى قۇراستىرعان ستسەناريدىڭ جەلىسى بويىنشا فيلم ءتۇسىرۋدى ارماندايتىنىن ايتقان ەدى. الايدا ونىڭ ەڭ ۇلكەن ارمانى تورتجىلدىقتىڭ باستى باسەكەسىندە قازاقتىڭ تۋىن كوكتە جەلبىرەتۋ بولاتىن. سپورتشىنىڭ اۋىر قازاسىنان كەيىن ايگىلى جاتتىقتىرۋشى فرەنك كەررولل دا كارەراسىن وسىمەن ءتامامدايتىنىن حابارلادى. دەنيس تەننىڭ ونەرىن تاماشالاعان ميلليونداعان ادام كارتا بەتىنەن قازاقستاندى ىزدەدى. ونىڭ جارقىن بەينەسى ءماڭگى كوز الدىمىزدا. ەسكە سالساق, وسىعان دەيىن الماتىدا دەنيس تەن تۇرعان ءۇيدىڭ قابىرعاسىنا مەموريالدى ەسكەرتكىش تاقتا ورناتىلعان بولاتىن.
الماتى
