قورعاۋشى ما, قورلاۋشى ما؟
بەيسەنبى, 7 اقپان 2013 7:23
ادەتتە بىرەۋدەن ءزابىر كورگەن ادام پوليتسياعا شاعىمدانادى. ويتكەنى, الدىمەن پوليتسيا عانا جابىرلەنۋشىنىڭ قۇقىن قورعايدى. قىلمىستىڭ بەتىن اشادى. ال جۇرتشىلىق قورعاۋشى رەتىندە ارقا سۇيەيتىن پوليتسەيلەردىڭ وزدەرى قورعانسىز جانعا ءزابىر كورسەتىپ, قورلاسا شە؟ باسقا ءبىر بۇزىقتار ايەل زورلادى دەسە سەنۋگە بولار, ال پوليتسيا قىزمەتكەرلەرىنىڭ ءدال وسىنداي ارسىز ىسكە بارۋىن نەگە جورۋعا بولادى؟
بەيسەنبى, 7 اقپان 2013 7:23
ادەتتە بىرەۋدەن ءزابىر كورگەن ادام پوليتسياعا شاعىمدانادى. ويتكەنى, الدىمەن پوليتسيا عانا جابىرلەنۋشىنىڭ قۇقىن قورعايدى. قىلمىستىڭ بەتىن اشادى. ال جۇرتشىلىق قورعاۋشى رەتىندە ارقا سۇيەيتىن پوليتسەيلەردىڭ وزدەرى قورعانسىز جانعا ءزابىر كورسەتىپ, قورلاسا شە؟ باسقا ءبىر بۇزىقتار ايەل زورلادى دەسە سەنۋگە بولار, ال پوليتسيا قىزمەتكەرلەرىنىڭ ءدال وسىنداي ارسىز ىسكە بارۋىن نەگە جورۋعا بولادى؟
جىلىوي اۋداندىق ىشكى ىستەر ءبولىمىندە ۋچاسكەلىك پوليتسيا ينسپەكتورلارىنىڭ كومەكشىسى بولىپ قىزمەت ەتەتىن ەكى وفيتسەردىڭ 34 جاسقا ەندى تولعان نازىك جانعا زورلىق جاساعانى ەلدىڭ جاعاسىن ۇستاتىپ وتىر. ولاردىڭ قاسىندا تاعى ءبىر ازامات بولىپتى. وسى ۇشەۋى قۇلسارى قالاسىنا ۋاقىتشا تۇرۋعا كەلگەن وزگە ءوڭىر تۇرعىنىن اۋەلى كۇشتەپ زورلاعان, ودان سوڭ باسىنا پاكەت كيگىزىپ, ەن دالاعا اپارىپ تاستاعان. قازىر, وبلىستىق ىشكى ىستەر دەپارتامەنتى ءباسپاسوز قىزمەتىنىڭ جەتەكشىسى, پوليتسيا پولكوۆنيگى گۇلنازيرا مۇحتاروۆانىڭ ايتۋىنشا, ءۇش كۇدىكتى دە قاماۋعا الىنىپ, تەرگەۋ ءىسى جۇرگىزىلۋدە. تەرگەۋ بارىسىندا جابىرلەنۋشى وزىنە زورلىق كورسەتكەندەردى تانىعان.
وسىعان بايلانىستى ىشكى ىستەر ءمينيسترىنىڭ ورىنباسارى امانتاي كۇرەڭبەكوۆ اتىراۋدا وبلىستىق ىشكى ىستەر دەپارتامەنتى قۇرىلىمدارىنىڭ باسشىلىعىمەن جەدەل جينالىس وتكىزدى. وندا جىلىوي اۋداندىق ىشكى ىستەر ءبولىمىنىڭ ەكى قىزمەتكەرى جاساعان اۋىر قىلمىستىق ءىس ءسوز بولدى. ءمينيستردىڭ ورىنباسارى جىلىوي اۋداندىق ىشكى ىستەر ءبولىمىنىڭ باستىعى سەرىك ەربولەكوۆتى قىزمەتىنەن بوساتتى. سونىمەن بىرگە, ونىڭ ورىنباسارلارىنىڭ جانە باسقا دا باسشىلىق قىزمەتكەرلەرىنىڭ قىزمەتتەرىنە سايكەستىگى ماسەلەسى كوتەرىلدى.
ارينە, كىنالىلەر جازاسىن الادى. وعان داۋ جوق. الايدا, ەندى ەل-جۇرت پوليتسەيلەردىڭ ادام زورلاۋ قىلمىسىنا قاتىسۋىن ەشقاشان ۇمىتپايدى. بۇدان بىلاي پوليتسيا قىزمەتكەرىن كورسە, قورعاۋشى دەپ ەمەس, زورلاۋشى دەپ تەرىس اينالۋى دا عاجاپ ەمەس. شىندىعىندا دا پوليتسيا قىزمەتكەرلەرى قورعاۋشىدان قورلاۋشىعا اينالىپ بارا جاتقان جوق پا؟
جولداسبەك شوپەعۇل,
«ەگەمەن قازاقستان».
اتىراۋ وبلىسى.
