قۇرىلىس مەكەمەسىنىڭ قۇنىققان باسشىسى
سەنبى, 12 قاڭتار 2013 7:51
قىزىلوردا وبلىستىق قارجى پوليتسەيلەرى مەملەكەتتىك بيۋدجەتكە 157 ملن. تەڭگە كولەمىندە زالال كەلتىرگەن قۇرىلىس مەكەمەسىنىڭ باسشىسىن قاماۋعا الدى.
سەنبى, 12 قاڭتار 2013 7:51
قىزىلوردا وبلىستىق قارجى پوليتسەيلەرى مەملەكەتتىك بيۋدجەتكە 157 ملن. تەڭگە كولەمىندە زالال كەلتىرگەن قۇرىلىس مەكەمەسىنىڭ باسشىسىن قاماۋعا الدى.
وقيعا بىلاي بولعان. وبلىس ورتالىعىنداعى «دويتگازپوجسەرۆيس» جشس 2011 جىلعى جەلتوقساندا سىرداريا اۋدانىنىڭ شاعان اۋىلىندا سالىنۋعا ءتيىستى سمەتالىق قۇنى 1 ملرد. 151 ملن. تەڭگە تۇراتىن 900 ورىندىق مەكتەپ قۇرىلىسىن جۇرگىزۋ جونىندەگى تەندەردىڭ جەڭىمپازى بولىپ تانىلادى. ناتيجەسىندە اتالمىش سەرىكتەستىك پەن وبلىستىق قۇرىلىس باسقارماسى اراسىندا نىساندى 2013 جىلدىڭ جەلتوقسانىندا اياقتاپ شىعۋ جونىندەگى كەلىسىم-شارت جاسالادى. وسىعان وراي 2012 جىلدىڭ اقپانى مەن ماۋسىمى ارالىعىندا قۇرىلىس مەكەمەسىنىڭ ەسەپشوتىنا بيۋدجەتتەن 192,7 ملن. تەڭگە قارجى بەرىلەدى. سول كەزدە سەرىكتەستىك ديرەكتورى ج.مۇساحانوۆ بۇل قارجىنىڭ 183,7 ملن. تەڭگەسىن ەشبىر نەگىزسىز «قىزىلورداگازپرومستروي» جشس-ىنا اۋدارىپ جىبەرەدى. قىزىق بولعاندا, بۇل سەرىكتەستىكتىڭ دە ديرەكتورى ءوزى ەكەن. بۇدان ارعىسى بەلگىلى. قوس سەرىكتەستىكتىڭ يەسى سوسىن الگى قارجىنىڭ 146 ملن. تەڭگەسىن بىردەن قولما-قول اقشاعا اينالدىرىپ, ءوزىنىڭ قالتاسىنا باسا سالادى.
قارجى پوليتسەيلەرى تەكسەرۋ كەزىندە ج.مۇساحانوۆتىڭ بۇدان دا باسقا قىلمىستىق ارەكەتتەرىن تاپتى. اتاپ ايتقاندا, ول 2012 جىلدىڭ ساۋىرىندە ءتيىستى جەر جۇمىستارىنىڭ تولىق اتقارىلىپ بولماعانىنا قاراماستان, 46,7 ملن. تەڭگەلىك جۇمىسقا اكت تولتىرادى. مۇنى وسى جەرگە قاتىسى بار «سورتوبە» جشس قىزمەتكەرلەرى راستاپ بەرەدى. جۇمىستىڭ تولىق ورىندالىپ بىتپەگەنىن بىلە تۇرا, وبلىستىق قۇرىلىس باسقارماسى ءبولىم باستىعىنىڭ مىندەتىن اتقارۋشى دا ءوز كەزەگىندە وسى اكتىگە قول قويادى. وسى ارقىلى ول مەملەكەتكە 11,3 ملن. تەڭگە كولەمىندە زيان كەلتىرەدى.
قازىر اسا ءىرى كولەمدەگى مەملەكەت قارجىسىن تالان-تاراجعا سالعانى, قىلمىستىق كەلىسىمگە كەلگەنى جانە قىزمەت بابىن اسىرا پايدالانعانى ءۇشىن ج.مۇساحانوۆتىڭ ۇستىنەن قىلمىستىق ءىس قوزعالىپ, تەرگەۋ امالدارى ءجۇرىپ جاتىر.
رۋسلان يگىلىك.
قىزىلوردا.
