قازاقستان حالقى اسسامبلەياسى عيماراتىندا وتكەن ءىس-شاراعا ماڭعىستاۋ وبلىستىق سوتىنىڭ سۋدياسى, تاتۋلاسۋ راسىمدەرى بويىنشا ۇيلەستىرۋشىسى مۇرات اۋباكيروۆ جانە سۋديا-مەدياتور جانار نۋرۋشوۆا, كاسىبي مەدياتور سانيا ساتاليەۆا قاتىستى.
اشىق ەسىك كۇنىندە ءسوز العان مۇرات اۋباكيروۆ قوعامدا داۋدى ازايتۋ, حالىقتى اۋرە-سارساڭعا سالماۋ جانە سوتتاردىڭ جۇمىسىن ىزگىلەندىرۋ ماقساتىندا سوت-قۇقىق سالاسىندا جۇرگىزىلگەن رەفورمالار ءوز ناتيجەسىن بەرىپ, سوتقا تۇسەتىن ىستەر سانى ازايىپ وتىرعانىن تىلگە تيەك ەتتى. ناتيجەسىندە, اعىمداعى جىلى رەسپۋبليكا سوتتارىندا ءساۋىر ايىندا 551 مىڭ ءىس پەن ماتەريالدار تۇسسە, مامىر ايىندا نەبارى 129 مىڭ تۇسكەنىن, بۇل ءتورت ەسەگە جۋىق ىستەردىڭ تومەندەۋى اسىرەسە ازاماتتىق داۋلار سانىنىڭ ازايۋىنان بايقالاتىندىعىن اتاپ ءوتتى.
اشىق ەسىك كۇنىنە قاتىسۋشىلار تاراپىنان قويىلعان سۇراقتاردىڭ دەنى ازاماتتىق-قۇقىقتىق رەتتەۋ ماسەلەلەرى, اليمەنت تولەۋ, ەڭبەك زاڭناماسىنىڭ بۇزىلۋى جانە تاعى باسقا تاقىرىپتا بولدى. ءاربىر قويىلعان سۇراققا زاڭدى تۇسىندىرە وتىرىپ, تولىق جاۋاپ بەرىلدى.
ءىس-شارا سوڭىندا سوت, اكىمدىك عيماراتتارىندا مەدياتور كابينەتتەرى اشىلعاندىعى, «اتامەكەن» كاسىپكەرلەر پالاتاسى وڭىرلىك فيليالىندا, كاسىپوداقتار ۇيىندە, ش.ەسەنوۆ اتىنداعى مەملەكەتتىك ۋنيۆەرسيتەتتە تاتۋلاسۋ ورتالىقتارى جۇمىس ىستەيتىندىگى, وبلىستا بيلەر كەڭەسى قۇرىلىپ, العاشقى داۋلار قارالعاندىعى تۋرالى قۇندى اقپاراتتار ايتىلدى.
ەڭ باستىسى, تاتۋلاسۋ تاراپتاردىڭ ۋاقىتى مەن قارجىسىن ۇنەمدەيتىندىگى, تاراپتار مەملەكەتتىك باجدان بوساتىلاتىندىعى قاتىسۋشىلار نازارىنا ۇسىنىلدى.
ماڭعىستاۋ وبلىسى
