قوعام • 20 ماۋسىم، 2019

قوعامعا بەلسەندى جاستار كەرەك

151 رەتكورسەتىلدى

الماتىداعى «دوستىق» ۇيىندە قازاقستان حالقى اسسام­بلەياسىنىڭ ۇيىمداستىرۋىمەن «جاڭا تولقىن 100+» اتتى جاستار فورۋمى بولىپ ءوتتى. قازاقستان حالقى اسسام­بلەياسىنىڭ «جاڭعىرۋ جولى» جاستار قاناتىنىڭ وكىلدەرى وتكەن جىلدىڭ قورتىندىسىن جاريالاپ، قارىم-قاتىناس جاساۋ­دىڭ جاڭا مۇمكىندىكتەرىن تالقىلاۋ ءۇشىن ءار وڭىردەن كەلىپ باس قوستى.

جاستار قاناتىنىڭ تۇساۋى­ كەسىلگەلى بەرى ناقتى ءبىر ماق­ساتقا انىق قول جەتكىزىلدى. ول – قحا جاستار ۇيىم­دارىنىڭ ءتۇرلى مىندەت ارقالاعان قۇ­رى­لىم­دارى ومىرگە كەلىپ، «جاڭ­عىرۋ جولىنىڭ» 17 وبلىس­تىق جانە قالالىق شتاب قوزعا­لىس­تارى قۇرىلىپ، وعان 5 مىڭعا جۋىق بەلسەندى جاس جۇمىسقا تار­تىلدى. 
الدا اتقارىلاتىن مىندەت­تەر ءالى دە كوپ. ءبىرىنشى كەزەك­تە قازاقستان حالقى اسسام­بلەيا­­سى توراعاسىنىڭ ورىن­باسارى قازاقستان پرەزيدەنتى­نىڭ اكىمشىلىگى قحا حاتشىلى­عىنىڭ مەڭگەرۋشىسى جانسەيىت تۇيمەباەۆ مەملەكەتتىڭ جاستار ساياساتىن جۇزەگە اسىرۋدا بەلسەندى بولۋعا شاقىردى. ول فورۋمدا جاساعان بايانداماسىندا پرەزيدەنت قاسىم-جومارت توقاەۆتىڭ ۇلىقتاۋ راسىمىندە سويلەگەن سوزىندە ەل جاستارىنا ەرەكشە ۇمىتپەن قاراپ وتىرعانىنا نازار اۋدارتتى. مەملەكەت باسشىسى: «سەندەردىڭ الدارىڭدا قا­زاقستان دامۋىندا شەشۋشى ءرول اتقاراتىن مىندەت تۇر. مەنىڭ مىندەتىم – سەندەردىڭ ەڭ ۇلكەن ارماندارىڭدى جۇزەگە اسىرۋ جانە وزدەرىڭنىڭ جەكە تاريحي جەتىستىكتەرىڭدى قۇرۋ ءۇشىن بارلىق مۇمكىندىكتەردى جاساپ بەرۋ»، دەگەن بولاتىن. الدا اتقارىلاتىن اۋقىمدى ءارى كۇردەلى جۇمىستىڭ جاۋاپتى بولىگى جاستاردىڭ يىعىنا ارتىلاتىنىن سانالى ءار جاستىڭ تەرەڭ سەزىنۋى ءتيىس ەكەنىن ەسكە سالدى. 
بۇگىندە مەملەكەت جاستاردى قولداۋ بويىنشا بىرنەشە باعدار­لامانى جۇزەگە اسىرۋدا: «جاستار – ەل تىرەگى» ارنايى جوباسى، كاسىپكەرلىك يدەيا­لاردى دامىتۋعا باعىتتالعان «جاس كاسىپكەر» باعدارلاماسى – سول ماقساتتىڭ ايقىن كورىنىسى. الداعى ۋاقىتتا دا جاستار ستار­تاپتارىن قولدايتىن، جاستاردى جۇمىسپەن قامتاماسىز ەتۋگە بايلانىستى اۋقىمدى باعدارلامالار قولعا الىنادى. ەتى ءتىرى، ءبىلىمدى، ۇيىم­داس­تىرۋشىلىق قابىلەتى زور جاس باسقارۋشىلار ءۇشىن مەملە­كەتتىك قىز­مەتتىڭ بارلىق دەڭ­گەيىندە كادرلىق رەزەرۆ قۇرى­لادى. جانسەيىت تۇيمەباەۆ جاس­­تاردى وسى باعدارلامالارعا قاتى­سۋعا، قحا الاڭىنداعى ەڭ ۇزدىك جاستار يدەياسىن جۇزەگە اسىرۋعا كومەكتەسەتىن «Jastar jyly – dańǵyl jol» جوباسى نەگىزىندە جاستاردىڭ الەۋمەتتىك ءوسۋ مۇمكىندىگىن كەڭەيتە تۇسۋگە شا­قىردى.
بيىلعى جىلى اسسامبلەيا تاعى دا بىرنەشە قىزىقتى جوبالاردى – الەۋمەتتىك حاكاتون، «اۋىل اكىمى بولعىم كەلەدى!» جو­باسى، «جاستار سينەرگياسى – 2019» فورۋمىن وتكىزۋدى جوس­پارلاپ وتىر. جوعارى وقۋ ورىندارىندا «جاراسىم» كلۋبىنىڭ جەلىلەرىن كەڭەيتە ءتۇسۋ دە اسسامبلەيانىڭ جاستار قانا­تى الدىندا تۇرعان ۇلكەن مىندەت­تەردىڭ ءبىرى.
سونداي-اق جيىندا ەل اي­ماق­تارىنان كەلگەن جاس­تار ساراپتامالىق توپ پەن كاسىپ­كەرلەرگە ءوز اۆتور­لىعىمەن ءازىر­لەنگەن ستارتاپ جوباسىن تانىستىردى. «رۋحاني جاڭ­عىرۋ» باعدارلاماسىنىڭ كەزەڭ­دەرىن جۇزەگە اسىرۋدى ماقسات تۇتقان شارا اياسىندا «قازاقستاننىڭ 100 جاڭا ەسىمى» جوباسىنىڭ جەڭىمپازدارى ءوز جەتىستىكتەرىنىڭ سىرىمەن ءبولىستى. ويتكەنى فورۋمدى ۇيىم­داستىرۋداعى ماقسات تا سول – جاس­تاردى ءبىلىم الۋعا ۇندەۋ جانە بوس ۋاقىتتارىن ءتيىمدى، ءارى بەلسەندى وتكىزۋدىڭ جولدارىن ورتاعا سالۋ، جاستار جىلى اياسىندا جاڭا يدەيالار مەن جوبالاردى قولداۋ، سونداي-اق «قازاقستاننىڭ 100 جاڭا ەسىمى» جوباسى جەڭىمپازدارىنىڭ جەتىستىكتەرىمەن تانىستىرۋ بولاتىن. فورۋم ەل ەكونومي­كاسىنىڭ دامۋىنا سەپ بولاتىن جاستاردىڭ تىڭ جوبالا­رىنا قولداۋ كورسەتۋدى كوزدەپ وتىرعاندىقتان، بارلىق ءوڭىر­دەن شاقىرىلعان بەلسەندى جاستار ونەرتابىستارىن نازارعا ۇسىندى. راسىندا دا، جاستار جيىنعا تىڭ باس­تامالارىمەن كەلىپ، وزدەرىنىڭ يدەيا­سىنان تۋعان اۋىلشارۋاشىلىق، ەكولوگيالىق، الەۋمەتتىك سالالاردى دامىتۋعا نەگىزدەلگەن جوبالارىمەن جارىسا تانىس­تىرىپ جاتتى. الماتى وبلى­سىنىڭ جاستارى ءپىسىپ-جەتىلىپ، دالەلدەنگەن دايىن جوباسىنا ينۆەس­تورلار ىزدەۋگە كىرىسسە، قىزىلوردالىق جاستار ءۇش ءتىلدى دامىتۋ جوباسىنىڭ ناتيجەسىن كورسەتۋگە اسىق.
فورۋمنىڭ جاس قاتىسۋشى­لارى ءۇشىن «جەتىستىك تاريحى» اتتى موتيۆاتسيالىق كەز­دەسۋ­لەر مەن جاستارعا كوشباس­شى­­لىق داعدىلاردى سىڭىرۋگە باعىتتالعان ينتەراكتيۆتى سەمينار-ترەنينگتەر ۇيىمداس­تىرىلىپ، ولار جىلدام دامىپ كەلە جاتقان اقپاراتتىق كەزەڭنىڭ ىلكىمدى ىستەرىن ۇيرە­تۋگە ۇندەيتىن پايدالى يدەيالار­دان قاناتتانىپ شىقتى. 

الماتى

سوڭعى جاڭالىقتار

ۇقساس جاڭالىقتار