جول قۇرىلىسى ساپاسى ماسەلەسىنىڭ الدىمىزدان شىعا بەرۋى وعان دەگەن قاجەتتى باقىلاۋ مەن زەرتحانالىق جۇمىستار دەڭگەيىنىڭ تومەندىگىنەن ورىن الىپ جۇرگەنى دە ءمالىم. كەلەشەكتە ونى باقىلاۋدىڭ باستى جولى قانداي بولماق؟ ەلىمىزدە قۇرىلعان جاڭا قۇرىلىمداردىڭ ءبىرى – «جول اكتيۆتەرى ساپاسى ۇلتتىق ورتالىعى» رمك وسىنداي ولقىلىقتاردىڭ ورنىن تولتىرماق. اقتوبە وبلىسىنا كەلگەن جۇمىس ساپارى كەزىندە اتالعان ورتالىقتىڭ باس ديرەكتورى زامير ساعىنوۆپەن از-كەم پىكىر الماسۋدىڭ ءساتى تۇسكەن-ءدى. ونىڭ ايتۋىنشا, ورتالىق رەسپۋبليكا اۋماعىندا جۇرگىزىلەتىن بارلىق جول قۇرىلىستارىنىڭ ساپاسىن قاتاڭ باقىلاۋدان وتكىزبەك. بۇل رەتتە باستى نازار جول قۇرىلىسى ماتەريالدارىنا زەرتحانالىق جۇمىستار جۇرگىزۋگە باعىتتالادى. تۇتاستاي ەل وڭىرلەرىندە ءىستى العا اپارۋ ءۇشىن ورتالىقتىڭ فيليالدارى قۇرىلعان. وسىنداي ءبىرتۇتاس قۇرىلىم مەن كەشەندى كوزقاراس رەسپۋبليكالىق ماڭىزى بار جولداردىڭ ساپاسىن تەكسەرۋمەن شەكتەلمەي, سونىمەن بىرگە وبلىستار مەن ەلدى مەكەندەر ارالىعىنداعى جولداردىڭ جاي-كۇيىن باقىلاۋعا دا مۇمكىندىك بەرەدى.
وبلىستىق, رەسپۋبليكالىق جانە حالىقارالىق اۆتوجول قۇرىلىسى قىزۋ ءجۇرگىزىلىپ جاتقان اقتوبە ايماعى ءۇشىن اتالعان ورتالىقتىڭ قىزمەتى اۋاداي قاجەت-اق. ويتكەنى قوماقتى قاراجاتقا جول سالىنعانىمەن ساپاسى تومەن بولسا, ودان نە قايىر. سوندىقتان جاڭادان قۇرىلعان ورتالىق فيليالىنىڭ جۇمىسىن شۇعىل شيراتۋ كەرەك-اق.
وسى ورايدا ءبىرىنشى كەزەكتە قاجەتتى ماتەريالدىق-تەحنيكالىق بازانى جاساقتاۋعا كوڭىل ءبولىنىپ, فيليالعا جىلجىمالى زەرتحانا ساتىپ الۋ جونىندە شەشىم قابىلداندى. سونداي-اق شتاتتىق كەستەسىن تولىقتىرۋ جۇمىستارى دا جۇيەلى تۇردە جۇرگىزىلىپ كەلەدى.
– ساپالى جول ۇعىمىنىڭ ماعىناسى تەرەڭ, اۋقىمى كەڭ. بۇل – ەلدىڭ الەۋمەتتىك-ەكونوميكالىق دامۋ كورسەتكىشىنىڭ باستى بەلگىلەرىنىڭ ءبىرى. وسى تۇرعىدا ۇلتتىق ورتالىقتىڭ وبلىستاعى بولىمشەسىن قولداۋعا, جول ساپاسىن جاقسارتۋ ءۇشىن بارلىق مۇمكىندىكتەردى جاساۋعا ءازىرمىز, – دەدى وبلىس اكىمى وڭداسىن ورازالين.
وبلىس ورتالىعىنداعى جول ساپاسىن باقىلاۋ جونىندەگى زەرتحانا اقتوبە قالاسىنىڭ ىرگەسىندە ورنالاسقان. ونىڭ جەتەكشىسى سۆەتلانا قارىمساقوۆانىڭ ايتۋىنشا, مۇندا جول ساپاسىن تەكسەرۋگە قاتىستى قويىلاتىن بارلىق تالاپتار مەن نورماتيۆتەر ساقتالعان. سوعان سايكەس بارلىق شيكىزات قوسپالارى ارالاستىرىلىپ, اسفالتتىڭ العاشقى سىناما نۇسقاسى الىنادى. سىناما وڭ كورسەتكىش كورسەتكەن جاعدايدا عانا نەگىزگى ءونىم شىعارۋعا تاپسىرىس بەرىلەدى. زەرتحانا قىزمەتىمەن تانىسۋدى ماقسات ەتكەن ارنايى توپ «اسفالت» جشس-عا بارعان كەزدە زەرتحانا ساراپشىلارى مەن ماماندارى اقتوبە-ورسك تاس جولىنا قاجەتتى قۇرىلىس ماتەريالدارى قوسپاسىنا تەكسەرۋلەر جۇرگىزۋدە ەكەن.
زەرتحانا – كەز كەلگەن اسفالت شىعاراتىن زاۋىتتىڭ باستى تۇتقاسى, باستى ءولشەمى. اتالعان سالا وكىلدەرىنىڭ تۇجىرىمداۋىنشا, ءونىم ساپاسىنا قاتىستى قويىلعان ولشەمدەر ورىندالماسا نەمەسە ءتيىستى تالاپتارعا سايكەس كەلمەسە, مۇنداي كورىنىستەر بىرنەشە رەت قايتالانسا, ايىپپۇل سالىنىپ, زاۋىتتىڭ سەرتيفيكاتى قايتارىلىپ الىنادى. ياعني جول اكتيۆتەرى ساپاسى ۇلتتىق ورتالىعىنىڭ قۇزىرىمەن ماسەلەنىڭ بۇلايشا قويىلۋى جول ساپاسىنا دەگەن شىنايى جاناشىرلىق پەن جاۋاپكەرشىلىكتى قالىپتاستىرادى.
جول ەڭ الدىمەن نەگىزگى شيكىزات ماتەريالدارىنىڭ ساپاسى جوعارى بولعان جاعدايدا بەرىك بولادى. ايتالىق, ارنايى قوسپا قوسىلماسا, كەيبىر قيىرشىق تاستار بيتۋممەن ارالاسپايدى. مۇنىڭ ءوز ءتارتىبى مەن قولدانىلۋ شارتتارى بار. ءوندىرۋشى ونى بەلگىلەنگەن مولشەرگە ساي قوسپاسا, ءونىم ساپاسىز بولىپ شىعادى. وسى ءتارىزدى كەم-كەتىكتىڭ ءبارى زەرتحانادا انىقتالادى. جالپى, ساپالى اسفالت كەم دەگەندە 17 جىلعا دەيىن سىر بەرمەۋى كەرەك.
اقتوبە وبلىستىق اكىمدىگى مەن جول اكتيۆتەرى ساپاسى ۇلتتىق ورتالىعى اراسىندا مەموراندۋمعا قول قويىلدى. سايكەسىنشە وبلىس اۋماعىنداعى رەسپۋبليكالىق جانە جەرگىلىكتى ماڭىزى بار جولداردىڭ ءبارى باقىلاۋعا الىنباق. سونىمەن بىرگە وڭىردە جول ساپاسىن باقىلايتىن زەرتحانالار مەن ونىڭ ماتەريالدىق-تەحنيكالىق بازاسى ارتا تۇسەدى, ەڭ باستىسى جول قۇرىلىسى ساپاسىن انىقتاۋ ءۇشىن يننوۆاتسيالىق تەحنولوگيالار ەنگىزىلەدى دەپ كۇتىلۋدە. مىنە, اۆتوجول ساپاسىنا بايلانىستى بۇعان دەيىن ورىن العان تۇيتكىلدەر وسىلايشا تارقاتىلماق.
اقتوبە
