شاراينا
سەنبى, 8 ماۋسىم 2013 1:36
پۋتين زايىبىمەن اجىراسپاق
رەسەي فەدەراتسياسىنىڭ پرەزيدەنتى ۆلاديمير پۋتين ءوزىنىڭ زايىبىمەن اجىراساتىنى تۋرالى حابارلادى. پرەزيدەنتتىڭ ايتۋىنشا, بۇل ليۋدميلا پۋتينامەن ەكەۋىنىڭ بىرلەسىپ قابىلداعان شەشىمى.
سەنبى, 8 ماۋسىم 2013 1:36
پۋتين زايىبىمەن اجىراسپاق
رەسەي فەدەراتسياسىنىڭ پرەزيدەنتى ۆلاديمير پۋتين ءوزىنىڭ زايىبىمەن اجىراساتىنى تۋرالى حابارلادى. پرەزيدەنتتىڭ ايتۋىنشا, بۇل ليۋدميلا پۋتينامەن ەكەۋىنىڭ بىرلەسىپ قابىلداعان شەشىمى.
وتكەن بەيسەنبى كۇنى كەشكىلىك ولار مەملەكەتتىك كرەمل سارايىندا «ەسمەرالدا» بالەتىندە بولعان. بالەت اياقتالعان سوڭ ولار «روسسيا 24» تەلەارناسىنىڭ تىلشىسىنە سۇحبات بەرىپ, وندا وزدەرىنىڭ نەكەلەرىنىڭ اياقتالعانىن حابارلاعان. مەنىڭ بۇكىل قىزمەتىم قالىڭ جۇرتشىلىق ورتاسىندا وتەدى. ال مۇنداي جاعدايعا مۇلدە ۇيلەسپەيتىن ادامدار دا بار. مىنە, ليۋدميلا الەكساندروۆنا سەگىز, ءتىپتى توعىز جىل بويى ۆاحتادا تۇردى, دەپ اتاپ وتكەن ۆ.پۋتين. ونىڭ زايىبى دا مۇنداي شەشىمگە ولاردىڭ بىرلەسىپ كەلگەنىن مالىمدەگەن.
اقش تۇپكىلىكتى قورىتىندى شىعارعان جوق
اقش مەملەكەتتىك دەپارتامەنتىنىڭ رەسمي وكىلى دجەننيفەر پساكي قۇراما شتاتتاردىڭ فرانتسيادان سيريادا حيميالىق قارۋ قولدانىلعانى تۋرالى ولار جيناعان مالىمەتتەردى العانىن, دەگەنمەن ازىرگە تۇپكىلىكتى قورىتىندى جاساماعانىن, ءالى دە ايعاقتار جيناۋ جالعاسۋدا ەكەنىن ايتقان.
پرەزيدەنت پەن مەملەكەتتىك حاتشى بىزگە سەنىمدى دە دالەلدەنگەن دايەكتەر تابۋ قاجەتتىگىن ايقىن ءتۇسىندىرىپ بەردى. ءبىزدىڭ وداقتاستارىمىزبەن, ونىڭ ىشىندە فرانتسيا دا بار, بىرلەسىپ جۇمىس ىستەۋىمىز, اقپاراتتار الماسۋ وسى پروتسەستىڭ بولىگى بولىپ تابىلادى. ءبىز بۇۇ جۇرگىزىپ جاتقان تەرگەۋلەردى قولدادىق جانە قولداي بەرەتىن بولامىز. قورىتىندى شىعارۋ قاجەت بولعاندا ءبىز ونى شىعارامىز, بىراق ازىرگە ءبىز ونداي ساتىدا ەمەسپىز, دەپ اتاپ كورسەتكەن پساكي حانىم بريفينگتە.
اۋعانستاندا گرۋزين اسكەريلەرى قازا تاپتى
تەررورشى-جانكەشتى اۋعانستاننىڭ گيلمەند پروۆينتسياسىندا گرۋزين بىتىمگەرلىك كونتينگەنتىنىڭ بازاسىنا شابۋىل جاساعان. بۇل تۋرالى گرۋزيا قورعانىس مينيسترلىگىنىڭ وكىلى يراكلي دزنەلادزەگە سىلتەمە جاساي وتىرىپ ۆۆس اگەنتتىگى حابارلاعان.
مينيسترلىك وكىلىنىڭ ايتۋىنشا, تەررورشى اسكەري بازانىڭ جانىندا جارىلعىش بەكىتىلگەن جۇك كولىگىن جارىپ جىبەرگەن. سونىڭ سالدارىنان جەتى اسكەري قىزمەتشى قازا تاۋىپ, تاعى توعىز ادام جاراقاتتانعان كورىنەدى. قازىرگى ۋاقىتتا جارالانعانداردىڭ ومىرلەرىنە قاتەر ءتونىپ تۇرعان جوق, ولار مەديتسينالىق قىزمەتكەرلەردىڭ باقىلاۋىندا, دەپ حابارلاعان اسكەري بازاداعى وفيتسەرلەردىڭ ءبىرى. گرۋزيا پرەزيدەنتى ميحايل سااكاشيۆيلي 7 ماۋسىمدى قارالى كۇن دەپ جاريالادى. ازاماتتارعا تەلەديدار ارقىلى جاساعان ۇندەۋىندە مەملەكەت باسشىسى تەررورلىق اكتىنى «ەل ءۇشىن جانە بۇكىل گرۋزيندەر ءۇشىن قاسىرەت» دەپ اتاعان.
قىتاي قارسى شارا قابىلدادى
قىتاي وكىمەتى ەۋروپادان كەلەتىن يمپورتتىق شاراپتارعا دەمپينگكە قارسى تەكسەرۋ جۇرگىزۋدى باستادى. مۇنداي شەشىم ەۋروپا بيلىكتەرى تاراپىنان قورعانىشتىق باج سالىعىن ەنگىزۋگە جاۋاپ رەتىندە قابىلدانىپ وتىر.
قىتايدىڭ ەڭ جوعارى دەڭگەيدەگى شەنەۋنىكتەرى قىتاي وندىرۋشىلەرى شىعارعان كۇن پانەلدەرىنە قارسى تاريفتەر ەنگىزۋ تۋرالى شەشىم قارسى ءىس-ارەكەت تۋىنداتادى دەپ بىردەن-اق ەسكەرتكەن بولاتىن. قىتايدىڭ ساۋدا مينيسترلىگى قابىلدانعان شارالارعا قارسى قحر-دىڭ قاتاڭ قارسىلىق بىلدىرەتىنىن مالىمدەپ وتىر. ايتا كەتۋ كەرەك, ەۋرووداقتان قىتايعا شاراپ ەكسپورتى 2012 جىلى 63 ملن. ەۋرونى قۇراعان بولاتىن.
يسلاميستەر سۇلۋلىق بايقاۋىنا قارسى
يندونەزيا مۇسىلماندارىنىڭ راديكالدى ۇيىمدارى وسى جىلدىڭ قىركۇيەگىندە يندونەزيادا جىل سايىنعى بۇكىلالەمدىك «الەم ارۋى» بايقاۋىن وتكىزۋگە وزدەرىنىڭ قارسى ەكەندەرىن مالىمدەپ وتىر.
كونكۋرسقا قولداۋ جاساۋ ايەلدەر دەنەسىن ساۋدالاۋعا قولداۋ جاساۋمەن بىردەي, دەپ مالىمدەگەن «حيزبۋت تاحرير يندونەسيا» ۇيىمىنىڭ رەسمي وكىلى يسمايل يۋسانتو. «يسلامدى رەفورمالاۋ جولىنداعى قوزعالىس» ۇيىمى باسشىلارىنىڭ ءبىرى چەپ حەرناۆان دا ءدال وسىلاي ويلايدى. ونىڭ ايتۋىنشا, بايقاۋعا قاتىسۋشىلار سەكستى جانە مورالعا قارسى ءىس-ارەكەتتەردى ناسيحاتتايتىن كيىمدەر كيەتىن بولادى. يسلاميستەر جاپپاي نارازىلىق اكتسيالارىن وتكىزۋگە ۋادە بەرىپ وتىر.
لۋكاشەنكو اكىمشىلىگى 25 پايىزعا قىسقارماق
بەلارۋس رەسپۋبليكاسىنىڭ پرەزيدەنتى الەكساندر لۋكاشەنكو ءوز اكىمشىلىگى قىزمەتكەرلەرىنىڭ تورتتەن ءبىرىن قىسقارتۋ تۋرالى جارلىققا قول قويدى. بۇل تۋرالى مەملەكەت باسشىسىنىڭ ءباسپاسوز قىزمەتىنە سىلتەمە جاساي وتىرىپ «بەلاپان» اگەنتتىگى حابارلاعان.
قۇجاتقا سايكەس پرەزيدەنت اكىمشىلىگى مەن ونىڭ قۇرىلىمدارى تۋرالى ەرەجەلەردىڭ جاڭا رەداكتسياسى دا بەكىتىلگەن. ءباسپاسوز قىزمەتىنىڭ حابارىندا اتاپ كورسەتىلگەندەي, مۇنداي شارا قىزمەتكەرلەر سانىن قىسقارتۋ جاعدايىندا پرەزيدەنت اكىمشىلىگىنىڭ ودان ارعى جۇمىسىنىڭ تيىمدىلىگىن قامتاماسىز ەتۋ ماقساتىن كوزدەيدى.
توپان سۋ قۇرباندارىنىڭ سانى ون بەسكە جەتتى
سوڭعى مالىمەتتەر بويىنشا, ورتالىق ەۋروپاداعى سۋ تاسقىنى سالدارىنان قازا بولعاندار سانى 15 ادامعا جەتكەن. قازىرگى ۋاقىتتا 4 ادام ءىز-ءتۇسسىز جوعالىپ كەتكەندەر قاتارىنا قوسىلىپ وتىر.
ون بەس ادامنىڭ سەگىزى چەحيا اۋماعىندا, تورتەۋى گەرمانيادا, ەكى ادام اۆستريادا جانە ءبىر ادام سلوۆاكيادا قازا تاپقان كورىنەدى. ال چەح قۇتقارۋشىلارى 19 مىڭ ادامنىڭ سۋ باسىپ كەتكەن اۋدانداردان باسقا جەرلەرگە كوشىرىلگەنى تۋرالى حابارلاپ وتىر. ەسكە سالا كەتەيىك, نوسەر جاۋىن سالدارىنان دۋناي جانە باسقا دا ورتالىق ەۋروپالىق وزەندەر جاعالاۋلارىنان شىعىپ, كوپتەگەن وڭىرلەر توپان سۋ استىندا قالۋدا.
ينتەرنەت ماتەريالدارى نەگىزىندە ازىرلەندى.
