شاراينا
سەنبى, 1 ماۋسىم 2013 2:01
وباماعا كۇدىكتى حات جولداندى
اقش پرەزيدەنتى باراك وباماعا كۇدىكتى حات جىبەرۋ ءىسى بويىنشا تەحاستا قازىرگى ۋاقىتتا قورعانىس مينيسترلىگىندە ازاماتتىق سالا قىزمەتكەرى بولىپ ىستەيتىن بۇرىنعى اسكەري قىزمەتشىدەن جاۋاپ الىنعان.
سەنبى, 1 ماۋسىم 2013 2:01
وباماعا كۇدىكتى حات جولداندى
اقش پرەزيدەنتى باراك وباماعا كۇدىكتى حات جىبەرۋ ءىسى بويىنشا تەحاستا قازىرگى ۋاقىتتا قورعانىس مينيسترلىگىندە ازاماتتىق سالا قىزمەتكەرى بولىپ ىستەيتىن بۇرىنعى اسكەري قىزمەتشىدەن جاۋاپ الىنعان.
نيۋ-بوستون قالاسىنىڭ تۇرعىنى بۇل ىستە رەسمي تۇلعا بولىپ تابىلمايدى, سوندىقتان ول تۇتقىنعا الىنعان جوق. پوليتسيانى توڭازىتقىشتا بەيمالىم زاتتىڭ تۇرعانىن كورگەن ونىڭ ايەلى شاقىرعان كورىنەدى. ايتا كەتۋ كەرەك, وباماعا جولدانعان كۇدىكتى حات تۋرالى 30 مامىر كۇنى بەلگىلى بولدى. مازمۇنى بويىنشا ول نيۋ-يورك مەرى مايكل بلۋمبەرگكە جونەلتىلگەن حاتتارعا ۇقساس كورىنەدى. پرەزيدەنتكە جولدانعان كونۆەرتتە ۋلى زاتتىڭ بار-جوعى ازىرگە بەيمالىم. ونى ساراپشىلار تەكسەرۋدە.
مولدوۆادا بيلىك كواليتسياسى قۇرىلدى
مولدوۆادا «پروەۋروپالىق بيلىك كواليتسياسىن» قۇرۋ تۋرالى كەلىسىمگە قول قويىلدى. ونىڭ قۇرامىنا ليبەرالدى-دەموكراتيالىق پارتيا, دەمپارتيا جانە ليبەرالدى پارتياداعى «رەفورماتورلار» توبى كىرىپ وتىر.
كواليتسيا قۇرۋ تۋرالى كەلىسىمگە ليبەرال-دەموكراتتار ليدەرى ۆلاديمير فيلات, دەمپارتيا توراعاسى ماريان لۋپۋ جانە «ليبەرال-رەفورماتورلار» باسشىسى يون حادىركە قول قويعان كورىنەدى. بۇل ساياسي داعدارىسقا نۇكتە قوياتىندىقتان ەل ءۇشىن وتە ماڭىزدى ءسات, دەپ اتاپ كورسەتكەن ۆلاديمير فيلات قۇجاتقا قول قويعاننان كەيىن. ماريان لۋپۋ ءوز كەزەگىندە بۇل شەشىمنىڭ باستالعان رەفورمالاردى جالعاستىرۋعا جاعداي جاسايتىنىن ايتسا, يون حادىركە اتالعان وقيعانىڭ مەرزىمىنەن تىس سايلاۋدىڭ الدىن الۋعا جانە ەۋروپالىق باعىتتى ساقتاۋعا مۇمكىندىك بەرەتىنىن اتاپ كورسەتكەن.
«حيزبوللانىڭ» سيريادان كەتۋىن تالاپ ەتۋدە
اقش وكىمەتى ليۆاندىق «حيزبوللا» شيتتىك توبىنىڭ ءوز جاۋىنگەرلەرىن شۇعىل تۇردە سيريادان شىعارۋىن تالاپ ەتتى.
ينتەرنەت-باق-تاردىڭ حابارلاۋىنشا, مەملەكەتتىك دەپارتامەنتتىڭ رەسمي وكىلى دجەن پساكي «حيزبوللا» ليدەرى شەيح حاسان ناسرۋللانىڭ وزدەرىنىڭ سيريادا ۇكىمەت اسكەرلەرى جاعىندا قاقتىعىستارعا قاتىساتىنى تۋرالى مالىمدەگەنىن ايىپتاعان. پساكيدىڭ ايتۋىنشا, «حيزبوللا» سودىرلارىنىڭ سيرياداعى داۋ-جانجالعا قاتىسۋى ورىندى بولىپ تابىلمايدى. اقش مۇنى «احۋالدى مەيلىنشە ۋشىقتىرۋ» رەتىندە باعالاپ وتىر.
رەسەي سىناعان قارار اقىرى قابىلداندى
ۇۇ-نىڭ ادام قۇقىقتارى جونىندەگى كەڭەسى رەسەي تاراپىنان سىنعا ۇشىراعان سيرياداعى سوعىس قيمىلدارىنا شەتەلدىك ازاماتتاردىڭ قاتىسۋىن ايىپتايتىن قاراردى قابىلدادى.
وعان كەڭەستىڭ 36 مۇشەسى قولداپ داۋىس بەرسە, 1 ادام قارسى جانە 8 ادام قالىس قالعان. اقش, تۇركيا جانە كاتار ازىرلەگەن قارار سيريا رەجىمى جاعىندا كۋسەيردە شايقاسىپ جۇرگەن شەتەلدىك جاۋىنگەرلەردىڭ وسى ىسكە ارالاسۋىن ايىپتايدى ءارى كۋسەيردە ادامداردىڭ جاپپاي قازا بولۋىنا كىنالىلەردى جاۋاپكەرشىلىككە تارتۋعا شاقىرادى. سونداي-اق, قۇجات اۆتورلارى بۇۇ جانە گۋمانيتارلىق اگەنتتىك وكىلدەرىنىڭ بارلىق بەيبىت تۇرعىندارعا ەمىن-ەركىن بارۋىنا جاعداي تۋعىزۋدى تالاپ ەتۋدە.
جاپونيا قارۋلى كۇشتەردى رەفورمالاماق
جاپونيانىڭ بيلىكتەگى ليبەرال-دەموكراتيالىق پارتياسىنىڭ ۇلتتىق قورعانىس كەڭەسى ەلدىڭ قارۋلى كۇشتەرىندەگى ءىرى رەفورما جوباسىن رەسمي تۇردە بەكىتتى. ول قارسىلاستىڭ اۋماعىندا اسكەري بازالارعا سوققى جاساۋ, شالعاي جاتقان ارالداردى قورعاۋ ءۇشىن تەڭىز جاياۋ اسكەرىن قۇرۋ, سونداي-اق زىمىرانعا قارسى قورعانىستىڭ تيىمدىلىگىن ارتتىرۋ مۇمكىندىكتەرىن قاراستىرادى. تاياۋداعى ايلاردا جوبا جاپون ۇكىمەتىنە ۇسىنىلاتىن بولادى. بيلىكتەگى پارتيانىڭ ۇسىنىستارىندا ەل كونستيتۋتسياسىنا وسى ماقساتتا وزگەرىس ەنگىزۋ قاجەتتىگى دە اتاپ كورسەتىلگەن. ول بويىنشا ەل اسكەرى «ۇلتتىق قورعانىس ارمياسى» دەپ اتالۋى ءتيىس. ال قازىرگى ۋاقىتتا نەگىزگى زاڭدا ەلدىڭ اسكەري الەۋەتتەن باس تارتاتىندىعى تۋرالى ەرەجە بار.
كانادا يرانمەن قارىم-قاتىناسىن توقتاتپاق
كانادا تەگەراننىڭ يادرولىق باعدارلامانى جۇزەگە اسىرۋدان باس تارتپاۋىنا بايلانىستى يرانمەن اراداعى بارلىق يمپورتتىق جانە ەكسپورتتىق وپەراتسيالارعا تىيىم سالدى.
بۇل تۋرالى كانادا سىرتقى ىستەر ءمينيسترى دجون بەرد حابارلاعان. ونىڭ ايتۋىنشا, وتتاۆا سونىمەن بىرگە «قارا تىزىمگە» سانكتسيانىڭ كۇشى جۇرەتىن يراندىق جەكە جانە زاڭدى تۇلعالاردى, ۇيىمدار مەن كومپانيالاردى دا كىرگىزگەن. ازىرگە ونداي ادامدار سانى 112 بولىپ وتىر. ولاردىڭ كانادا بانكتەرىندەگى اكتيۆتەرىنە شەكتەۋ قويىلادى جانە كانادالىقتاردىڭ يراندىقتارمەن ىسكەرلىك بايلانىس ورناتۋىنا تىيىم سالىناتىن بولادى.
جاۋىنگەر روبوتتار قانشالىقتى قاۋىپتى؟
بۇۇ-نىڭ جەنەۆادا وتەتىن ادام قۇقىقتارى جونىندەگى كەڭەسىنىڭ كەزەكتى وتىرىسىنا ارنايى بايانداما ازىرلەندى. وندا بريتانيا, اقش جانە يزرايل اسكەري ۆەدومستۆولارى ازىرلەگەن ادام ولتىرەتىن روبوتتاردى پايدالانۋعا ۋاقىتشا تىيىم سالۋ جونىندە ۇندەۋ بار.
دروندارعا قاراعاندا جاۋىنگەرلىك روبوتتار شايقاس الاڭىندا وپەراتورلاردى قاجەت ەتپەيدى, ولار قانداي دا ءبىر نىسانانى جويۋ تۋرالى شەشىمدى دەربەس قابىلداي الادى. ال ادام ولتىرەتىن روبوتتاردى جاساۋشىلار بولسا ولار سولداتتاردىڭ ورنىنا قاۋىپتى جۇمىستاردى اتقاراتىندىقتان, ءىس جۇزىندە ادامداردىڭ ومىرلەرىن اراشالايدى دەگەن دالەلدەر كەلتىرۋدە. ولاردىڭ قارسىلاستارى بولسا روبوتتاردىڭ اسكەري ادامداردى بەيبىت تۇرعىنداردان ايىرا المايتىندىعىن ايتۋدا.
جاڭا ۆيرۋسقا ەم تابىلماي تۇر
دۇنيەجۇزىلىك دەنساۋلىق ساقتاۋ ۇيىمى جاڭا كوروناۆيرۋستان تاعى دا بەس ادامنىڭ قايتىس بولعانىن تىركەگەن.
ولاردىڭ تورتەۋى ساۋد ارابياسىندا, بىرەۋى فرانتسيادا وسى ۆيرۋستى جۇقتىرعان كورىنەدى. وسىلايشا, دۇنيەجۇزىلىك دەنساۋلىق ساقتاۋ ۇيىمىنىڭ مالىمەتى بويىنشا, 2012 جىلدىڭ قىركۇيەگىنەن بەرى الەمدە جاڭا كوروناۆيرۋستان بارلىعى 27 ادام اجال قۇشقان. دسۇ جاڭا ۆيرۋس پەن ونىڭ جۇعۋ جولدارى تۋرالى ازىرگە ونشا ەشتەڭەنىڭ ءمالىم ەمەس ەكەنىن مويىنداپ وتىر.
ينتەرنەت ماتەريالدارى نەگىزىندە ازىرلەندى.
