بولاشاق كاسىپكەرلەرمەن ارنايى كوميسسيا مۇشەلەرى ماڭعىستاۋ وبلىسى «اتامەكەن» كاسىپكەرلەر پالاتاسىندا كەزدەستى. سولاردىڭ ءبىرى- جانار ىبىراەۆا. ول ءۇش بالانىڭ اناسى. ۇزاق جىلدار جۇمىسسىزدار قاتارىندا. ورتالىقتان شالعاي ورنالاسقان اقشىمىراۋ اۋىلىندا 200 ءتۇتىن بار. شاعىن اۋىلدان جۇمىس تابۋ وڭاي ەمەس. سوندىقتان دا ول شاعىن كونديتەر تسەحىن اشۋدى جوسپارلايدى. اۋىلدا تاتتىلەر پىسىرەتىن بىردە-ءبىر كاسىپكەر جوق. قازىر ۇيدە تاپسىرىس قابىلداپ ءجۇر. گرانت ارقىلى الاتىن 250 مىڭ تەڭگەگە زاماناۋي ەلەكتر پەشى, ميكسەر, ءتاتتى توقاشتاردىڭ قالىپتارى سىندى قۇرال-جابدىقتار الماقشى. جانار «باستاۋ» جوباسىنىڭ تۇلەگى.
ال, جانار قاراساەۆا شەتپە اۋىلىنان تىگىن شەبەرحاناسىن اشقىسى كەلەدى. كورپە-توسەك تىگۋدى بالا كەزدەن ادەت قىلعان انا ەندى ونى كاسىپ كوزىنە اينالدىرعىسى كەلەدى. گۇلجيحان امانعاليەۆا بولسا, شەتپە اۋىلىنان سۇلۋلىق سالونىن اشۋدى جوسپارلايدى. عيماراتتى جالعا الىپ, ءبىر ادامدى جۇمىسپەن قامتۋ ويىندا بار. بەت بوياۋ كاسىبىمەن ءبىر اپتادا 16 ادامدى, ايىنا شامامەن 65 ايەل قابىلداپ, 100 مىڭ تەڭگەدەن استام تابىس تاباتىنىنا سەنىمدى. اقتاۋلىق جانەركە قۇرمەتقىزى فوتو-ۆيدەو قىزمەتىن ۇسىنباقشى. 250 مىڭ تەڭگەگە مونتاج جاساۋ ءۇشىن اسا قاجەتتى نوۋتبۋك, جادى كارتالارىن الادى. ەكى بالانىڭ اناسى پەرزەنتحانادان شىعارۋ ساتىنەن بەينە-فوتو ەستەلىكتەرىن كاسىپكە اينالدىرماق.
-قازىر ادامداردىڭ تالعامى وزگەردى. نارەستەنىڭ دۇنيەگە كەلۋ ساتىنەن باستاپ ۆيدەوعا تۇسىرۋگە تاپسىرىس بەرىپ جاتادى. سودان ۇيىنە شىققانعا دەيىنگى ارالىقتان فوتو-ۆيدەو توپتاما جاسايمىن. مۇنان باسقا ماڭعىستاۋداعى تۋريزم باعىتىن ەستەلىككە قالدىرعىم كەلەدى. تۋريستەردى وڭىردەگى نەبىر ادەمى جەرلەرگە ساياحاتقا اپارىپ, اۋليەلى ورىنداردان قايتالانباس كادرلار جاساۋعا بولادى, دەيدى فوتوگراف قىز.
كوميسسيا توراعاسى سەرىك گۋسمان: «بۇگىنگى كوميسسيا وتىرىسىندا قارالعان 5 جۇمىسسىزدىڭ دا جوبالارى ماقۇلداندى. وتباسىنا ناپاقا تاۋىپ, كاسىپ باستاسا ۇلكەن ءىستىڭ بىتكەنى. «باستاۋ» جوباسىمەن ءبىلىم العان بەسەۋ شاعىن بيزنەستىڭ دامۋىنا ات سالىساتىن بولادى. ارقايسىسىنا بەرىلەتىن 250 مىڭ تەڭگە قايدا جۇمسالدى؟ ولاردىڭ العان قۇرال-جابدىقتارى جاساعان كاسىپتەرى ءبىر جىل بويى تەكسەرىلىپ وتىرادى. «اتامەكەن» كاسىپكەرلەر پالاتاسى الەۋمەتتىك جاعدايى از قامتىلعان جانداردىڭ اياققا تۇرىپ كەتۋىنە ۇلكەن مۇمكىندىك جاساپ وتىر, دەيدى.
