شاراينا
بەيسەنبى, 16 مامىر 2013 1:35
ەرەۋىلدەردى توقتاتۋ باعىتىنداعى قادام
بەيبىت پروتسەسس شەڭبەرىندە تۇركيادان جىبەرىلگەن كۇرد سودىرلارىنىڭ ءبىرىنشى توبى 14 مامىر كۇنى سولتۇستىك يراكقا كەلدى. توپتى كۇردىستان جۇمىسشى پارتياسىنىڭ وكىلدەرى قۋانىشپەن قارسى العان.
بەيسەنبى, 16 مامىر 2013 1:35
ەرەۋىلدەردى توقتاتۋ باعىتىنداعى قادام
بەيبىت پروتسەسس شەڭبەرىندە تۇركيادان جىبەرىلگەن كۇرد سودىرلارىنىڭ ءبىرىنشى توبى 14 مامىر كۇنى سولتۇستىك يراكقا كەلدى. توپتى كۇردىستان جۇمىسشى پارتياسىنىڭ وكىلدەرى قۋانىشپەن قارسى العان.
بۇل سيمۆولدىق قادام تۇركيادا وسىدان ونداعان جىلدار بۇرىن باستالعان ەرەۋىلدەردى توقتاتۋعا باعىتتالىپ وتىر. كورگەندەردىڭ ايتۋلارىنا قاراعاندا, ارقالارىنا قارۋ-جاراق پەن ريۋكزاك اسىنعان 13 ەركەك پەن ايەل تۇرىك-يراك شەكاراسىنداعى مەتينا تاۋىنا جاقىن جەردە ورنالاسقان حەرور اۋدانىنا كەلگەن. سودىرلاردىڭ تۇرىك كۇردتەرىنىڭ تۇرمەدەگى ليدەرى ابدۋللا ودجالان 8 مامىردا وق اتۋدى توقتاتۋ تۋرالى مالىمدەمە جاساعان سوڭ, تۇركيانىڭ وڭتۇستىك-شىعىسىنداعى ءوز پوزيتسيالارىن تاستاپ شىعا باستاعانىن ايتا كەتۋ قاجەت.
ەسەرسوق ارەكەت
ينتەرنەت جەلىسىندە وسىدان بىرنەشە كۇن بۇرىن جان تۇرشىكتىرەرلىك بەينەروليك ورنالاستىرىلعان. وندا «ومار ءال-فارۋك بريگاداسى» اتتى ەرەۋىلشىلەر وتريادىنىڭ كوشباستاۋشىلارىنىڭ ءبىرى ابۋ ساككاردىڭ قازا تاپقان ۇكىمەت اسكەرلەرى جاۋىنگەرىنىڭ ىشكى ورگاندارىن سول جەردە جەپ قويۋ ءۇشىن كەسىپ الىپ جاتقانى بەينەلەنگەن.
ەرەۋىلشىلەر كومانديرى «اللا اتىمەن انت ەتەمىن, ءبىز سەندەردىڭ جۇرەكتەرىڭدى ج ۇلىپ الىپ, جەپ قوياتىن بولامىز», دەگەن سوزدەر ايتىپ, ءوز ارىپتەستەرىن دە وسىنداي ارەكەتكە بارۋعا شاقىرعان. حالىقارالىق بۇقارالىق اقپارات قۇرالدارىنىڭ مالىمەتتەرى بويىنشا, اتالعان بەينەروليكتەگى كاننيباليزم اكتىسى وسىدان بىرنەشە اپتا بۇرىن ورىن العان كورىنەدى. بەينە كورىنىس كەڭ كولەمدى قوعامدىق رەزونانس تۋعىزىپ, كوپتەگەن حالىقارالىق ۇيىمدار وكىلدەرى ونى ايىپتاۋدا.
بەرلۋسكونيدىڭ تۇرمەگە قامالۋى مۇمكىن
76 جاستاعى «سۋعا سالسا باتپايتىن, وتقا سالسا جانبايتىن» سيلۆيو بەرلۋسكونيگە تۇرمەگە ءتۇسۋ قاۋپى ءتونىپ تۇرعان سياقتى. يتاليا پروكۋراتۋراسى كامەلەتكە تولماعان جەزوكشە كاريما ماحرۋگتىڭ قىزمەتىن پايدالانعانى ءۇشىن سوتتان ەلدىڭ ەكس-پرەمەرىن 6 جىلعا باس بوستاندىعىنان ايىرۋدى سۇراپ وتىر.
2011 جىلدىڭ قاراشاسىندا ءوزىن وتستاۆكاعا كەتۋگە ءماجبۇر ەتكەن وسى ءىس شەڭبەرىندە بەرلۋسكونيگە قىزمەت جاعدايىن اسىرا پايدالاندى دەگەن ايىپ تاعىلىپ, پروكۋرورلار وعان ءومىرىنىڭ سوڭىنا دەيىن مەملەكەتتىك قىزمەت اتقارۋعا تىيىم سالماق نيەتتە. ەكس-پرەمەردىڭ قورعاۋشىسىنا ءسوز ماۋسىم ايىنىڭ باسىندا بەرىلمەك. ال ۇكىم سول ايدىڭ سوڭىندا شىعادى دەپ كۇتىلۋدە.
ساياساتتاعى سايكەسسىزدىك كورىنىسى
سولتۇستىك كورەيا وڭتۇستىك كورەيا پرەزيدەنتى پاك كىن حەنىڭ پحەنيانعا قاتىستى ساياساتىن ول كورەي تۇبەگىندەگى داعدارىس احۋالىن تولىق تۇسىنبەيتىندىگىن كورسەتتى, دەي وتىرىپ «وعاش» ساياسات دەپ اتاعان. بۇل تۋرالى سولتۇستىككورەيالىق باق-تارعا سىلتەمە جاساي وتىرىپ, رەنحاپ اگەنتتىگى حابارلاعان كورىنەدى.
پاك كىن حە جوعارىدا كەلتىرىلگەن ءسوزدى اقش-قا ءوزىنىڭ ساپارى كەزىندە وتكەن اپتادا ايتقان بولاتىن. ول وتكەن تاريحقا قۇرمەتپەن قاراي وتىرىپ, ءوڭىردىڭ ۇيلەسىمدى دامۋىن قالايتىنىن جەتكىزگەن. ال, كحدر-عا قاتىستى وڭتۇستىك كورەيا مەملەكەتىنىڭ باسشىسى ۇلتتار قوعامداستىعىنىڭ تولىققاندى مۇشەسى بولۋ ءۇشىن پحەنيان «دۇرىس تاڭداۋ» جاساۋى كەرەك دەپ اتاپ كورسەتكەن-ءدى. سولتۇستىككورەيالىقتارعا دا ءدال وسى ءسوز ۇناماي قالسا كەرەك.
66-شى كانن فەستيۆالى اشىلدى
فرانتسيادا كينو ونەرى سالاسىنداعى ەڭ باستى وقيعا – 66-شى كانن فەستيۆالى اشىلدى. كينوبايقاۋ ۇلكەن شۋ تۋىنداتقان فرەنسيس سكوتت فيتسدجەرالدتىڭ رومانى بويىنشا تۇسىرىلگەن « ۇلى گەتسبي» فيلمىنەن باستالادى. ەسكە سالا كەتەيىك, باستى رولدە لەوناردو دي كاپريو ويناعان.
بيىل ستيۆەن سپيلبەرگ جيۋريگە توراعالىق ەتسە, وعان نيكول كيدمان, كريستوف ۆالتس, ەنگ لي جانە باسقا دا كينو قايراتكەرلەرى كومەك كورسەتپەك. كونكۋرسقا 20 كينولەنتا قاتىساتىن بولادى. ولاردىڭ قاتارىندا رومان پولانسكيدىڭ «بىلعارى كيگەن ۆەنەرا», اعايىندى كوەندەردىڭ «ليۋين دەۆيستىڭ ىشىندە», ستيۆەن سپيلبەرگتىڭ «كاندەليابرلەر ءۇشىن», فرانسۋا وزوننىڭ «بارلىعى ون جەتى» جانە باسقا دا كينوفيلمدەر بار. 15 مامىردا باستالعان حالىقارالىق كينوفەستيۆال وسى ايدىڭ 27-نە دەيىن جالعاساتىن بولادى.
نيگەريادا توتەنشە جاعداي جاريالاندى
راديكالدى يسلاميستەردىڭ نيگەريا اۋماعىنداعى ىقپالى بارعان سايىن ارتا تۇسۋدە. ەل پرەزيدەنتى گۋدلاك دجوناتتان بىرنەشە شتاتتا توتەنشە جاعداي جاريالاعانىمەن, ازىرگە گۋبەرناتورلاردى قىزمەتتەرىنەن الۋدى جوسپارلاپ وتىرماعان كورىنەدى.
جەرگىلىكتى جۋرناليستەرمەن كەزدەسۋدە نيگەريا پرەزيدەنتى اداماۆا, بورنو جانە يوبە شتاتتارىندا توتەنشە جاعدايلار جاريالانعانىن, وعان ءوزى تەررورشىلار دەپ سانايتىن يسلاميستىك توپتاردىڭ قىزمەتى سەبەپكەر بولعانىن ايتقان. ەرەۋىلشىلەر مەن تەررورشىلار مەملەكەتتەگى جاعدايدى جۇيەلى تۇردە تۇراقسىزداندىرۋعا تالپىنۋدا جانە ونىڭ جاۋىنگەرلىك قابىلەتىن سىنعا الۋدا, دەپ اتاپ كورسەتكەن پرەزيدەنت. ايتا كەتۋ كەرەك, نيگەريا وڭىردەگى حالقى ەڭ كوپ ەل, مۇندا 160 ميلليون ادام تۇرادى, ولاردىڭ ۇستاناتىن دىندەرى دە سان-الۋان.
وق اتۋشىنىڭ كىم ەكەنى انىقتالدى
جاڭا ورلەان قالاسىنىڭ پوليتسياسى ۇستىمىزدەگى جىلدىڭ 12 مامىرىندا انا كۇنىنە ارنالعان قالالىق شەرۋدە وق اتتى دەگەن كۇماندىلەردىڭ كىم ەكەندىگىن انىقتادى. وندا 2 بالانى قوسقاندا 19 ادام جاراقاتتانعان بولاتىن.
پوليتسيانىڭ مالىمەتتەرىنە قاراعاندا, وق اتۋشى – 19 جاسار اكەين سكوتت. ونى قايعىلى وقيعا كۋاگەرلەرى تانىعان كورىنەدى. ازىرگە كۇدىكتى بوستاندىقتا ءجۇر. سونىمەن بىرگە, پوليتسيا قىزمەتكەرلەرىنىڭ ايتۋىنشا, ەسىرتكى مەن قارۋ-جاراق تاراتۋ جانە تۇتقىنعا الۋ كەزىندە قارسىلىق كورسەتۋلەردى قوسا العاندا, ا.سكوتتىڭ موينىندا كوپتەگەن قىلمىستار بار كورىنەدى. قۇقىق قورعاۋ ورگاندارى قىزمەتكەرلەرىنىڭ ءۇش مەكەنجايدى باقىلاۋدا ۇستاعانىنا قاراماستان, ازىرگە قىلمىسكەردى ۇستاۋدىڭ ءساتى تۇسپەي وتىر.
ينتەرنەت ماتەريالدارى نەگىزىندە ازىرلەندى.
