العاش بولىپ ءسوز العان Nur Otan پارتياسىنىڭ حاتشىسى فارحاد قۋانعانوۆ بيىلعى پرەزيدەنت سايلاۋىنىڭ تاۋەلسىز قازاقستان تاريحىنداعى ماڭىزى زور وقيعا ەكەنىنە نازار اۋداردى. سونداي-اق ەلىمىزدە جوعارى بيلىكتىڭ بەيبىت جاعدايدا, ءوركەنيەتتى تۇردە جانە دەموكراتيالىق قاعيدالارعا ساي اۋىسۋى قازاقستاننىڭ دامۋىنا تىڭ سەرپىن بەرەتىنىن ايتتى. ودان بولەك, ول سايلاۋعا حالىقتىڭ بەلسەندى قاتىسۋى مەن سايلاۋالدى ناۋقان كەزىندەگى الەۋمەتتىك جەلىلەردىڭ ماڭىزىن دا تىلگە تيەك ەتتى.
– قازاقستان حالقى قاسىم-جومارت كەمەل ۇلى توقاەۆقا داۋىس بەرۋ ارقىلى ەلباسى ساياساتىنىڭ ساباقتاستىعىن تاڭدادى. حالىق ءادىل ساياسات پەن بارلىق سالانىڭ ورلەپ, وركەندەۋى ءۇشىن داۋىس بەردى. سوندىقتان ۇلىقتاۋ راسىمىندە جاڭادان سايلانعان پرەزيدەنتىمىز انىقتاپ بەرگەن دامۋدىڭ ون باعىتى ەلباسىنىڭ ستراتەگيالىق ساياساتىنا تابان تىرەيدى, – دەدى ف.قۋانعانوۆ.
Nur Otan Trends الاڭىنا كەلۋشىلەر كۇن تارتىبىندەگى قوعامدىق-ساياسي اسپەكتىلەر مەن ەل پرەزيدەنتىنىڭ تاپسىرمالارىنا نازار اۋداردى. اتاپ ايتقاندا, الداعى ۋاقىتتا ەلىمىزدى قانداي وزگەرىستەر كۇتىپ تۇرعانى, الەۋمەتتىك-ەكونوميكالىق باستامالاردىڭ ماڭىزى اڭگىمەگە ارقاۋ بولدى.
– قاسىم-جومارت توقاەۆ ۇلىقتاۋ راسىمىندە ەلىمىزدىڭ الدىندا تۇرعان ماسەلەلەردى ايتىپ ءوتتى. بىرىنشىدەن, بۇل قازاقستاننىڭ ءۇشىنشى جاڭعىرۋىنىڭ جالعاسى بولادى. باستى ماقسات – قازاقستاندىقتاردىڭ ءومىر ءسۇرۋ ساپاسىن جانە تابىسىن كوتەرۋ, – دەدى پارتيا حاتشىسى.
سونىمەن قاتار ءىس-شارا بارىسىندا ساياسي جاڭعىرۋ ماسەلەسى دە نازاردان تىس قالعان جوق. ساراپشىلار جاڭا جاعدايدا بيلىك پەن حالىق اراسىنداعى ديالوگتى كۇشەيتۋ جولدارىن تالقىعا سالدى.
– قازاقستان پرەزيدەنتى قوعامداعى ءتۇرلى الەۋمەتتىك توپتارمەن بايلانىس ورناتاتىن ۇلتتىق قوعامدىق سەنىم كەڭەسىن قۇرۋدى تاپسىردى. بۇل باستاما ازاماتتىق قوعام مەن بيلىك اراسىنداعى ديالوگتى كۇشەيتەتىن ناقتى قادام, – دەدى ول.
ساراپشىلار قاسىم-جومارت توقاەۆتىڭ ۇلتتىق كەڭەستىڭ قۇرامىن انىقتاۋدى تاپسىرعانىنا نازار اۋدارىپ, وعان ساياسي پارتيالاردىڭ جەتەكشىلەرى مەن ازاماتتىق سەكتور وكىلدەرى دە ەنگىزىلۋى قاجەتتىگىن ايتتى. «Amanat» قوعامدىق بىرلەستىگىنىڭ وكىلى ساياسات نۇربەك بۇل ماسەلەگە بارىنشا جاۋاپكەرشىلىكپەن قاراۋ قاجەتتىگىن تىلگە تيەك ەتتى.
– بۇل كەڭەس ناقتى جۇمىس ىستەۋ كەرەك. ونىڭ قۇرامىندا قوعامدا بەدەلى بار, ءسوزى ءوتىمدى, سەنىمگە يە ءارتۇرلى توپتىڭ وكىلدەرى بولۋ قاجەت, – دەدى ساياسات نۇربەك. ونىڭ ايتۋىنشا, بۇل قوعامنىڭ بيلىككە دەگەن سەنىمىن نىعايتادى. سونداي-اق بارلىق باعدارلامالاردىڭ جۇزەگە اسۋىنىڭ كەپىلى بولادى.
پىكىرتالاس الاڭىندا ساراپشىلار جۇمىستىڭ ەڭ نەگىزگى باعىتى سىبايلاس جەمقورلىقپەن كۇرەسۋ دەگەن توقتامعا كەلدى.
– ەگەر مەملەكەتتىك قىزمەتشى وزىندەگى كوپ مولشەردەگى اقشانىڭ قايدان كەلگەنىن ءتۇسىندىرىپ بەرە الماسا, بۇل قاراجاتتى ودان الىپ قويۋ كەرەك. ەكىنشى ماسەلە, كىرىس جايىنداعى جالپى دەكلاراتسيانى ەنگىزۋ. بۇل ماسەلە 2017 جىلدان بەرى شەشىمىن تاپپاي كەلە جاتىر, – دەپ اتاپ ءوتتى تۇڭعىش پرەزيدەنت قورى جانىنداعى اەسي ساراپشىسى, ساياساتتانۋ عىلىمدارىنىڭ دوكتورى جاقسىلىق ءسابيتوۆ.
ايتا كەتەيىك, Nur Otan Trends پىكىرتالاس الاڭىنىڭ بۇل وتىرىسىنا مودەراتور رەتىندە «Talap» قولدانبالى زەرتتەۋلەر ورتالىعىنىڭ ديرەكتورى راحىم وشاقباەۆ, «ەكونوميكالىق زەرتتەۋلەر ينستيتۋتى» اق-نىڭ باسقارما توراعاسى ەرلىك قاراجان, ساياسي شولۋشى عازيز ابىشەۆ, «شاتالوۆ» تەلەگرام-كانالىنىڭ اۆتورى, جۋرناليست نيكيتا شاتالوۆ, «Sayasat.org» پورتالىنىڭ شەف-رەداكتورى باۋىرجان تولەگەنوۆ جانە بىلىكتى ەكونوميست سەرگەي دومنين قاتىستى.
