بيىل قازاقستان جازۋشىلار وداعىنىڭ قۇرىلعانىنا 85 جىل تولىپ وتىر. تاريحى تەرەڭدە جاتقان رۋحانيات ورداسى ەل بىرلىگى مەن قوعام دامۋىنا قوماقتى ۇلەس قوسىپ كەلەدى. كەزدەسۋدە ايدا بالاەۆا ۇلتتىق رۋحاني الەۋەتتى ىلگەرىلەتۋ ىسىندە قالامگەرلەر قاۋىمى اۋقىمدى ءرول اتقاراتىنىن ايتا كەلىپ, پرەزيدەنت قاسىم-جومارت توقاەۆ شىعارماشىلىق وكىلدەرىنىڭ ەل ءۇشىن اتقارعان جۇمىستارىن جوعارى باعالايتىنىن جەتكىزدى.
«اقىندارىمىز بەن جازۋشىلارىمىز ءوزىنىڭ قالام قۋاتىن ۇلت يگىلىگىنە, مەملەكەت تاۋەلسىزدىگىن تۇعىرلى ەتۋگە ارنادى. تالاي يگى باستامالارعا سەرپىن بەرگەن «رۋحاني جاڭعىرۋ» باعدارلاماسىنىڭ جۇيەلى جۇزەگە اسۋىنا, ەلباسىنىڭ « ۇلى دالانىڭ جەتى قىرى» ماقالاسىنان تۋىندايتىن مىندەتتەردى جۇرتشىلىققا جەتكىزۋدە ولار اۋىزبىرلىك تانىتا ءبىلدى. تيىسىنشە مەملەكەت تە ادەبيەت پەن ونەردى ۇدايى قولداپ كەلەدى. وتكەن جىلى عانا «جاھانداعى زاماناۋي قازاقستاندىق مادەنيەت» جوباسى اياسىندا ەل تاريحىندا تۇڭعىش رەت ادەبيەتىمىزدىڭ پروزا جانە پوەزيا جانرىنداعى ىرگەلى تۋىندىلارى بۇۇ-نىڭ التى تىلىنە اۋدارىلدى. ولاردىڭ ءاربىرى كەمىندە 10 مىڭ تيراجبەن جارىق كورىپ, الەمنىڭ جەتەكشى ۋنيۆەرسيتەتتەرىنىڭ كىتاپحانالارىنا تەگىس تارادى»,- دەدى ايدا بالاەۆا.
ءوز كەزەگىندە ءسوز العان اقىن-جازۋشىلار دا بارشا وداق مۇشەلەرى اتىنان مەملەكەت باسشىسىنا العىسىن ءبىلدىرىپ, بۇل ولارعا الىس-جاقىن ايماقتارداعى كوپتەگەن شارۋانى وڭتايلى رەتتەۋگە كومەك كورسەتەتىنىن جەتكىزدى.
– جازۋشىلار وداعى بىلتىرعى جىلى حالىقارالىق دەڭگەيدە بىرنەشە ءىس-شارا ۇيىمداستىردى. الەمدىك استانالارعا ارنالعان ءداستۇرلى پوەزيا فەستيۆالىن, ازيا مەن ەۋروپا قالامگەرلەرى باس قوسقان حالىقارالىق فورۋم وتكىزدىك. ءاردايىم مەملەكەتتىڭ قولداۋىن سەزىنىپ كەلەمىز. كۇنى كەشە عانا جازۋشىلار وداعىنا قاراستى شىعارماشىلىق ءۇيى قايتا جاساقتالىپ, شيپاجايعا اينالدى.ۇلت ادەبيەتىنە جاساعان قامقورلىعى ءۇشىن قاسىمجومارت كەمەل ۇلىنا زور العىسىمىزدى بىلدىرەمىز», – دەيدى قازاقستان جازۋشىلار وداعىنىڭ باسقارما توراعاسى اقىن ۇلىقبەك ەسداۋلەت.
الماتى
