ماراپاتتاۋ ءراسىمى 13 ماۋسىمدا نۇر-سۇلتاندا IDC ءسىو Summit اياسىندا ءوتتى. مۇسىنشە تۇرىندەگى ماراپاتتى «الماتى قالاسىن دامىتۋ ورتالىعى» اق باسقارما ءتورايىمى جاننا تولەگەنوۆاعا IDس, EMEA ايماعى, اعا ۆيتسە-پرەزيدەنتى ستيۆەن فرانتسەن تابىس ەتتى.
IDC CIO Excellence Awards 2019 بايقاۋى يت-كاسىپقويلاردىڭ تۇجىرىمدامالاردى ازىرلەۋگە جانە ءوز ۇيىمدارىندا تسيفرلىق ترانسفورماتسيا سالاسىنداعى باستامالاردى تابىستى ىسكە اسىرۋعا قوسقان ۇلەسىن مويىنداۋ ماقساتىندا ۇيىمداستىرىلعان.
بيىل بايقاۋعا ورتالىق ازيا, ءازىربايجان جانە مونعوليادان اتاقتى يت-كوشباسشىلار قاتىستى.
جەڭىمپازداردى انىقتاۋ كەزىندە كەلەسى كريتەريلەر ەسكەرىلدى: كليەنتتەرگە قىزمەت كورسەتۋدە تسيفرلىق تەحنولوگيالاردى پايدالانۋ جانە بيزنەس-ۇدەرىستەردى جاقسارتۋ; كوپجوسپارلى ءوزارا ءىس-قيمىلدى دامىتۋ جانە فرونت-وفيستەن بەك-وفيسكە دەيىنگى ينتەگراتسيالانعان پروتسەسس.
الماتى قالاسى اكىمدىگىنىڭ «Open Almaty» قوعامدىق قابىلداۋى 2017 جىلى «Smart City» تۇجىرىمداماسىن ىسكە اسىرۋ اياسىندا قۇرىلعان. جوبانىڭ ماقساتى جەرگىلىكتى اتقارۋشى ورگانداردىڭ اشىقتىعىن ارتتىرۋ جانە قالا تۇرعىندارىنا ءتۇرلى ومىرلىك جاعدايلاردى شەشۋدە كومەك كورسەتۋ بولىپ تابىلادى. ءاربىر جۇگىنگەن ادام كەڭەس الىپ, اكىمدىكتىڭ, قالالىق باسقارمالاردىڭ, پروكۋراتۋرانىڭ, پوليتسيانىڭ, مەملەكەتتىك كىرىستەر دەپارتامەنتىنىڭ جانە ت.ب. اتىنا ءوتىنىش جولداي الادى.
Open Almaty-دا وتىنىشتەر جەكە كەلۋشىلەردەن بولەك, الەۋمەتتىك جەلىلەر (Facebook, Instagram, Twitter), http://open-almaty.kz ۆەب-پورتالى جانە 1308 بايلانىس ورتالىعى ارقىلى قابىلدانادى (ۇيالى تەلەفوننان قوڭىراۋ شالۋ تەگىن). بۇدان باسقا, پورتالدا قالالىق قىزمەتتەردىڭ جۇمىس جوسپارىمەن تانىسۋعا بولادى (كوشەلەردى, اۋلالاردى جوندەۋ, ساياباقتار مەن سكۆەرلەردى اباتتاندىرۋ). Open Almaty-دا قالا تۇرعىندارى مەن قوناقتارى, كاسىپكەرلەر رەسمي تىزىلىمگە ەنبەگەن قىزمەتتەردى الا الادى. قوعامدىق قابىلداۋدىڭ پورتالىندا ءتۇرلى سالالارداعى 700-گە جۋىق ومىرلىك جاعدايدىڭ قادامدىق الگوريتمدەرى ورنالاستىرىلعان: بالانى ءبىر مەكتەپتەن باسقاسىنا قالاي اۋىستىرۋعا بولادى, كوپبالالى وتباسىنان شىققان بالا ءۇشىن جازعى لاگەرگە جولدامانى قالاي الۋ كەرەك, جۇرگىزۋشى كۋالىگىن جوعالتقاندا نە ىستەۋ قاجەت, جوبالاۋ جۇمىستارىن جۇزەگە اسىرۋعا ليتسەنزيانى قالاي الۋ كەرەك, تولقۇجاتىن جوعالتقان كەزدە شەتەلدىك نە ىستەۋى ءتيىس جانە ت.ب. وسىنىڭ بارلىعى مەملەكەتتىك قىزمەتتەردى الۋدى جەڭىلدەتۋگە ءارى ساپاسىن جاقسارتۋعا مۇمكىندىك بەرەدى.
جالپى, Open Almaty جوباسى ىسكە قوسىلعاننان بەرى 140,7 مىڭنان استام ءوتىنىش كەلىپ ءتۇستى — وتىنىشتەردىڭ 60%-تەن استامى تەلەفون ارقىلى تۇسەدى. سوندىقتان بۇل جۇمىس كۇشەيتىلەدى — بيىل Open Almaty بازاسىندا بىرىڭعاي قالالىق بايلانىس ورتالىعى ىسكە قوسىلادى. قالانىڭ تىنىس-تىرشىلىگىن قامتاماسىز ەتەتىن بارلىق كوممۋنالدىق, اپاتتىق جانە سەرۆيستىك قىزمەتتەر 109 نومىرىنە بىرىكتىرىلەدى.
ەسكە سالساق, بۇعان دەيىن «Open Almaty» جوباسى سلوۆەنيادا وتكەن «ليۋبليانا فورۋم – 2017» بايقاۋىندا ۇزدىكتەر قاتارىنان كورىنىپ, وڭتۇستىك-شىعىس ەۋروپا ەلدەرى اراسىندا «قالالاردىڭ بولاشاعى» اتالىمى بويىنشا ەكىنشى ورىنعا يە بولدى. جىل سايىنعى جۇلدەنىڭ ماقساتى Smart City-ءدى دامىتۋ سالاسىنداعى جاڭاشىل جوبالاردى انىقتاۋ جانە كوتەرمەلەۋ بولىپ تابىلادى.
* IDC (International Data Corporation) – اقپاراتتى جانە كونسۋلتاتسيالىق قىزمەتتەردى جەتەكشى جەتكىزۋشى, اقپاراتتىق تەحنولوگيالار, تەلەكوممۋنيكاتسيا جانە تۇتىنۋ تەحنيكاسى نارىقتارىنداعى ءىس-شارالاردى ۇيىمداستىرۋشى. IDC يت-كاسىپقويلارىنا, باسشىلار مەن ينۆەستورلارعا تەحنيكانى ساتىپ الۋ جانە بيزنەس-ستراتەگيانى تاڭداۋ تۋرالى نەگىزدەلگەن شەشىمدەر قابىلداۋعا كومەكتەسەدى. IDC-ءدىڭ 110 ەلدەگى مىڭنان استام ساراپشىسى سالانىڭ الەمدىك, وڭىرلىك جانە جەرگىلىكتى دەڭگەيلەردەگى تەحنولوگيالارىن, ۇردىستەرى مەن مۇمكىندىكتەرىن زەرتتەيدى. 50 جىلدان استام ۋاقىت بويى IDC ءبىلىمى كومپانيا كليەنتتەرىنە اسا ماڭىزدى مىندەتتەردى شەشۋگە كومەكتەسىپ كەلەدى. IDC – الەمدىك يت-باسىلىمدار, زەرتتەۋلەر مەن مامانداندىرىلعان ءىس-شارالار نارىعىنداعى كوشباسشى IDG كومپانياسىنىڭ ەنشىلەس كاسىپورنى.
