بۇلار شوق باسپاي تىنبايتىن سىڭايلى
جۇما, 5 ءساۋىر 2013 2:08
كورەي تۇبەگىندەگى جاعداي ۋشىعىپ تۇر. ادەتتە ەكى ەل ەت قىزۋىمەن ءبىر-بىرىنە قاتتى ءسوز ايتىپ قالسا, اشۋ باسىلعان سوڭ, رايلارىنان قايتپاعانمەن, ساباسىنا تۇسەر ەدى. ال سولتۇستىك جانە وڭتۇستىك كورەيا ەلدەرى ارانداتۋشىلىق ايقايلارىن باسەڭدەتەر ەمەس.
جۇما, 5 ءساۋىر 2013 2:08
كورەي تۇبەگىندەگى جاعداي ۋشىعىپ تۇر. ادەتتە ەكى ەل ەت قىزۋىمەن ءبىر-بىرىنە قاتتى ءسوز ايتىپ قالسا, اشۋ باسىلعان سوڭ, رايلارىنان قايتپاعانمەن, ساباسىنا تۇسەر ەدى. ال سولتۇستىك جانە وڭتۇستىك كورەيا ەلدەرى ارانداتۋشىلىق ايقايلارىن باسەڭدەتەر ەمەس.
كورەيا حالىق-دەموكراتيالىق رەسپۋبليكاسى باسشىلارىنىڭ بوپسالىق مالىمدەمەلەرىنە جۇرتتىڭ ەتى ۇيرەنگەنمەن, كوزدەگەن مىلتىقتىڭ اتىلاتىن كەزى ءبىر كەلەدى دەگەندەي, كورەي تۇبەگىندەگى ەكى كورەيا اراسىنداعى سوعىس ءورتىنىڭ تۇتانىپ كەتەتىندەي ءتۇرى بار. اڭگىمە مىنادا: بۇرىن قىرىپ-جويامىن دەگەن ءسوز كوبىنە ءبىر جاعىنان ايتىلسا, ەندى ەكىنشى جاقتان دا ەستىلە باستادى.
وسى اپتانىڭ باسىندا وڭتۇستىك كورەيا قورعانىس ءمينيسترى كيم گۆان چجين ەل باسشىسى پاك كىن حەگە توتەنشە جاعدايداعى ارەكەتتىڭ جوسپارىن باياندادى. بۇل توتەنشە جاعداي ەكىنشى جاقتىڭ زىمىراندىق-يادرولىق سوققى جاساۋىنان كەيىن ەمەس, ونىڭ الدىن الۋعا بايلانىستى بولىپ وتىر. سولتۇستىك جاقتىڭ بوپسالاۋ ارەكەتتەرىن شىنعا بالاپ, الدىن الۋ ارەكەتىنە كىرىسىپ كەتسە, سويقان سوندا باستالادى. ءورت تۇتانعان سوڭ, ءوشىرۋ قيىن.
قازىر ەكى جاقتىڭ قايسىسى كوبىرەك كىنالى دەگەندى ايقىنداعاننان گورى قالايدا سول سوعىس دەگەن سويقاندى بولدىرماۋ جاعىن ويلاستىرعان ءجون عوي. سويتسە دە شىندىققا جۇگىنىپ, وسىناۋ جاعدايدىڭ قيىنداۋىنا كىم كوبىرەك «ەڭبەك» ءسىڭىرىپ جاتقانىن ايتپاسقا جانە بولمايدى. قانشا ۋاقىتتان بەرى سولتۇستىك كورەيا باسشىلىعىنىڭ ميليتاريستىك ارەكەتتەرىن بۇكىل حالىقارالىق قوعامداستىق ايىپتاپ وتىرعانى بەلگىلى. ءتىپتى سول حالىقارالىق قوعامداستىقتىڭ كەپىلدىگىنە سۇيەنىپ-اق بۇل ەلدىڭ ءوز قاۋىپسىزدىگىن قامتاماسىز ەتۋىنە تولىق مۇمكىندىگى بار ەدى. ونى پايدالانۋ ورنىنا پحەنيان جاڭا ارانداتۋشىلىق ارەكەتتەرگە جۇگىنەدى.
الىسقا بارماي, سوڭعى كەزدەگى ارەكەتتەرىنىڭ ءوزىن الىپ قاراعاندا دا, وعان ايقىن كوز جەتەدى. وسىدان ءبىر اپتا بۇرىن كيم چەن ىن زىمىراندىق اسكەرلەردى سوققى بەرۋگە دايىندىققا قويۋ جونىندە بۇيرىققا قول قويىپ, شابۋىل نىساندارىن اتاپ كورسەتتى. ودان كەيىن بۇرىن توقتاتىلعان يادرولىق رەاكتورلاردى ىسكە قوسۋعا نۇسقاۋ بەردى. ەكى ەلدىڭ كەسونداعى ورتاق كاسىپورنىنا وڭتۇستىك كورەيا قىزمەتكەرلەرىن كىرگىزۋدى توقتاتتى. وسىنىڭ ءبارى جاۋاپ ارەكەتتەرگە بارۋعا يتەرمەلەيدى.
پحەنياننىڭ ارانداتۋشىلىق ارەكەتتەرى جاۋاپسىز قالمايتىنى زاڭدى. سەۋل دە قانداي ارەكەتتەرگە باراتىنىن مالىمدەپ ۇلگەردى. اقش-تىڭ مالىمدەمەسى قاتقىل. مەملەكەتتىك حاتشى دجون كەرري اقش-تىڭ كحدر تاراپىنان جاسالىپ وتىرعان قاۋىپتەن ءوزىن جانە ءوزىنىڭ وداقتاستارى – وڭتۇستىك كورەيا مەن جاپونيانى قورعاۋ ءۇشىن مۇمكىن بولعان نارسەنىڭ ءبارىن جاسايتىنىن مالىمدەپ: «ءبىز بۇعان دايىنبىز, وعان تولىق مۇمكىندىگىمىز بار. مۇنى كحدر دا تۇسىنەدى دەپ ويلايمىن», دەگەندى ايتىپ تاستادى. بۇل سوزگە دالەل رەتىندە سول ايماققا امەريكالىق ەكى اسكەري كەمە جىبەرىلگەنى تۋرالى حابار دا ىلە-شالا تارادى.
سوعىس بولا قالسا, كىم جەڭەدى دەپ باس قاتىرماعان دا ءجون-اۋ. بۇل سوعىس ءۇشىنشى دۇنيەجۇزىلىك سوعىسقا اينالادى دەۋدىڭ دە ءجونى جوق. كحدر-داي ەلدىڭ جوسىقسىز ساياساتىن قۋاتتاپ, ونىڭ جاعىنا شىعىپ سوعىساتىندار تابىلا قويماس. سونداي-اق قازىرگى ەكونوميكالىق باسەكە قالاي دا ءۇشىنشى دۇنيەجۇزىلىك سوعىسقا اپارادى دەپ ساۋەگەيلىك جاساۋ دا نەگىزسىز. ەكونوميكالىق ماسەلەنى سوعىسپەن شەشۋدىڭ ۋاقىتى وتكەن.
سوعىس بولماسىن دەيىك. ونى بولدىرماۋعا مۇمكىندىك بار. بۇكىل الەم بولىپ سوعان اتسالىسۋى كەرەك.
ماماديار جاقىپ, «ەگەمەن قازاقستان».
