جەلى وتكىر, كۇن شۋاعى مول ماڭعىستاۋدا اتالعان تابيعات قۇبىلىستارىن پايدالانىپ, ستانسا ورناتامىن دەسە, مۇمكىندىك زور. سول سەبەپتى ماڭعىستاۋ وبلىسىندا جاڭارتىلمالى ەنەرگيا كوزدەرىن دامىتۋ باعىتىندا بىرنەشە جوبالار ىسكە اسىرىلۋدا. 2018 جىلدىڭ مامىر ايىنان باستاپ مۇنايلى اۋدانى باتىر اۋىلىندا قۋاتى 2 مۆت كۇن ەلەكتر ستانساسى پايدالانۋعا بەرىلسە, ەندى تۇپقاراعان اۋدانى اقشۇقىر اۋىلىندا قۇنى 800 ملن تەڭگەنى قۇرايتىن جەل ەلەكتر ستانساسى ىسكە قوسىلدى.
«BEST-Group NS» جشس كومپانياسى اتالعان ستانسا قۇرىلىسىن 2017 جىلدىڭ كۇز ايىندا باستاعان. مونتاج-قۇرىلىس جۇمىستارىن وتاندىق ماماندار جاساپ, زاۋىتتىڭ تۋربينالارى حالىقارالىق ساپا ستاندارتتارىنا سايكەس سەرتيفيكاتتالعان. قۋاتى 5 مۆت-تى قۇرايتىن كەشەننىڭ قۇرىلىسى بارىسىندا 11 جۇمىس ورنى اشىلدى, الداعى ۋاقىتتا جۇمىس ورنى 20-عا دەيىن جەتپەك.
– ماڭعىستاۋ وبلىسىنىڭ اكىمدىگى بىزگە تۇپقاراعان اۋدانىنان جەر تەلىمىن بەردى. «دامۋ» قورىنىڭ كەپىلدىگىمەن ءبىز سۋبسيديالاناتىن مولشەرلەمەمەن بانكتەن نەسيە الدىق. جوبانى شەتەلدىك كومپانيالار ينۆەستيتسيالاۋدا. اتاپ ايتقاندا, وسى جوبانىڭ سەرىكتەستەرى مەن ينۆەستورلارى امەريكالىق جانە رەسەيلىك كومپانيالار – Lone Star Renewable Energy Corp (اقش) جانە «ەنەرگوتەحسەرۆيس» جشق (رەسەي). جالپى جوبانى ىسكە اسىرۋداعى باستى ماقساتىمىز – جەل ەلەكتر ستانسالارىن پايدالانۋ ارقىلى نەگىزگى ەنەرگيا كوزدەرىن اۋىستىرۋ, قازاقستانداعى پارنيكتىك گاز قالدىقتارىن ازايتۋ, سول ارقىلى كليماتتىڭ وزگەرۋى تۋرالى بۇۇ-نىڭ نەگىزدەمەلىك كونۆەنتسياسىنا سايكەس جۇمىس ىستەۋ. ەندى ءبىر ايدان سوڭ ءبىز ءوز ونىمدەرىمىزدى ساتا باستايمىز. ءونىمدى ساتىپ الۋشىلار «ەسەپتەۋ جانە قارجى ورتالىعى» جشس بولماق. گەرمانيا ەلىندە جاسالعان قوندىرعىلار ارقىلى ستانتسيا, جەل قۋاتىن پايدالانۋ ناتيجەسىندە ەلەكتر ەنەرگياسىن ءوندىرىپ, وعان قاجەتتىلىكتى تولىق وتەيتىن بولادى. اقشۇقىر اۋىلىنىڭ تۇرعىندارىنا, سونداي-اق اۋىل ماڭىنداعى ءوندىرىس وشاقتارى مەن جىلىجايلارعا ەلەكتر قۋاتى تاپشىلىعىن جويادى, – دەيدى جوبانىڭ دامۋ جونىندەگى ديرەكتورى گۇلنار ءابيتوۆا.
جاڭا نىساننان باسقا تۇپقاراعان اۋدانى فورت-شەۆچەنكو قالاسىندا ەكى بىردەي جوبا ىسكە اسپاق. قازىرگى تاڭدا ماۋسىم ايىندا پايدالانۋعا بەرىلەتىن 42 مۆت كۇن ەلەكتر ستانساسى مەن جىل سوڭىندا ىسكە قوسىلاتىن 43 مۆت جەل ەلەكتر ستانساسىنىڭ قۇرىلىس-مونتاجداۋ جۇمىستارى جۇرگىزىلۋدە.
– سونداي-اق قازىرگى تاڭدا ەنەرگەتيكا مينيسترلىگىمەن ءۇش جوبانى جۇزەگە اسىرۋ بويىنشا جۇمىس جاساقتالىپ جاتىر. بەينەۋ, جەتىباي جانە شەتپە اۋىلدارىندا قۋاتى 10-15 مۆت-تى قامتيتىن جەل جانە كۇن ەلەكتر ستانساسىنىڭ كەشەندى جۇمىستارىنىڭ جوسپارى دايىندالۋدا, – دەيدى ماڭعىستاۋ وبلىسىنىڭ ەنەرگەتيكا جانە تۇرعىن-ءۇي كوممۋنالدىق شارۋاشىلىق باسقارماسىنىڭ باسشىسى جاندوس ساليموۆ.
بۇل باعىتتا اۋقىمدى مىندەتتى ەڭسەرۋ جولىنداعى جۇمىستار جالعاسا بەرمەك.
ماڭعىستاۋ وبلىسى
