شاراينا
بەيسەنبى, 4 ءساۋىر 2013 2:11
بىرلەسكەن ايماققا جول جابىق
سولتۇستىك كورەيا وڭتۇستىككورەيالىق جۇمىسشىلاردىڭ كەسون بىرلەسكەن ەكونوميكالىق پاركىنە كىرۋىنە تىيىم سالدى. كحدر باسشىلىعى سەۋلگە ءوز شەشىمى تۋرالى كەشە حابارلادى. رەسمي سەۋل پحەنياننىڭ شەشىمىن «وتە وكىنىشتى» دەپ اتادى. ال بۇل تىيىم سالۋدىڭ قاشانعا دەيىن سوزىلاتىنى بەلگىسىز.
بەيسەنبى, 4 ءساۋىر 2013 2:11
بىرلەسكەن ايماققا جول جابىق
سولتۇستىك كورەيا وڭتۇستىككورەيالىق جۇمىسشىلاردىڭ كەسون بىرلەسكەن ەكونوميكالىق پاركىنە كىرۋىنە تىيىم سالدى. كحدر باسشىلىعى سەۋلگە ءوز شەشىمى تۋرالى كەشە حابارلادى. رەسمي سەۋل پحەنياننىڭ شەشىمىن «وتە وكىنىشتى» دەپ اتادى. ال بۇل تىيىم سالۋدىڭ قاشانعا دەيىن سوزىلاتىنى بەلگىسىز.
ونىڭ ۇستىنە پحەنيان ەكونوميكالىق ايماق اۋماعىنا كىرىپ ۇلگەرگەن وڭتۇستىك كورەيا ازاماتتارىنىڭ ونى ەش كەدەرگىسىز تاستاپ شىعا الاتىنىن اتاپ كورسەتتى. سەۋلدەگىلەر ءوز كەزەگىندە قازىرگى كەزدەگى باستى ماقسات كەسوننان ءوز ازاماتتارىن ەش نارسەگە ۇرىندىرماي الىپ شىعۋ ەكەنىن ايتىپ وتىر. وڭتۇستىك كورەيا ۇكىمەتىنىڭ دەرەگىنە سۇيەنسەك, بۇگىندە ەكونوميكالىق ايماقتا 861 وڭتۇستىككورەيالىق جۇمىسشى بار كورىنەدى.
گازا سەكتورىنا سوققى بەردى
ءيزرايلدىڭ اسكەري اۋە كۇشتەرى گازا سەكتورى اۋماعىنا اۆياسوققى جاسادى. شابۋىل سالدارىنان زارداپ شەككەندەر جوق دەلىنىپ وتىر. ال يزرايل اسكەري اۋە كۇشتەرىنىڭ رەيدى وسىنىڭ الدىندا گازا سەكتورىنان بىرنەشە زىمىران جىبەرىلگەننەن كەيىن جاۋاپ رەتىندە جاسالعان.
پالەستينالىقتار زىمىراندارىنان دا ايتارلىقتاي زيان كەلمەگەن جانە ادام قۇرباندىقتارى دا جوق دەگەن اقپار تارادى. زىمىرانداردى جىبەرگەنى ءۇشىن جاۋاپكەرشىلىكتى سالافيت توپتارىنىڭ ءبىرى ءوز مويىندارىنا العان. ولاردىڭ مۇنداي قادامعا بارۋىنا 2 ءساۋىر كۇنى يزرايل تۇرمەسىندە تاماق راگىنان كوز جۇمعان پالەستينالىق ابۋ حامديەحانىڭ ءولىمى سەبەپ بولعان. پالەستينا تارابى حامديەحاعا قاتىستى ادامگەرشىلىك تانىتىلىپ, ونى تۇرمەدەن بوساتۋدى سۇراعان ەكەن. بىراق بۇل ءوتىنىش ورىندالماعان.
مىسىر بيلىگىن سىن تەزىنە الدى
اقش باسشىلىعىنىڭ پىكىرىنشە, ەگيپەت بارا جاتقان باعىت قاۋىپتى. بۇل تۋرالى اقش پرەزيدەنتىمەن كەزدەسۋى كەزىندە مەملەكەتتىك حاتشى دجون كەرري مالىمدەدى. مۇنداي ۇستانىم تانىتۋعا جاقىندا وپپوزيتسياشىلاردىڭ تۇتقىنعا الىنۋى, جۋرناليستەرگە قاتىستى قاتال شارالار مەن كوشەدەگى تارتىپسىزدىكتەر سەبەپ بولعان.
بەس مىسىرلىق وپپوزيتسياشىنى تۇتقىنداۋعا وردەر 25 ناۋرىزدا بەرىلگەن بولاتىن. تەكسەرۋ نۇسقالارى بويىنشا بۇل ادامدار جۇرتشىلىقتى الەۋمەتتىك جەلىلەردە سايلاۋعا قازىرگى پرەزيدەنت موحاممەد مۋرسي ىلگەرىلەتىلگەن «مۇسىلمان باۋىرلار» پارتياسىنا قارسى زورلىق-زومبىلىق كورسەتۋگە شاقىرىپتى. سوعان قاراماستان, ناۋرىز ايىنىڭ باسىندا وتكەن كەلىسسوزدەر ناتيجەسىندە اقش ەگيپەتكە 250 ملن. دوللار كولەمىندە قارجىلاي كومەك كورسەتۋگە كەلىسكەن بولسا, كەلىسىم بۇزىلمايتىن بولىپ وتىر.
قارۋ ساۋداسى شارتى قابىلداندى
بۇۇ باس اسسامبلەياسى الەمدە قارۋ-جاراق ساۋداسىن رەتتەپ وتىراتىن حالىقارالىق شارت قابىلدادى. شارتتى قولداپ, بۇۇ-عا مۇشە 154 مەملەكەت داۋىس بەرسە, 3 مەملەكەت (يران, سيريا جانە كحدر) قارسىلىق تانىتقان, تاعى 23 ەل, اراسىندا رەسەي دە بار, بەيتاراپ قالعان. شارت قابىلدانۋى ءۇشىن ونى داۋىس بەرگەن ەلدەردىڭ كەم دەگەندە ۇشتەن ەكىسى قولداۋى ءتيىس بولاتىن.
قابىلدانعان قۇجات قول قويۋعا ۇستىمىزدەگى جىلدىڭ 3 شىلدەسىنەن باستاپ اشىلادى. بۇۇ-نىڭ ءتيىستى قارارىندا بارلىق مەملەكەتتەردەن شارتتى راتيفيكاتسيالاۋدىڭ مۇمكىندىگىن قىسقا مەرزىمدە قاراستىرۋ سۇرالادى. وسى جەردە اتاپ كورسەتەتىن باستى ءجايت – باس اسسامبلەيا قابىلداعان بۇل شارت الەمدە قارۋ ساۋداسىن رەگلامەنتتەيتىن العاشقى حالىقارالىق قۇجات بولىپ وتىر. بۇعان دەيىن قارۋعا باقىلاۋ تەك جەكەلەگەن مەملەكەتتەر دەڭگەيىندە عانا جۇرگىزىلىپ كەلگەن ەدى.
ىشىمدىكتەن اۋلاق بول, جۇمىسشى
بەلورۋسسيادا جۇمىس بەرۋشىلەر جۇمىسشىلارىن جۇمىسقا كىرىسەر الدىندا ىشىمدىك ىشكەنى, نە ىشپەگەنى تۋرالى تەكسەرۋدەن وتكىزۋگە مىندەتتەلمەك. ءسويتىپ, بۇل ەلدە «ەڭبەكتى ساقتاۋ تۋرالى» زاڭعا وزگەرىستەر ەنگىزۋ قاراستىرىلىپ وتىر.
زاڭ جوباسىن پارلامەنتتە ەڭبەك جانە الەۋمەتتىك قورعاۋ ءمينيسترى مارياننا ششەتكينا تانىستىردى. ونىڭ ايتۋىنشا, مۇنداي نورما بۇعان دەيىن تەك كاسىبي جۇرگىزۋشىلەرگە عانا قاتىستى بولىپ كەلسە, ەندى جۇمىس بەرۋشى كۇن سايىن اۋىسىم الدىندا جۇمىسشىلارىنا مەديتسينالىق تەكسەرۋ جۇرگىزۋگە ءتيىس بولادى. اڭگىمە ناقتى قانداي كاسىپتەرگە قاتىستى ەكەنى ازىرشە تۇسىنىكسىز. م.ششەتكينانىڭ سوزىنە قاراعاندا, قاۋىپتى جۇمىستار ءتىزىمى قايتا قارالىپ, جاڭارتىلعان تۇردە بەكىتىلۋى ءتيىس كورىنەدى.
جەڭگەتايلىق جاساعان دەكان
تاجىكستاندا حۋدجاند مەملەكەتتىك ۋنيۆەرسيتەتى شەت تىلدەرى فاكۋلتەتىنىڭ دەكانى, پروفەسسور م.زيكرياەۆاعا قوردا (پريتون) ۇستادى جانە جەڭگەتايلىقپەن اينالىستى دەگەن كۇدىك كەلتىرىلىپ وتىر. بۇل اقپاراتتى «اۆەستا» اگەنتتىگى تاراتتى.
اگەنتتىكتىڭ سوزىنە قاراعاندا, م.زيكرياەۆاعا قاتىستى رەسپۋبليكا قىلمىستىق كودەكسىنىڭ ءتيىستى بابى بويىنشا قىلمىستىق ءىس قوزعالعان. «ىلكىمدى» حانىمعا ەشقايدا كەتپەۋ تۋرالى قولحات بەرىلىپتى. «اۆەستا» سوگديا وبلىسىنداعى قۇقىق قورعاۋ ورگانىنداعى دەرەك كوزىنە سىلتەمە جاساي وتىرىپ, دەكاننىڭ كىناسىن موينىنا كوياتىن ايعاقتار قازىردىڭ وزىندە تولىق جينالىپ, بۇگىندە ءىس سوتقا بەرىلگەنىن دە جاريا ەتىپ ۇلگەردى.
قىسقا قايىرىپ ايتقاندا:
قىرعىزستاننىڭ وش قالاسىندا ميليتسيا وزبەك تىلىندە شىعاتىن «ۋش سادوسي» («وش جاڭعىرىعى») مەملەكەتتىك گازەتىنىڭ باس رەداكتورى ماحامادسولي يسمايلوۆتى تۇتقىنعا الدى. وعان 2010 جىلى ەلدىڭ وڭتۇستىگىندە بولعان ەتنوسارالىق قاقتىعىستار كەزىندە ادام ولتىرۋگە قاتىسقان دەگەن كۇدىك تاعىلىپ وتىر.
تۇركيالىق قۇتقارۋشىلار ىستامبۇلعا جاقىن جەردە ءمارمار تەڭىزىندە وتقا ورانعان سەرۋەن پارومىنان ونداعان ءتۋريستى ەۆاكۋاتسيالاعان. تۋريستەردىڭ اراسىندا شەتەل ازاماتتارى دا بولعان. الدىن الا اقپاراتقا قاراعاندا, كومەك تەز جەتكەندىكتەن, بىردە-ءبىر ادام ەشقانداي جاراقات الماعان.
ارمەنيانىڭ كوتايك وبلىسىنداعى پروشيان سەلوسىندا ستاروستا گراچ مۋرادياننىڭ ءولى دەنەسى تابىلدى. ول شەكەسىنەن تيگەن وقتان كوز جۇمىپتى. قاستاندىق جاساعان كىم ەكەنى ازىرشە بەلگىسىز. گ.مۋراديان كەزىندە تاۋلى قاراباقتاعى قارۋلى قاقتىعىسقا قاتىسقان كورىنەدى, وپپوزيتسيالىق پارتيانىڭ مۇشەسى بولىپتى.
ينتەرنەت ماتەريالدارى نەگىزىندە ازىرلەندى.
