مارقۇم قايىرجان حاسانوۆ بۇكىل عۇمىرىندا باتىس قازاقستان, سونىڭ ىشىندە قاراتوبە ءوڭىرىنىڭ تاريحىن تىرنەكتەپ جيناعان ولكەتانۋشى ەدى. وسىدان ءبىر جىل بۇرىن دۇنيەدەن وتكەن ەڭبەكقور عالىمدى تۋعان جەرىندە جەرلەستەرى ساعىنا ەسكە الدى. كەشتە قايىرجان حاسانوۆتىڭ ءومىر جولى مەن شىعارماشىلىعى جايلى كورمە ۇسىنىلىپ, دەرەكتى فيلم كورسەتىلدى.
– قايىرجان حاسانوۆ ءوز ءومىرى مەن شىعارمالىعى ارقىلى باياندى ءومىر ءسۇرۋدىڭ ۇلگىسىن كورسەتىپ كەتكەن جان ەدى, – دەيدى قازاقستاننىڭ ەڭبەك سىڭىرگەن مادەنيەت قىزمەتكەرى, ايتىس اقىنى شولپان قىدىرنيازوۆا.
قايىرجان حاسانوۆ كوزىنىڭ تىرىسىندە ولكە تاريحىنا قاتىستى جۇزدەگەن كىتاپ شىعاردى. اسىرەسە ساياسي قۋعىن-سۇرگىنگە ۇشىراعان تۇلعالار تۋرالى كوپ ىزدەندى. 1930 جىلدارداعى ناۋبەتتە ونىڭ ءوز اتاسى – العاشقى حالىق مۇعالىمدەرىنىڭ ءبىرى بولعان تولەگەن يمانعازيەۆ تە «حالىق جاۋى» اتانىپ, اتىلىپ كەتكەن بولاتىن. قاراتوبەدە وتكەن الاش سەزىنە قاتىسقانى ءۇشىن ايىپتى بولعان حالىق مۇعالىمىنىڭ ءومىر جولىنا قاتىستى ارحيۆ دەرەكتەرىن تالماي ىزدەپ, تاۋىپ تۇگەندەگەن قايىرجان اعا ول قىزمەت ەتكەن ساۋلە اۋىلىنداعى مەكتەپكە ەسكەرتكىش تاقتا دا ورناتقان ەدى. ودان بولەك, ولكەتانۋشى «الاشوردا. اتىلعان ارىستار» اتتى كىتاپ جازدى, مەدەش ورالديەۆ, قاراباي كوزەەۆ, ت.ب. اتى-ءجونى ۇمىتىلعان الاش قايراتكەرلەرىنىڭ ەسىمىن جاڭعىرتتى. ساناسى سەرگەك, قالامى جۇيرىك قالامگەر ءومىرىنىڭ اقىرىنا دەيىن قولىنان قالامىن تۇسىرمەدى. اۆتوردىڭ اياقتاي الماي كەتكەن كەيبىر ەڭبەگىن ۇرپاقتارى ءتۇيىندەپ, وقىرمان قولىنا تيگىزگەنى وتە ورنەكتى ءىس بولدى.
باتىس قازاقستان وبلىسى
