الەم-جالەم الەم
سەنبى, 30 ناۋرىز 2013 1:53
كوكتەم شۋاعى تونسىز دا توڭدىرمايدى
رەسەيدىڭ كەمەروۆو قالاسىنداعى رۋدنيچنىي اۋدانىندا تۇراتىن بىرەۋ ايەلىنىڭ تونىن ۇرلاپ ءبىر جايعاپ قالدى. توننىڭ جوق ەكەنى بەلگىلى بولعاندا, ول بۇل ىسكە ەش قاتىسى جوقتاي كەيىپ تانىتقان. ماسەلەنىڭ اق-قاراسى انىقتالعان كەزدە الگى ساباز توندى لومباردقا وتكىزىپ جىبەرگەنىن مويىنداۋعا ءماجبۇر بولىپتى.
سەنبى, 30 ناۋرىز 2013 1:53
كوكتەم شۋاعى تونسىز دا توڭدىرمايدى
رەسەيدىڭ كەمەروۆو قالاسىنداعى رۋدنيچنىي اۋدانىندا تۇراتىن بىرەۋ ايەلىنىڭ تونىن ۇرلاپ ءبىر جايعاپ قالدى. توننىڭ جوق ەكەنى بەلگىلى بولعاندا, ول بۇل ىسكە ەش قاتىسى جوقتاي كەيىپ تانىتقان. ماسەلەنىڭ اق-قاراسى انىقتالعان كەزدە الگى ساباز توندى لومباردقا وتكىزىپ جىبەرگەنىن مويىنداۋعا ءماجبۇر بولىپتى.
قۇقىق قورعاۋ ورگاندارى قىزمەتكەرىمەن اڭگىمە بارىسىندا ۇرلىقشى ەركەك اقشانى جولداستارىمەن ىشىمدىككە سالعانىن جاسىرماي ايتقان. باسقاشا سويلەۋگە لاجى دا قالماسا كەرەك. ال نەگە توندى ۇرلادىڭ دەگەن ساۋالعا ول كوكتەم شىعىپ, كۇن جىلىنعان كەزدە ايەلىنە ءبارىبىر توننىڭ ەش قاجەتى جوق ەكەنىن كولدەنەڭ تارتىپ, اقتالماق بولىپتى. ەندى پوليتسيا قىلمىستىق ءىس قوزعاۋ كەرەك پە, الدە جوق پا دەپ باس قاتىرىپ جاتقانعا ۇقسايدى.
كورگەننەن كوزاقى الاتىن دۇكەن
اۆستراليالىق دجوردجينا ەسىمدى حانىم يەلىگىندەگى ءدۇكەنگە كەلىپ, ەشتەڭە ساتىپ الماي, تەك اسسورتيمەنتتى قاراپ كەتەتىندەردەن اقى الۋ تۋرالى شەشىم قابىلدادى. ونىڭ ايتۋىنشا, كەلۋشىلەردىڭ كوپشىلىگى تاۋارلار تۋرالى كەڭەسەدى, ءسويتىپ, كوپ نارسەدەن حاباردار بولادى دا ەشتەڭە ساتىپ الماي باسقا ءدۇكەندەرگە تايىپ تۇرادى نەمەسە ينتەرنەت ارقىلى تاپسىرىس بەرەدى.
بريسبەن قالاسىنداعى دۇكەن يەسى ءارى ويلاپ, بەرى ويلاپ, وسىنداي شەشىم قابىلداعانىنا ءدان ريزا. «ءبىز كەلگەندەردەن 5 دوللار كولەمىندە اقى تالاپ ەتەمىز. كەلىسپەسە, بىردەن كەتە بەرەدى. ەگەر تاۋار ساتىپ السا, اقى تولەمەيدى», دەيدى دجوردجينا. ونىڭ پىكىرىنشە, بۇل ارەكەتىنىڭ ەش سوكەتتىگى جوق. بۇگىندە دۇكەندە بوسقا ساندالىپ ءجۇرەتىندەر ازايعان, ادامدار «كورۋشىلەردەن» ناقتى كليەنتتەرگە اينالعان.
قوناق ۇيگە ۇيقىشى قىزمەتشى كەرەك
فينليانديانىڭ استاناسى – حەلسينكي قالاسىنىڭ ورتالىعىندا ورنالاسقان قوناق ءۇي ۇيقى بويىنشا مامانعا ۆاكانسيا جاريالادى. ۇناعان كانديداتپەن 35 كۇنگە كەلىسىم-شارت جاسالماق. جالاقىسى دا جامان بولمايتىن سەكىلدى. ءۇمىتكەرلەردى ىزدەۋ ءساۋىر ايىنىڭ ورتاسىنا دەيىن جالعاسادى. تاڭداۋ تۇسكەن ادام 1 مامىردان باستاپ مىندەتىن اتقارۋعا كىرىسەدى.
مامان جاس ءارى شىعارماشىلىق ادامى بولۋى ءتيىس جانە فين, اعىلشىن, سونداي-اق مۇمكىندىگىنشە ورىس ءتىلىن ءبىلۋى شارت. ونىڭ مىندەتىنە تەك ۇيىقتاپ قانا قويماي, بلوگ جۇرگىزۋ جاتادى. قىزمەتشىنىڭ قوناق ءۇي نومىرىندە ۇيىقتايتىنى جانە بەلگىلى بولىپ وتىر. ويتكەنى, جۇمىس بەرۋشى قابىلدانعان ادامنان بۇل قوناق ۇيدە ۇيىقتاپ, دەمالعان تىم راحات ەكەنىن بلوگقا مايىن تامىزىپ جازۋدى تالاپ ەتەتىن بولادى. ازىرشە 500 ۇمىتكەردەن ءوتىنىش ءتۇسىپتى.
قورىلداعانى ءۇشىن قور بولعان ستۋدەنت
قىتايدىڭ تسزينلين پروۆينتسياسىنداعى اۋىل شارۋاشىلىعى ۋنيۆەرسيتەتىندە وقيتىن ستۋدەنت سوتتا جاتاقحانا بولمەسىندە بىرگە جاتقان كورشىسىن قورىلداپ ۇيقى بەرمەي, مازاسىن قاشىرعانى ءۇشىن پىشاقتاپ ولتىرگەنىن مويىنداعان.
23 جاسار گو ليۆەيدىڭ سوزىنە قاراعاندا, بولمەلەسى چجاو يانعا تۇندە سەن قاتتى قورىلدايسىڭ دەپ بىرنەشە مارتە ەسكەرتىپتى. بىراق ول «تىڭداماعان». سودان كەيىن قورىلىن بەينەتاسپاعا جازىپ الىپ, ۋنيۆەرسيتەتتىڭ سايتىنا سالعان. چجاو يان بەينەروليك تۋرالى بىلگەن كەزدە, ستۋدەنتتەر اراسىندا جانجال تۋىنداپتى. «ول مەنى بىرنەشە مارتە بالاعاتتادى, شىداماعاندىقتان كەۋدەسىنە پىشاق ۇردىم», دەيدى گو ليۆەي. جاراقاتتان چجاو يان كوز جۇمعان. سوت قانداي شەشىم شىعاراتىنى بەلگىسىز.
قۋلىعىنا قۇرىق بويلامايتىن قىلمىسكەر
اقش-تىڭ مەريلەند شتاتىندا تۇرمەدە وتىرعان 26 جاسار رەيموند تەيلور كامەرالاسى بولىپ قۋلانىپ, ونىڭ ورنىنا بوستاندىققا شىعىپ كەتكەن. ول ادام ومىرىنە قاستاندىق جاساماقشى بولعانى ءۇشىن 3 مارتە ءومىر-باقي تۇرمەدە وتىرۋ جازاسىنا كەسىلگەن ەكەن. قاشقىندى ۇستاۋ ازىرشە مۇمكىن بولماي تۇرعانعا ۇقسايدى.
وقيعا بالتيمورداعى تۇرمەلەردىڭ بىرىندە ورىن العان. وندا سوتقا باراتىن نەمەسە بوستاندىققا شىعارىلاتىن ادامدار ۇستالادى ەكەن. ال تەيلور سول تۇرمەگە ءوزىنىڭ قىلمىسىنا بايلانىستى ايعاق بەرۋ ءۇشىن اپارىلسا كەرەك. كۇزەتشىلەر اتى-ءجونىن اتاپ بوستاندىققا شىعۋى ءتيىس سوتتالعاندى شاقىرعاندا, ورنىنا تەيلور ءۇن قاتادى. جانە كامەرالاسىنىڭ جەكە ءنومىرىن قاتەسىز ايتىپ بەرەدى. ونىڭ قاشىپ كەتكەنى بوستاندىققا شىعۋى ءتيىس ادام ەسىكتى تەپكىلەپ, شۋ كوتەرگەندە عانا بەلگىلى بولادى…
قاراتورعايدىڭ ەڭ ۇلكەن ۇيشىگى قايدا؟
رەسەيدىڭ بەلگورود قالاسىنداعى ورتالىق دەمالىس ساياباعىندا كولەمى بەس مەترلىك قاراتورعايدىڭ ۇيشىگى پايدا بولدى. ونىڭ يدەياسىنىڭ اۆتورى ساياباقتىڭ ديرەكتورى كورىنەدى. مۇنداي الىپ ۇيشىكتى سالۋعا قۇرىلىسشىلار 5 كۇنىن جۇمساپتى.
ءبىر قىزىعى – گيننەستىڭ رەكوردتار كىتابىنا ەنۋدەن ۇمىتكەر ەڭ ۇلكەن قاراتورعاي ۇيشىگى قۇستارعا ارنالماپتى. وندا قۇستارعا ۇيشىك, جەم سالاتىن ىدىس جانە باسقا دا «جيھازدار» جاسايتىن شەبەرحانا ورنالاسقان. ۇيشىكتە بەلگورودتىڭ جاس تۇرعىندارى ءۇشىن قۇستارعا ارنالعان كادىمگى ۇيشىك جاساۋدى ۇيرەتەتىن شەبەر جۇمىس ىستەيدى. كۇنى بۇگىنگە دەيىن 20 شاقتى قاراتورعاي ۇيشىگى جاسالسا, ولار ساياباقتاعى اعاشتارعا ورنالاستىرىلىپتى.
جاقسى مەن جاماندى قايدان ۇقسىن!
اقش-تىڭ رود-ايلەند سوتى بەياۋىز توتىقۇستىڭ ىسىمەن اينالىسۋدان باس تارتقان. جەرگىلىكتى قۇقىق قورعاۋ ورگاندارىنىڭ مالىمدەگەنىندەي, مۇنداي شەشىم بيۋدجەت اقشاسىن ساقتاپ, ونى جەڭىل-جەلپى ءىس ءۇشىن بوسقا شاشپاۋ ماقساتىندا قابىلدانىپتى.
جالپى, سوت لينن تەيلور بەرگەن اپەللياتسيالىق شاعىمدى قاراۋى ءتيىس بولاتىن. ونىڭ ۇستىنەن ارىز قاراۋىنداعى توتىقۇس «اۋزىنا» كەلگەن جامان سوزدەردى وڭدى-سولدى بۇرقىراتىپ, جۇرتتىڭ تىنىشتىعىن كەتىرگەنى ءۇشىن تۇسكەن ەدى. تەيلورعا 15 دوللار ايىپپۇل تولەۋ تۋرالى شەشىم شىعارىلسا, ول ونى تولەۋدەن باس تارتىپ, قارسى شاعىم تۇسىرگەن-ءتىن. ادەتتە, يەلەرى توتىقۇستارىنا ادەپسىز سوزدەردى قىزىق ءۇشىن ۇيرەتەتىنى بەلگىلى. بايعۇس قۇس ونى قايدان ۇقسىن!
اقپارات اگەنتتىكتەرىنىڭ ماتەريالدارى نەگىزىندە ازىرلەندى.
