ەل ومىرىندەگى تاعى دا ءبىر تاريحي ءساتتىڭ كۋاسى بولدىق. قاسىم-جومارت توقاەۆتىڭ ۇلىقتاۋ ءراسىمىندە العا تارتقان نەگىزگى ماسەلەلەرىنىڭ ىشىندە ازاماتتاردىڭ قۇقىعىن الدىڭعى ورىنعا قويۋ, حالىقتىڭ ءال-اۋقاتىن جاقسارتۋ, قوعام دامۋىن تۇراقتى ەتۋ جايى كوڭىلىمىزگە قوندى. بۇل ماسەلەنى جۇيەلى تۇردە رەتتەۋ ءۇشىن قوعام مەن بيلىك اراسىنداعى ديالوگتى جولعا قويۋ ماڭىزدى.
پرەزيدەنت العا تارتقانداي, اۋەلى قوعامعا سەنىم مەن كەلىسىم كەرەك. سەنىم مەن كەلىسىمدى قامتاماسىز ەتۋدىڭ ارعى جاعىندا ساياسي ديالوگ قۇرىپ, بۇكىل قوعامنىڭ, ازاماتتاردىڭ زاڭدى قۇقىقتارىن بىرىكتىرەتىن, توپتاستىراتىن سول ارقىلى بارشا ۇيىمدارمەن, مەيلى ول تىركەلسىن, ءتىركەلمەسىن, ەسەپتەسىپ ساناسۋ قاجەتتىگى تۇر. سول توپتارمەن ءۇلكەن مامىلەگە كەلىپ, قازاقستاندا جاڭا زامانعا, جاڭا ءداۋىرگە قاتىستى ساياسي باسەكەلەستىك پەن بەلسەندىلىكتىڭ ويىن شارتتارىن وزگەرتۋگە تىڭ سەرپىن بەرىپ, ساياسي زاڭناماعا قاتىستى, ءبۇكىل قاجەتتى دەگەن ساياسي زاڭداردى قاراپ شىعۋ قاجەت سياقتى. ياعني, قوعامدىق كەلىسىم, قوعام ءىشىندەگى ءوزارا سەنىم دەگەن ءماسەلەلەردى رەتتەۋ ءۇشىن بىزگە جاڭا سيپاتتاعى ساياسي الاڭ, جاڭا سيپاتتاعى ساياسي ويىنشىلار قاجەت.
ساياسي پارتيالار, قوعامدىق ۇيىمدار, سايلاۋ تۋرالى زاڭداردى قايتا قاراپ, ولاردى الەمدىك, ەۋروپالىق ستاندارتتارعا جاقىنداتۋ ماڭىزدى. الەممەن ءبىرگە دوڭگەلەۋ ءۇشىن وسى باسىم باعىتتاردى باستى نازاردا ۇستاعان ابزال. سول ارقىلى ساياسي بەلسەندىلىكتى جاڭا بيىككە كوتەرە الامىز.
ايدوس سارىم,
ساياساتتانۋشى
