وقيعا ورىن العان كۇنى شەكاراشى تۇنگى اۋىسىمنان شىعىپ, ۇيىنە كەلگەن. تىنىعىپ العاننان كەيىن اۆتوكولىگىن جۋعا كول جاعاسىنا بارعان. وسى كەزدە كوپىر ۇستىنەن ەكى قىز بالانىڭ اششى ايعايىن, ءارلى-بەرلى قول سەرمەپ تۇرعانىن بايقاپ قالعان. جۇرەگى الدەبىر جامانشىلىقتى سەزگەندەي جانۇشىرا ءجۇگىرىپ كەلىپ, ايەل مەن بالانىڭ سۋعا جۇتىلىپ بارا جاتقانىن كورگەن. دەرەۋ كولگە قويىپ كەتىپ, ايەلدى جاعاعا الىپ شىققان. ىزىنشە قايتا مالتىپ بارىپ سۋ استىنان بالانى ازەر تاۋىپ العان. ءولىم مەن ءومىر اراسىندا ەس-ءتۇسسىز جاتقان بەس جاستاعى نۇرادىلگە جەدەل مەديتسينالىق كومەك كورسەتىپ, ءوز-وزىنە كەلگەن سوڭ ورتالىق اۋرۋحاناعا دەيىن جەتكىزىپتى.
ۇلتتىق قاۋىپسىزدىك كوميتەتى شەكارا قىزمەتى «سولتۇستىك» وڭىرلىك باسقارماسى №2032 اسكەري ءبولىم كومانديرىنىڭ ورىنباسارى جۇماحان ابىلبەكوۆتىڭ سيپاتتاۋىنشا, ەكى مۇشەل جاسقا تولعان سەرگەي بالا كەزىنەن شەكاراشى بولۋدى ارمانداعان. وتان الدىنداعى بورىشىن شەكارا قىزمەتىندە وتەپ كەلگەن سوڭ بىردەن «بيدايىق» وتكىزۋ بەكەتىنە جۇمىسقا قابىلدانعان. ەكى جىلدىڭ ىشىندە ءوزىن ىسىنە تياناقتى, جاۋاپتى مامان رەتىندە تانىتا بىلگەن. مىنەزى سالماقتى, كوپشىل, قوعامشىل ەكەنى ونىڭ سوزىنەن دە, قيمىلىنان دا انىق اڭعارىلادى. توتەنشە جاعدايلار جونىندەگى دەپارتامەنت باسشىلىعى جۋىردا وعان «سۋعا باتقانداردى قۇتقارعانى ءۇشىن» مەدالىن سالتاناتتى جاعدايدا تاپسىرعاندا سول بايسالدى قالپىنان اينىعان جوق. ءسوزىن اياعى اۋىر انا مەن بالانى قۇتقارعانىمدى ەرلىككە سانامايمىن. مەنىڭ ورنىمداعى كەز كەلگەن ادام وسىنداي قارەكەتكە بارار ەدى, دەپ قىسقا قايىردى.
– قارىنداسىم مەن جيەنىمە ءومىر سىيلاعان سەرگەيگە العىسىمىز شەكسىز. ول كومەككە كەلمەگەندە كوپىردىڭ ءشىرىگەن تاقتايلارى وپىرىلىپ, 2-3 مەتر بيىكتىكتەن قۇلاعان جيەنىم مەن مالتۋ بىلمەسە دە ۇلىن قۇتقارماق بولىپ تاۋەكەل ەتىپ قوسا سەكىرگەن قارىنداسىمنىڭ ارعى تاعدىرىن كوزگە ەلەستەتۋدىڭ ءوزى قيىن, – دەيدى قانات جەتپىسوۆ.
وسىدان بىرنەشە جىل بۇرىن ءدال وسى جەردە اجال قۇشا جازداعان ايەلدىڭ باۋىرى سۋدا مەرت بولعان ەكەن. قايعىلى وقيعانىڭ قايتالانۋىنا جول بەرمەگەن ەرجۇرەك شەكاراشىنى قالاي ۇلىقتاسا دا جاراسادى.
سولتۇستىك قازاقستان وبلىسى
