بەلسەندى ءارى باستاماشىل جاستار فورۋمىنداعى نەگىزگى وقيعا - «Atameken Academy» بىرەگەي پلاتفورماسى جانە ۇلتتىق كاسىپكەرلەر پالاتاسىنىڭ «جاس كاسىپكەر» ءبىلىم بەرۋ جوباسىنىڭ ىسكە قوسىلۋى ەدى.
– «Atameken Academy» ەلەكتروندى الاڭى – ارقىلى كاسىپكەرلەر پالاتاسىنا تيەسىلى «باستاۋ», «جاس كاسىپكەر» «بيزنەستىڭ جول كارتاسى» اياسىندا جىل سايىن شامامەن 40-50 ادامدى كاسىپكەرلىككە وقىتامىز. ونىڭ ىشىندە بۇل قىزمەتتەردى تەك قاعاز جۇزىندە ەمەس, ەلەكتروندى فورماتتا, ياعني ۇكىمەتتىڭ تاپسىرىسىمەن جاسالىپ جاتقان ءبىزدىڭ وقىتۋ جوبالارىنا تىركەلۋ مۇمكىندىگى بار. سول سەكىلدى وقىتۋ كۋرستارى ينتەراكتيۆتى تۇردە جۇرگىزىلەدى. «Atameken Academy» سول ءۇشىن دە قاجەت. بيىل ەلىمىزدە جاستار جىلى دەپ جاريالانعاندىقتان كاسىپكەرلىككە 100 مىڭ ادامدى جۇمىلدىرۋىمىز كەرەك. بۇعان قوسا 20 مىڭ ادامدى «جاس كاسىپكەر» جوباسىنا تارتىپ, كەمىندە 5 مىڭ ستارتاپتى ىسكە اسىرۋعا جاعداي جاسالادى. بۇل ءۇشىن قارجى وپەراتورلارىمەن بىرلەسە جۇمىس اتقارىپ, ازاماتتارعا باعىت كورسەتەمىز, – دەيدى «اتامەكەن» ۇكپ جاپپاي كاسىپكەرلىكتى دامىتۋ جونىندەگى شاعىن قارجىلاندىرۋ دەپارتامەنتىنىڭ ديرەكتورى باۋىرجان ورازعاليەۆ.
كرەاتيۆتى جاستاردىڭ قۇرىلتايىندا جاس تا بولسا كاسىبىن ورگە دومالاتقان تابىستى جاندار, ناتيجەلى كەيستەر جانە بيزنەستىڭ تيىمدىلىگىن ارتتىراتىن تىڭ ويلارىن ۇسىندى. ولاردىڭ اياق الىسىن ەلدەگى جەتەكشى قارجى ينستيتۋتتارىنىڭ باسشىلارى, ءتىس قاققان قارجىگەرلەر, تانىمال كاسىپكەرلەر, بلوگەرلەر, سپورتشىلار جانە مەديا تۇلعالار باعالادى.
جاقسىلىق مۇراتقالي,
«Egemen Qazaqstan»
