قاسىم-جومارت توقاەۆتى بۇۇ 8-ءشى باس حاتشىسى پان گي مۋن قۇتتىقتادى. بۇۇ 8-ءشى باس حاتشىسى, يونسە ۋنيۆەرسيتەتىنىڭ جانىنداعى جاھاندىق ءىس-قيمىلدار ينستيتۋتىنىڭ قۇرمەتتى توراعاسى پان گي مۋن قاسىم-جومارت توقاەۆتى جاۋاپتى مەملەكەتتىك لاۋازىمعا سايلانۋىمەن شىن جۇرەكتەن قۇتتىقتادى. جەدەلحاتتا مەملەكەت باسشىسىنىڭ بۇۇ جەنەۆاداعى ءبولىمشەسىنىڭ باس ديرەكتورى قىزمەتىن اتقارعان كەزدەگى جۇمىس ءتاجىريبەسى, ءارتۇرلى مۇددەلى تاراپتاردى كەلىسىمگە كەلتىرۋ قابىلەتى قازاقستاندى وركەندەتۋگە سەپتىگىن تيگىزەتىنىنە سەنىم بىلدىرگەن.
«قازاقستان – قازىرگى ۋاقىتتا ورنىقتى دامۋى مەن ينكليۋزيۆتى ءوسىمىن ايقىن كورسەتىپ كەلە جاتقان بىرەگەي مەملەكەت. ءسىزدىڭ ديپلوماتيانى تەرەڭ تۇسىنەتىنىڭىز ەلىڭىزدەگى مەملەكەتتىك قۇرىلىس پەن الەۋمەتتىك-ەكونوميكالىق دامۋعا ىقپال ەتەدى دەپ ويلايمىن. الداعى ۋاقىتتا الەمنىڭ بولاشاعىن جارقىن ەتۋ ماقساتىندا كۇش-جىگەر بىرىكتىرىپ, ىنتىماقتاستىعىمىزدى جالعاستىرا بەرگىمىز كەلەدى», دەلىنگەن جەدەلحاتتا.
رەسەي فەدەراتسياسىنىڭ پرەزيدەنتى ۆلاديمير پۋتين قاسىم-جومارت توقاەۆتىڭ پرەزيدەنت سايلاۋىنداعى ايقىن جەڭىسى مەملەكەت باسشىسىنىڭ ءوز وتانداستارى اراسىنداعى بەدەلىنىڭ جوعارى جانە قازاقستاننىڭ ورنىقتى الەۋمەتتىك-ەكونوميكالىق دامۋىنا باعىتتالعان باعداردى جالعاستىرۋعا, ونىڭ سىرتقى ساياسي ءمۇددەلەرىن قورعاۋعا, ەكى ەل اراسىنداعى ستراتەگيالىق سەرىكتەستىك پەن وداقتاستىقتى جان-جاقتى نىعايتۋعا نيەتتى ەكەنىن كورسەتەتىنىن جەتكىزدى.
«ەكىجاقتى بايلانىستاردى نىعايتۋ ءۇشىن سىزبەن تىعىز جۇمىس ىستەۋدى جالعاستىرۋعا, سونداي-اق, رەسەي مەن قازاقستاننىڭ دوستاس حالىقتارىنىڭ يگىلىگى ءۇشىن ەۋرازيالىق كەڭىستىكتەگى ءوزارا ءتيىمدى ينتەگراتسيالىق ۇدەرىستەردى ىلگەرىلەتۋگە دايىن ەكەنىمىزدى راستاعىم كەلەدى», – دەلىنگەن جەدەلحاتتا.
وزبەكستان رەسپۋبليكاسىنىڭ پرەزيدەنتى شاۆكات ميرزيوەۆ داۋىس بەرۋ قورىتىندىسى باۋىرلاس قازاقستان حالقىنىڭ قاسىم-جومارت توقاەۆقا تولىق سەنىم ارتقانىن جانە كەڭ كولەمدە قولداۋ كورسەتكەنىن تاعى دا دالەلدەدى دەدى. ونىڭ پىكىرىنشە, بۇل مەملەكەت باسشىسىنىڭ ەلىمىزدىڭ ورنىقتى دامۋى مەن حالىقارالىق بەدەلىن ارتتىرۋعا, ساياسي باعدار مەن ماڭىزدى الەۋمەتتىك-ەكونوميكالىق رەفورمالاردىڭ دايەكتى جالعاسۋىنا دەگەن سەنىم بولىپ سانالادى.
«ەلدەرىمىز بەن حالىقتارىمىزدىڭ مۇددەسى ءۇشىن ءوزارا كۇش ءبىرىكتىرە وتىرىپ, وزبەك-قازاق ستراتەگيالىق سەرىكتەستىگىن ودان ءارى دامىتىپ, نىعايتا بەرەتىنىمىزگە سەنىمدىمىن», – دەلىنگەن جەدەلحاتتا.
تاجىكستان پرەزيدەنتى ەمومالي راحمون ءوز قۇتتىقتاۋ حاتىندا قازاقستان حالقىنىڭ ەركى مەن ىقىلاسى مەملەكەت باسشىسىنىڭ قىزمەتىنە دەگەن زور سەنىمنىڭ كورىنىسى بولىپ سانالاتىنىن ايتقان.
«بۇگىندە ستراتەگيالىق سەرىكتەستىك اياسىندا تابىستى دامىپ كەلە جاتقان ەكى ەلدىڭ كوپقىرلى قاتىناستارىنىڭ دايەكتى كەڭەيۋىنىڭ بەرىك جاقتاۋشىسى رەتىندە ءبىز ءسىزدى بىلەمىز ءارى قۇرمەتتەيمىز. تاجىك-قازاق ىقپالداستىعىن ودان ءارى جان-جاقتى تەرەڭدەتۋگە ءمۇددەلىمىز. ءوزارا كۇش بىرىكتىرە وتىرىپ, ەكى ەل اراسىنداعى ىنتىماقتاستىقتى حالىقتارىمىزدىڭ يگىلىگى ءۇشىن جاڭا دەڭگەيگە كوتەرە الاتىنىمىزعا سەنىم بىلدىرەمىن», دەلىنگەن قۇتتىقتاۋ حاتتا.
قىرعىز رەسپۋبليكاسىنىڭ پرەزيدەنتى سوورونباي جەەنبەكوۆ ءوز جەدەلحاتىندا قاسىم-جومارت توقاەۆتىڭ پرەزيدەنت سايلاۋىنداعى ايقىن جەڭىسى قازاقستاننىڭ ودان ءارى ورنىقتى دامۋىنا, باۋىرلاس ەكى حالىقتىڭ دوستىعى مەن تاتۋ كورشىلىگىنە, سونداي-اق, ەلدەرىمىز اراسىنداعى ستراتەگيالىق ارىپتەستىكتى كەڭەيتۋگە سەپتىگىن تيگىزەتىنىنە سەنىم بىلدىرەدى.
ازەربايجان رەسپۋبليكاسىنىڭ پرەزيدەنتى يلحام اليەۆ ءوز قۇتتىقتاۋ حاتىندا: «ازەربايجان-قازاق قاتىناستارى حالىقتارىمىزدىڭ ورتاق تاريحىنا, ۇلتتىق جانە دۇنيەتانىمدىق تامىرىنا نەگىزدەلەدى. بەرىك نەگىزگە سۇيەنگەن مەملەكەتارالىق بايلانىستارىمىز بەن ستراتەگيالىق سەرىكتەستىگىمىزدى ودان ءارى دامىتۋ جانە بەرىك قارىم-قاتىناستارىمىز بەن كوپقىرلى ىنتىماقتاستىعىمىزدى تەرەڭدەتە ءتۇسۋ ءۇشىن بىرگە كۇش جۇمىلدىراتىنىمىزعا سەنەمىن», دەپ جازعان.
سەربيا رەسپۋبليكاسىنىڭ پرەزيدەنتى الەكساندر ۆۋچيچ ءوز ەلىنىڭ قازاقستانمەن دوستىق بايلانىستارعا زور ءمان بەرەتىنىن جانە بەرىك قارىم-قاتىناستار مەن كەڭ ىنتىماقتاستىقتى نىعايتۋعا مۇددەلى ەكەنىن ايتتى.
«ءسىزدىڭ ساياسي تاجىريبەڭىز بەن يدەياڭىزعا زور سەنىم ارتقان قازاقستان ازاماتتارىنىڭ ارقاسىندا ءسىز ەلىڭىزدى دامۋ جولىنا جەتەلەيسىز», دەلىنگەن سەربيا پرەزيدەنتىنىڭ جەدەلحاتىندا.
ماجارستان پرەمەر-مينيسترى ۆيكتور وربان مەملەكەت باسشىسىن قازاقستان رەسپۋبليكاسىنىڭ پرەزيدەنتى لاۋازىمىنا سايلانۋىمەن قۇتتىقتادى جانە ول ءوز ۇكىمەتىمەن بىرلەسىپ, ماجار جانە قازاق حالىقتارىنىڭ اراسىنداعى دوستىقتى تەرەڭدەتۋ ءۇشىن ايانباي ەڭبەك ەتەتىنىنە سەنىم ءبىلدىردى.
بۇۇ وركەنيەتتەر اليانسىنىڭ جوعارى وكىلى ميگەل انحەل موراتينوس قاسىم-جومارت توقاەۆتى پرەزيدەنت سايلاۋىنداعى ايقىن جەڭىسىمەن قۇتتىقتاپ, اليانستىڭ قازاقستانمەن ىقپالداستىعىنىڭ جاقسى ەكەنىن اتاپ ءوتتى. سونىمەن بىرگە, ءوزارا ارىپتەستىكتىڭ ودان ءارى كەڭەيە ءتۇسەتىنىنە ۇمىتتەنەتىنىن ايتتى.
امەريكا-قازاقستان ىسكەرلىك اسسوتسياتسياسىنىڭ اتقارۋشى ديرەكتورى سارا نيكەل پرەزيدەنت توقاەۆتىڭ قازاقستاندا بيزنەستى قولداۋعا قاجەتتى ەكونوميكالىق ءوسىم مەن رەفورمالاردى ىلگەرىلەتۋ ىسىندەگى تاجىريبەسى باي ەكەنىن اتاپ ءوتتى.
«ءسىزدىڭ پرەزيدەنت بولىپ سايلانۋىڭىز بەن «استانا» حالىقارالىق قارجى ورتالىعى سياقتى ماڭىزدى باستامالاردىڭ جالعاسۋى ينۆەستورلار ءۇشىن مەملەكەتتىڭ ۇزاقمەرزىمدى دامۋ, گۇلدەنۋ جانە حالىقارالىق ارىپتەستىك باعىتىنداعى ۇستانعان جولىنا بەرىكتىگى تۋرالى بەلگى بولىپ تابىلادى», دەلىنگەن جەدەلحاتتا.
سونىمەن قاتار قاسىم-جومارت توقاەۆتىڭ اتىنا ءوز قۇتتىقتاۋلارىن ماجارستان پرەزيدەنتى يانوش ادەر, گرۋزيانىڭ پرەزيدەنتى سولومە زۋرابيشۆيلي, مولدوۆا رەسپۋبليكاسىنىڭ پرەزيدەنتى يگور دودون, گرۋزيانىڭ پرەمەر-ءمينيسترى مامۋكا باحتادزە, بولگاريا رەسپۋبليكاسىنىڭ بۇرىنعى پرەزيدەنتى پەتر ستويانوۆ جولدادى.
ەۋروپالىق كەڭەس توراعاسى دونالد تۋسك ءوزىنىڭ قۇتتىقتاۋ حاتىندا ەۋروپالىق وداقتىڭ قازاقستانمەن قارىم-قاتىناسىنا بەيىلدى ەكەنىن تاعى ءبىر ناقتىلاعان.
«قازاقستان – ەۋروپالىق وداقتىڭ ماڭىزدى ارىپتەسى. قازاقستان مەن ەۋروپالىق وداق اراسىنداعى ارىپتەستىك پەن ىنتىماقتاستىق جونىندەگى كەلىسىم, بولاشاقتاعى تەرەڭدەتۋگە ۇمتىلعان ءبىزدىڭ مازمۇندى ءىس-قيمىلىمىزدىڭ نەگىزى بولىپ تابىلادى», دەلىنگەن جەدەلحاتتا.
دونالد تۋسك بەيبىتشىلىك, تۇراقتىلىق پەن ءوسىپ-وركەندەۋ بولىپ تابىلاتىن قازاقستاننىڭ ايماقتىق ىنتىماقتاستىق پەن ديالوگتاردى جۇرگىزۋدەگى ءرولىن قۇپتادى.
چەح رەسپۋبليكاسىنىڭ پرەزيدەنتى ميلوش زەمان دا قاسىم-جومارت توقاەۆتى قازاقستان رەسپۋبليكاسىنىڭ پرەزيدەنتى لاۋازىمىنا سايلانۋىمەن قۇتتىقتادى.
«مەن ءسىزدىڭ قازاقستان رەسپۋبليكاسىنىڭ پرەزيدەنتى لاۋازىمىنا سايلانعانىڭىز تۋرالى حاباردى ۇلكەن قۋانىشپەن قابىلدادىم. ءسىزدىڭ باسشىلىعىڭىزبەن ەكى ەلدىڭ دوستىق قارىم-قاتىناسى بۇدان ءارى قاراي دا نىعايىپ, ىنتىماقتاستىعىمىز حالىقتارىمىزدىڭ يگىلىگى ءۇشىن دامي بەرەتىنىنە ناق سەنىمدىمىن», دەلىنگەن جەدەلحاتتا.
تمد اتقارۋشى كوميتەتىنىڭ توراعاسى – اتقارۋشى حاتشىسى سەرگەي لەبەدەۆ ءوزىنىڭ قۇتتىقتاۋ جەدەلحاتىندا, تمد ەلدەرىنىڭ اتىنان بايقاۋشىلار ميسسياسىنىڭ جەتەكشىسى رەتىندە قاسىم-جومارت توقاەۆتىڭ قازاقستان حالقىنىڭ الدىندا ۇلكەن سەنىمگە يە ەكەنىنە شىنايى كوز جەتكىزگەنىن اتاپ وتكەن.
«ءسىزدىڭ مەملەكەت باسشىسى لاۋازىمىنداعى قىزمەتىڭىز بۇدان ءارى قاراي دا قازاقستان رەسپۋبليكاسىنىڭ قارىشتاپ دامۋىنا, حالىقارالىق دەڭگەيدە ءوز ۇستانىمىن نىعايتۋعا, سونداي-اق تاۋەلسىز مەملەكەتتەر دوستاستىعى كەڭىستىگىندەگى ينتەگراتسيالىق ۇدەرىستەردىڭ تەرەڭدەي ءتۇسۋىنە زور ىقپال ەتەتىنىنە سەنىمدىمىن», دەلىنگەن جەدەلحاتتا.
تاتارستان پرەزيدەنتى رۋستام ميننيحانوۆ حالىقتىڭ قولداۋى اسا جاۋاپتى لاۋازىمدا جەمىستى قىزمەت ەتۋ ءۇشىن بەرىك ءارى قۋاتتى قۇرال دەپ اتاپ وتكەن.
«ءبىزدىڭ باۋىرلاس تاتارستان مەن قازاقستان حالىقتارىنىڭ اراسىنداعى كونسترۋكتيۆتى جانە تىلەكتەس ىنتىماقتاستىق ءداستۇرىمىزدى رەسەي-قازاقستان كوپقىرلى ستراتەگيالىق قارىم-قاتىناسىنىڭ ءبىر بولىگى رەتىندە قاراستىرىپ, ءوزارا مازمۇندى ءىس-قيمىلدى ارتتىراتىنىمىزعا سەنىمدىمىن», دەلىنگەن جەدەلحاتتا.
