تۇركيالىق عالىم يۋسۋف ازمۋن لاتىن گرافيكاسىنا اۋدارىپ, تۇسىنىكتەمە بەرگەن, كىتاپ ەتىپ شىعارىلعان داستان يرانداعى تۇركىمەن ساحرا دەپ اتالاتىن ايماقتاعى شاعىن قازاق اۋىلىنىڭ تۇرعىنى ءۋالي مۇحاممەد قوجا دەگەن ازاماتتىڭ قولىندا بولىپتى. ونىڭ ايتۋىنشا, بۇل ەڭبەكتى وڭىر تۇرعىندارى وسىدان 150 جىل بۇرىن مەرۆتەن كەلگەندەردەن ساتىپ السا كەرەك. وسىلايشا, ۇزاق جىلدار بويى ساقتالعان قولجازبانى يۋسۋف ازمۋنعا ءۋالي مۇحاممەد قوجا بەرىپتى. ءسويتىپ, قورقىت اتا داستانىنىڭ درەزدەن, ۆاتيكان نۇسقالارىنا جاڭا ۇلگىسى قوسىلدى. عالىمدار داستاننىڭ عىلىمعا بەلگىسىز بولىپ كەلگەن وسىناۋ جاڭا قولجازباسىن «تۇركىمەن ساحار نۇسقاسى» دەپ اتاپتى. ال مۇنداي نۇسقانىڭ بار ەكەندىگىن العاش رەت ايتقان تۇركيالىق عالىم مەتين ەكيدجى ونى «تۇركىستان نۇسقاسى» دەپ اتاعان ەدى. ول تۇپنۇسقانىنىڭ قازاقستاننان, سونىڭ ىشىندە ماڭعىستاۋ وڭىرىنەن تابىلعانى تۋرالى مالىمدەگەن بولاتىن. بىراق داستاننىڭ سكانەرلەنگەن بىرنەشە بەتتىك كوشىرمەسىن تۇركيادا وتكەن كونفەرەنتسيادا تانىستىرعان ەدى. ءبىز ۇلتتىڭ عانا ەمەس, كۇللى تۇركىگە ورتاق مۇرانىڭ قازاقستاننان تابىلعانىنا قۋانا وتىرىپ, اقپاراتتىڭ انىق-قانىعىنا ۇڭىلۋگە تىرىسقانبىز. «ءبىزدىڭ عالىمدار نەگە بىلمەي قالدى؟» دەسكەنبىز. راسىندا دا اكادەميك مىرزاتاي جولداسبەك ءتارىزدى عالىمدار داستاننىڭ تۇپنۇسقاسى قازاق ەلىندە ساقتالعانىنا كۇمان كەلتىرگەن. «ەستيتىن ەدىك» دەسكەن. بىراق داستاننىڭ ءۇشىنشى نۇسقاسىنىڭ تابىلعانىنا ەشكىمنىڭ ءشۇباسى بولعان جوق. بىراق داستان ماڭعىستاۋدا ەمەس, يران جەرىندە ساقتالىپتى.
