ايماقتار • 11 ماۋسىم، 2019

تۇركىستان: جاستاردىڭ تىڭ جوبالارى قولداۋ تاپتى

671 رەت كورسەتىلدى

پرەزيدەنت جانىنداعى مەملەكەتتىك باسقارۋ اكادەمياسىنىڭ تۇركىستان وبلىستىق فيليالىندا قايتا دايارلاۋدان وتكەن جاس مەملەكەتتىك قىزمەتشىلەر ءوڭىردى دامىتۋ بويىنشا ازىرلەگەن جوبالارىن ۇسىندى. وبلىس اكىمدىگىندە وتكەن جيىنىندا ءوڭىر باسشىسى ومىرزاق شوكەەۆ جوبالار اكىمدىك تاراپىنان تولىق قولداۋ تاباتىنىن مالىمدەدى.

جوبالاردىڭ باسىم كوپشىلىگى تۋريزم سالاسىن دامىتۋعا باعىتتالعان. مىسالى، جانبوتا ورازباەۆانىڭ «I-Shatyr» جوباسى  ىستىق كليماتتى تۇركىستان قالاسىنا ارنالعان. ق.ا.  ياساۋي كەسەنەسى ايماعىندا ىستىقتان قورعايتىن سمارت شاتىرلار جۇيەسى تۋريستەردىڭ كولەڭكەلەۋىنە ارنالعان. جوبامەن تانىسقان وبلىس اكىمى بۇل جۇيەنى كۇز مەزگىلىنە قاراي ىسكە قوسۋ قاجەتتىگىن تاپسىردى. 

ال «EKO-Jai» بايدىبەك اۋدانىنداعى اقمەشىت ۇڭگىرى ايلناسىندا تۋريستەر ءۇشىن شاعىن دەمالىس ۇيلەرىن سالۋ جوباسىنىڭ اۆتورى نۇربول مامەتتىڭ ايتۋىنشا، ەكولوگيالىق ۇيلەردە تۋريستەرگە بارلىق جاعداي جاسالادى. جالپى قۇنى 50 ملن. تەڭگەگە 10 ءۇي سالۋ ۇسىنىلىپ وتىر. 

«Zhan-Uia» جوباسىن ۇسىنعان  ساماتۋللا نۋريلا وڭىردەگى قارتتار ءۇيى مەن بالالار ءۇيىن بىرىكتىرۋ ارقىلى بالا مەن مەيىرىمگە مۇقتاج جانداردى جاقىنداستىرۋعا بولادى دەپ ەسەپتەيدى. جوبامەن تانىسقان وبلىس باسشىسى كەلەسى جىلدان باستاپ تۇركىستان قالاسىنان جوباعا قاجەتتى عيماراتتاردىڭ قۇرىلىس جۇمىستارىن باستاۋ قاجەتتىگىن تاپسىردى. الداعى ۋاقىتتا جۇزەگە اساتىن جوبالاردىڭ تاعى ءبىرى - «EthnoVillage». قالانىڭ تاريحي ايماعىنا ەتنواۋىل سالۋ كوزدەلگەن بۇل جوبانىڭ اۆتورى ايجان قوسپاەۆا تۋريستەرگە قازاق حالقىنىڭ ۇلتتىق سالت-ءداستۇرى مەن تاعامدارىن، ءتول ويىندارى مەن قولونەرىن تانىستىرۋعا مۇمكىندىك تۋاتىنىن ايتتى. 

ال «تازا سانا، تازا قالا» جوباسى –   كەنتاۋ قالاسىنداعى تازالىق جۇيەسىن تسيفرلاندىرۋعا باعىتتالىپ وتىر. جوبا اۆتورى ەلنۇر ەرمانوۆتىڭ بايانداۋىنشا، قوقىس جاشىكتەرىنە ارنايى QR-كودتار قويىلىپ، قوقىستىڭ كوبەيگەنى، جاشىكتىڭ بوساتىلعان ۋاقىتى ورتالىقتاندىرىلعان جۇيەگە حابارلانىپ وتىراتىن بولادى. 


تۇركىستان وبلىسى

سوڭعى جاڭالىقتار

دوللار ارزاندادى

قارجى • بۇگىن، 15:58

ۇقساس جاڭالىقتار