دەنساۋلىعى ناشار ەكەنىن راستادى
سارسەنبى, 6 ناۋرىز 2013 6:25
ۆەنەسۋەلانىڭ بايلانىس جانە اقپارات ءمينيسترى ەرنەستو ۆيلەگاس ەل پرەزيدەنتى ۋگو چاۆەستىڭ دەنساۋلىق جاعدايى ناشارلاعانىن راستادى. اقپارات اگەنتتىكتەرىنىڭ حابارلاۋىنشا, پرەزيدەنتتىڭ تىنىس الۋىندا پروبلەما بار, بۇل جاڭا جۇقپالى اۋرۋدىڭ سالدارى بولىپ تابىلادى.
سارسەنبى, 6 ناۋرىز 2013 6:25
ۆەنەسۋەلانىڭ بايلانىس جانە اقپارات ءمينيسترى ەرنەستو ۆيلەگاس ەل پرەزيدەنتى ۋگو چاۆەستىڭ دەنساۋلىق جاعدايى ناشارلاعانىن راستادى. اقپارات اگەنتتىكتەرىنىڭ حابارلاۋىنشا, پرەزيدەنتتىڭ تىنىس الۋىندا پروبلەما بار, بۇل جاڭا جۇقپالى اۋرۋدىڭ سالدارى بولىپ تابىلادى.
ءمينيستردىڭ مالىمدەۋىنشە, پرەزيدەنت ءوزىنىڭ دەنساۋلىعى ناشار ەكەنىن بىلەدى. ول سونداي-اق ۆەنەسۋەلاعا قارسى «پسيحولوگيالىق سوعىس» ءورشىپ تۇرعانىن, وعان جول بەرۋگە بولمايتىنىن اتاپ وتكەن. ۋگو چاۆەس وتكەن جىلدىڭ جەلتوقسانىندا ءتورتىنشى رەت وپەراتسيا ۇستەلىنە جاتقان ەدى. سودان بەرى پرەزيدەنت نە تەلەديدار ەكرانىنان, نە حالىق اراسىنان كورىنگەن ەمەس. بۇل ءتۇرلى اقپاراتتاردىڭ تارالۋىنا سەبەپ بولۋدا. 58 جاستاعى ۋگو چاۆەس 1999 جىلدان بەرى ۆەنەسۋەلانى باسقارىپ كەلەدى.
بۇكىلقىتايلىق سەسسيا باستالدى
كەشە بەيجىڭدە بۇكىلقىتايلىق حالىق وكىلدەرى جينالىسىنىڭ سەسسياسى جۇمىسىن باستادى. جينالىس ەكى اپتاعا سوزىلادى. بۇل جونىندە «سينحۋا» اگەنتتىگى حابارلادى.
جيىندا دەلەگاتتار قحر-دىڭ جاڭا توراعاسىنىڭ جانە ونىڭ ورىنباسارلارىنىڭ, سونداي-اق پرەمەر-ءمينيستردىڭ, ۆيتسە-پرەمەردىڭ كانديداتۋرالارىن جانە مينيسترلەر كابينەتىنىڭ قۇرامىن بەكىتەدى. بۇلاردان بولەك دەلەگاتتار اكىمشىلىك رەفورماسىنىڭ جوسپارىن تالقىلايدى. سەسسيا سوڭىندا قحر توراعاسى سي تسزينپين قىزمەتىنە رەسمي تۇردە كىرىسەدى دەپ كۇتىلۋدە. ال ەلدىڭ پرەمەر-ءمينيسترى لي كەتسيان بولاتىن سياقتى. سەسسيانىڭ اشىلۋىندا قازىرگى پرەمەر-مينيستر ۆەن تسزياباو ءسوز سويلەپ, ۇكىمەتتىڭ وتكەن جىلعى جۇمىسى جونىندە ەسەپ بەردى.
الەمدەگى ەڭ قارت ايەل كىم؟
الەمدەگى ەڭ قارت ايەل ميساو وكاۆا ەسىمدى كەيۋانا 115 جاسقا تولدى. جاپوندىق كەيۋانا ءوزىنىڭ تۋعان كۇنىن قارتتار ۇيىندە اتاپ وتكەن. «فرانس-پرەسس» اگەنتتىگىنىڭ جازۋىنشا, ول وسىنشاما ۇزاق جاسايمىن دەپ مۇلدە ويلاماعان.
وسى جىلدىڭ اقپانىندا م.وكاۆا الەمدەگى ەڭ قارت ايەل رەتىندە گيننەستىڭ رەكوردتار كىتابىنا تىركەلگەن ەدى. مۇنداي قۇرمەت وعان 116 جىل 100 كۇن ءومىر سۇرگەن امەريكالىق بەسسي كۋپەر قايتىس بولعاننان كەيىن كورسەتىلىپ وتىر. وسى ۋاقىتقا دەيىن الەمدە 114 جاسقا كەلگەن 100 ادام ءومىر ءسۇرىپتى. ال 29 ادام 115 جىل, 8 ادام 116 جاسقا دەيىن ءومىر سۇرگەن ەكەن.
ەگەمەندىككە شابۋىل دەپ ايىپتادى
يراكتىڭ انبار پروۆينتسياسىندا سيريانىڭ – 48, يراكتىڭ 9 اسكەريى قازا تاپتى. يراك قورعانىس مينيسترلىگىنىڭ حابارلاۋىنشا, شەكاراعا جاقىن ماڭدا سيريالىق «تەررورشى توپ» كۇتپەگەن جەردەن شابۋىل جاساعان. ولار سيريالىق اسكەرلەر مەن ايداۋىلدارعا قارسى اۆتوماتتان وق جاۋدىرعان.
مينيسترلىكتىڭ مالىمەتتەرىنە قاراعاندا, قازا تاپقان سيريالىق اسكەريلەر بۇدان ءبىراز ۋاقىت بۇرىن مەديتسينالىق كومەك الۋ ءۇشىن يراك شەكاراسىنا قاشىپ وتكەن سياقتى. «ءال-ارابيا» تەلەارناسىنىڭ حابارلاۋىنشا, سيريالىق اسكەريلەردىڭ سانى 65 ادام ەكەن. وقيعا ولاردى سيريانىڭ رەسمي تۇلعالارىنا تابىس ەتۋى ءۇشىن الىپ بارا جاتقاندا بولعان. ال يراك تاراپى ورىن العان بۇل وقيعانى «ەلدىڭ ەگەمەندىگىنە جاسالعان شابۋىل» دەپ ايىپتاۋدا.
36 جولاۋشى قازا تاپتى
كونگو دەموكراتيالىق رەسپۋبليكاسىندا «ساا» اۆياكومپانياسىنا قاراستى «Fokker 50» جولاۋشىلار ۇشاعى اپاتقا ۇشىرادى. «اسسوشەيتەد پرەسس» اگەنتتىگىنىڭ حابارلاۋىنشا, اپات سالدارىنان 36 ادام وپات بولدى.
ۇشاق ەلدىڭ ورتالىق بولىگىندەگى گوما قالاسىنىڭ ۇستىندە ورتالىق سايلاۋ كوميسسياسى ورنالاسقان عيماراتقا جاقىن جەردە قۇلاعان. ابىروي بولعاندا, قالا تۇرعىندارىنىڭ ەشقايسىسى زارداپ شەكپەگەن. ۇشقىش ۇشاقتى عيماراتقا سوقتىعىسۋدان الىپ ءوتىپتى. ال ۇشاق بورتىندا 40 جولاۋشى جانە ەكيپاج مۇشەلەرى بولعان ەكەن. اپاتقا نوسەر جاۋىن سەبەپ بولعان دەگەن بولجام جاسالىپ وتىر. بۇل ەلدە اۆيااپات ءجيى ورىن الادى. وتكەن جىلدىڭ جەلتوقسانىنداعى اپات سالدارىنان 32 جولاۋشى قازا تاپقان ەدى.
كۇدىكتى قاماۋعا الىندى
ماسكەۋ قالاسىنىڭ پوليتسياسى ۇلكەن تەاتردىڭ كوركەمدىك جەتەكشىسى سەرگەي فيلينگە قاستاندىق جاساعان كۇدىكتىنى ۇستادى. ىشكى ىستەر ورگاندارىنىڭ تاراتقان مالىمەتتەرى بويىنشا كۇدىكتىدەن جاۋاپ الىنىپ جاتىر.
اتى-ءجونى اتالماعان كۇدىكتى كەشە ەرتەڭگىسىن ماسكەۋ قالاسىنىڭ جانىنداعى ستۋپينو ەلدى مەكەنىندە قاماۋعا الىنعان. ەكىنشىسىنىڭ كىم ەكەنى ءالى انىقتالعان جوق. كەشە سونداي-اق, ۇستالعان كۇدىكتى بولعان بىرنەشە مەكەن-جايعا ءتىنتۋ جۇرگىزىلدى. ۇلكەن تەاتردىڭ ءباسپاسوز حاتشىسى ە.نوۆيكوۆانىڭ ايتۋىنشا, تەاترعا ءتىنتۋ جۇرگىزىلمەدى. سەرگەي فيلينگە وسى جىلدىڭ 17 قاڭتارىندا كەشكىسىن قاستاندىق جاسالعان ەدى. سونىڭ كەسىرىنەن وعان بىرنەشە رەت وپەراتسيا جاسالعان بولاتىن.
قىسقا قايىرىپ ايتقاندا:
*گرۋزيا پرەزيدەنتى ميحايل سااكاشۆيلي ادجاريادا ورنالاسقان رەزيدەنتسياسىنان باس تارتتى. جەرگىلىكتى باق-تاردىڭ جازۋىنشا, ول رەزيدەنتسيانى ۇكىمەتكە قايتارۋعا دايىن.
* قىرعىزستاننىڭ «ماناس» حالىقارالىق اۋەجايىنىڭ ماڭىنداعى اقش-تىڭ اۆيابازاسىنان وتكەن ءۇش اي ىشىندە 40 مىڭ دوللار بولاتىن ازىق-ت ۇلىك قولدى بولعان.
*انتونيو ءستراديۆاريدىڭ 2010 جىلى لوندوندا ۇرلانعان سكريپكاسى بولگاريادان تابىلدى. ول 1,8 ميلليون اقش دوللارىنا باعالانادى ەكەن.
*رەسەي پرەزيدەنتى جانىنداعى كازاكتار ىستەرى جونىندەگى كەڭەس جالپىرەسەيلىك كازاكتار قوعامى قاۋىمداستىعىن قۇرۋ تۋرالى شەشىم قابىلدادى. بۇل جونىندە رەسەيلىك باق-تار حابارلادى.
ينتەرنەت ماتەريالدارى نەگىزىندە ازىرلەندى.
