چاۆەستى كورسەتۋدى تالاپ ەتتى
سەيسەنبى, 5 ناۋرىز 2013 7:16
وپپوزيتسيا جاعىنداعىلار بۇرناعى كۇنى ۆەنەسۋەلا استاناسى كاراكاس قالاسىندا پرەزيدەنت ۋگو چاۆەستىڭ دەنساۋلىعىنان تولىق اقپارات بەرىلۋىن تالاپ ەتىپ, شەرۋ وتكىزدى. جۇزدەگەن دەمونسترانت قولدارىنا «بىزگە شىندىق كەرەك!», «وتىرىكتى دوعارىڭدار!» دەگەن پلاكاتتار ۇستاپ شىقتى.
سەيسەنبى, 5 ناۋرىز 2013 7:16
وپپوزيتسيا جاعىنداعىلار بۇرناعى كۇنى ۆەنەسۋەلا استاناسى كاراكاس قالاسىندا پرەزيدەنت ۋگو چاۆەستىڭ دەنساۋلىعىنان تولىق اقپارات بەرىلۋىن تالاپ ەتىپ, شەرۋ وتكىزدى. جۇزدەگەن دەمونسترانت قولدارىنا «بىزگە شىندىق كەرەك!», «وتىرىكتى دوعارىڭدار!» دەگەن پلاكاتتار ۇستاپ شىقتى.
رەسمي اقپاراتقا سايكەس, چاۆەس سوڭعى ەكى اپتادان بەرى كاراكاستاعى اسكەري گوسپيتالدە جاتىر. ول وندا قاتەرلى ىسىكتى الىپ تاستاۋ بويىنشا وتا جاسالعاننان كەيىن وڭالتۋ كۋرسىنان وتۋدە. ۇكىمەت وكىلدەرىنىڭ سوزدەرىنە قاراعاندا, قالپىنا كەلۋ كۇردەلىلىكتەرمەن ءوتىپ جاتىر, بىراق پرەزيدەنتتىڭ جاعدايى بىرتىندەپ جاقسارا ءتۇسۋ ۇستىندە. اۋرۋحانادا چاۆەستىڭ مەملەكەتتىك ىسپەن شۇعىلدانىپ جاتقانى دا اتاپ كورسەتىلگەن.
ءار قىزمەتكەر ءۇشىن – 2 ملن.
رەسەيدىڭ فەدەرالدى قاۋىپسىزدىك قىزمەتى شەتەلدە ءبىر قىزمەتكەرىن ۇستاۋ ءۇشىن ارقايسىسىنا جىلىنا كەم دەگەندە 2 ملن. رۋبل شىعىندايتىن بولادى. بۇل جونىندە جاڭا زاڭ جوباسىندا ايتىلادى. بۇل – دوستاس ەلدەرگە تۇراقتى جۇمىسقا باراتىن قىزمەتكەرلەر ءۇشىن بيۋدجەتتەن تولەنەتىن قارجى.
قۇجاتقا سايكەس, قازىرگى كەزدە بارلىعى 15 ادام قاراستىرىلىپتى. ولار ابحازياعا, وڭتۇستىك وسەتياعا جانە قىرعىزستانعا تۇراقتى تۇردە جۇمىس ىستەۋگە باراتىندار بولىپ تابىلادى. زاڭ جوباسىنىڭ اۆتورلارى ونى قابىلداۋ حالىقارالىق قىلمىسپەن ءتيىمدىرەك كۇرەسۋگە مۇمكىندىك بەرەدى دەيدى. جاقىن ارادا جوعارىداعى ءتىزىمدى كەڭەيتۋ جوسپارلانىپ وتىرسا كەرەك.
بولەك اۆتوبۋسپەن جۇرەتىن بولدى
يزرايلدە باتىس جاعالاۋدان ەلدىڭ ورتالىق بولىگىنە جۇمىس ىستەۋ ءۇشىن باراتىن پالەستينالىقتار ءۇشىن ارنايى اۆتوبۋس مارشرۋتتارى اشىلدى. بۇعان دەيىن پالەستينالىقتار يزرايلدىك قوعامدىق كولىكتى پايدالاناتىن. ۇكىمەتتەگىلەر جاڭا مارشرۋتتاردىڭ اشىلۋىن قاۋىپسىزدىك ءۇشىن جاسالعان شارالار دەپ تۇسىندىرەدى.
بۇعان دەيىن اۆتوبۋستا پالەستينالىقتار مەن يزرايلدىكتەر ءبىر-بىرىمەن وقتىن-وقتىن شەكىسىپ قالادى ەكەن. 3 ناۋرىزدان بەرى جاڭا اۆتوبۋستار پالەستينانىڭ كالكيليا قالاسىنداعى باقىلاۋ-تەكسەرۋ بەكەتىنەن جۇرە باستاعان. رەسمي مالىمەت بويىنشا, يزرايلدە جۇمىس ىستەيتىن 29 مىڭ پالەستينالىق بار كورىنەدى. ولار كەي جاعدايدا ەكى ارالىقتى جاياۋ ءجۇرىپ وتسە, كەي جاعدايدا تاكسي جالداۋعا ءماجبۇر بولىپ كەلىپتى.
كوشە سىپىرۋشىلارعا – 150 $
دۋشانبە مەرياسى قالانى دامىتۋعا ۇلەس قوسقان ايەلدەردى ىنتالاندىرعان ءجون دەپ شەشتى. وسى ماقساتتا قالا مەرى ماحمادسايد ۋبايدۋللوەۆ رەزەرۆتىك قوردان 1,8 ملن. سوموني (380 مىڭ دوللار شاماسىندا) ءبولۋدى بۇيىردى. بۇل سومانىڭ باسىم بولىگى – 1,7 ملن. ءسومونيى كوشە سىپىرۋشىلارعا بەرىلمەك. ولاردىڭ ارقايسىسى 700 سومونيدەن (شامامەن 150 دوللار) الاتىن بولادى.
ايەل ارداگەرلەرگە 600 سومونيدەن تيسە, قالا قۇرىلىمدارىنىڭ قىزمەتكەر ايەلدەرى 100 دوللاردان الادى ەكەن. اقشالاي سىيلىقتار تاجىكستاندا 8 ناۋرىزدا اتاپ وتىلەتىن انا كۇنى مەرەكەسىنە وراي بەرىلگەلى وتىر. بۇل ازداعان اقشا ناۋرىز مەيرامىنا بەرىلەتىن سىياقى ەسەبىنە دە ەنەدى ەكەن. ال بۇل سىياقىلار قالا مەرىنىڭ تاپسىرماسىنا سايكەس ناۋرىزدان باستاپ سالتاناتتى جاعدايدا تاپسىرىلىپ جاتىر.
جۇمسارتۋ ءۇشىن شارت قويدى
ۋكراينا پرەزيدەنتى ۆيكتور يانۋكوۆيچ بۇرىنعى ۇكىمەت باسشىسى يۋليا تيموشەنكونىڭ جازاسىن جۇمسارتۋ ءۇشىن وعان شارت قويدى. 1 ناۋرىز كۇنى بولعان ءباسپاسوز ءماسليحاتىندا پرەزيدەنت جاڭا قىلمىستىق-پروتسەسسۋالدىق كودەكس ەكونوميكالىق باپتارعا بايلانىستى جازالاردى «گۋمانيزاتسيالاۋعا» مۇمكىندىك بەرەتىنىن اتاپ ءوتتى.
بۇل قانداي گۋمانيزاتسيا بولماق؟ ۆ.يانۋكوۆيچتىڭ مالىمدەۋىنشە, ەگەر سوتتالعان ادام مەملەكەتكە كەلتىرگەن شىعىنىنىڭ ورنىن تولتىراتىن بولسا, وندا جازاسىن جەڭىلدەتۋگە مۇمكىندىك بار. «مىنە, ول (تيموشەنكو) وسىنى ويلاۋى ءتيىس», دەپ اتاپ كورسەتكەن پرەزيدەنت. ەكس-پرەمەر رەسەيمەن گاز كەلىسىم-شارتتارىن جاساسۋدا قىزمەت بابىن اسىرا پايدالاندى دەگەن ايىپپەن 7 جىلعا باس بوستاندىعىنان ايىرىلعانى بەلگىلى.
ايەلدەرگە 40 ماناتتان سىيلايدى
تۇركىمەنستان ايەلدەرى 8 ناۋرىز مەيرامىنا وراي مەملەكەت باسشىسى گۋربانگۋلى بەردىمۇحامەدوۆتەن سىيلىق رەتىندە 40 ماناتتان (14 اقش دوللارى شاماسىندا) الاتىن بولادى. مۇنداي جارلىققا پرەزيدەنت وتكەن جۇما كۇنى ۇكىمەت ماجىلىسىندە قول قويدى. مەملەكەت باسشىسىنىڭ اتىنان اقشالاي سىيلىق جاسى مەن جۇمىس ورنىنا قاراماستان, ەلدىڭ بارلىق ايەلدەرىنە بەرىلەدى.
ايەلدەر مەيرامىنا وراي مەملەكەت باسشىسىنىڭ اتىنان اقشا بەرۋ ءبىرىنشى پرەزيدەنت ساپارمۇرات نيازوۆتىڭ كەزىندە پايدا بولعان-تىن. بىراق ول حالىقارالىق ايەلدەر كۇنىن 2001 جىلى الىپ تاستاعان ەدى. سودان كەيىن ايەلدەر كۇنى مەن ناۋرىز مەيرامىن بىرىكتىرگەن مەرەكە 20, 21 جانە 22 ناۋرىز كۇندەرى اتاپ وتىلەتىن. مەملەكەت باسىنا گ.بەردىمۇحامەدوۆ كەلگەلى, ياعني 2008 جىلدان بەرى 8 ناۋرىز – ايەلدەر كۇنى قايتادان اتاپ ءوتىلىپ كەلەدى.
قىسقا قايىرىپ ايتقاندا:
*يراندا 200 مىڭ جانە 500 مىڭ كۋپيۋرالىق ريالدار اينالىمعا شىعارىلادى دەگەن جوسپار بار. ويتكەنى, ەۋرووداق پەن اقش يراننىڭ مۇنايىنا ەمبارگو جاريالاعالى بەرى ريالدىڭ قۇنى تىم ءتۇسىپ كەتكەن ەدى. بۇگىندە «قارا» بازاردا 1 دوللار 40 مىڭ ريالعا تەڭ.
*مىسىردا دىنارالىق نەگىزدەگى قاقتىعىستار جالعاسىپ جاتىر. شەرۋلەر ءال-مانسۇر قالاسىندا قايتادان بۇرق ەتتى. بەيبىت باستالعان اكتسيا كەيىن تارتىپسىزدەرگە ۇلاستى. زارداپ شەككەندەر بار. پوليتسيا شەرۋشىلەرگە قارسى كوزدەن جاس اعىزاتىن گاز قولدانۋدا.
*رەسەيدىڭ «روستەحنولوگيا» كورپوراتسياسىنىڭ قۇرامىنا كىرەتىن «ف.كوروتكوۆ اتىنداعى «تەمپ» ااق-تىڭ باس ديرەكتورى 21 ملن. رۋبلدەن استام اقشانى ۇرلادى دەپ ايىپتالىپ وتىر. كاسىپورىنعا ءتىنتۋ جۇرگىزىلىپ, بۋحگالتەرلىك جانە باسقا دا قۇجاتتامالار تەكسەرىلىپ جاتىر.
ينتەرنەت ماتەريالدارى نەگىزىندە ازىرلەندى.
