شاراينا
بەيسەنبى, 28 اقپان 2013 7:25
كۇزەت قىزمەتىنەن باس تارتتى
گرۋزيا پرەزيدەنتى ميحايل سااكاشۆيلي مەملەكەتتىك كۇزەت قىزمەتىنەن تولىقتاي باس تارتۋعا شەشىم قابىلدادى. بۇل تۋرالى مەملەكەت باسشىسىنىڭ ءباسپاسوز حاتشىسى مانانا ماندجگالادزە مالىمدەدى. ول سونداي-اق قابىلدانعان شەشىم پرەزيدەنتتىڭ جۇمىس كەستەسى مەن تۇرعىندارمەن كەزدەسۋىنە ەشقانداي كەرى اسەر ەتپەيتىنىن اتاپ كورسەتتى.
بەيسەنبى, 28 اقپان 2013 7:25
كۇزەت قىزمەتىنەن باس تارتتى
گرۋزيا پرەزيدەنتى ميحايل سااكاشۆيلي مەملەكەتتىك كۇزەت قىزمەتىنەن تولىقتاي باس تارتۋعا شەشىم قابىلدادى. بۇل تۋرالى مەملەكەت باسشىسىنىڭ ءباسپاسوز حاتشىسى مانانا ماندجگالادزە مالىمدەدى. ول سونداي-اق قابىلدانعان شەشىم پرەزيدەنتتىڭ جۇمىس كەستەسى مەن تۇرعىندارمەن كەزدەسۋىنە ەشقانداي كەرى اسەر ەتپەيتىنىن اتاپ كورسەتتى.
م.ماندجگالادزە بۇعان قوسا ۇكىمەت ەگەر پرەزيدەنت كونستيتۋتسياعا وزگەرىس ەنگىزۋگە كەلىسەتىن بولسا, وندا ونىڭ جەكە كۇزەتىن كۇشەيتۋ تۋرالى ۇسىنىس جاساعانىن جاريا ەتتى. ال پرەزيدەنت كونستيتۋتسياعا وزگەرىس ەنگىزۋ ونىڭ جەكە ماسەلەسىمەن بايلانىستى بولۋى ءتيىس ەمەس دەپ ەسەپتەيدى ەكەن. كونستيتۋتسياعا ۇسىنىلىپ وتىرعان وزگەرىس پرەزيدەنتتى ۇكىمەتتى پارلامەنتتىڭ كەلىسىمىنسىز وتستاۆكاعا جىبەرۋ قۇقىنان ايىرۋدى كوزدەيدى.
رەسەي مەن نيگەريا تەڭ ەلدەر مە؟
دامۋشى ەلدەردەگى, اسىرەسە, رەسەي, نيگەريا جانە رۋمىنياداعى مەملەكەتتىك ساياساتتىڭ دايەكسىزدىگى وسى ەلدەردىڭ رىنوكتارىندا Coca-Cola ساتۋعا كەرى اسەرىن تيگىزۋى ىقتيمال. بۇل جونىندە كومپانيانىڭ باسشىلىعىنا سىلتەمە جاساي وتىرىپ, كەشەگى نومىرىندە «ۆەدوموستي» باسىلىمى جازعان.
سۋسىن وندىرۋشىلەردىڭ اتاپ وتۋىنشە, رەسەي مەن نيگەرياعا ءتان قۇقىقتىق ناقسىزدىق ۇلكەن تاۋەكەلگە بارۋدى تالاپ ەتەدى. ويتكەنى, اتالعان مەملەكەتتەردە جەمقورلىقتىڭ دەڭگەيى اسا جوعارى. كومپانيا قۇجاتتى باسقا ەلدەردى ساقتاندىرۋ ءۇشىن دە تۇزگەن سەكىلدى. جالپى, اتالعان ماسەلە شىعىس ەۋروپا ەلدەرى ءۇشىن قالىپتى جاعداي سانالسا, كومپانيانىڭ باس اۋرۋىنا اينالىپ وتىر دەۋگە بولادى.
9 مامىردى ازا كۇنى دەپ جاريالاماق
لاتىش ۇلتشىلدارى 9 مامىردى ازا تۇتۋ كۇنى رەتىندە تانۋ تۋرالى زاڭ جوباسىن دايىنداعان. ولار «9 مامىر جىل سايىن ءبىزدىڭ ءالى دە قاتەردىڭ الدىندا تۇرعانىمىزدى, ورىستاندىرۋ قاۋپى بار ەكەنى تۋرالى ەسىمىزگە سالىپ تۇرادى. لاتۆيادا كۇنى بۇگىنگە دەيىن كوپتەگەن جاۋلارىمىز ءومىر ءسۇرىپ جاتىر», دەيدى.
زاڭ جوباسىن دايىنداعان دەپۋتات رايۆيس دزينتارستىڭ سوزىنە قاراعاندا, قۇجات ەل پارلامەنتىنە جاقىن ارادا ۇسىنىلاتىن بولادى. زاڭ جوباسىندا سونداي-اق رەسپۋبليكادا رەسمي ەسكە الۋ داتاسى رەتىندە 16 ناۋرىز كۇنى اتالىپ وتەتىن SS لەگيونەرلەرىنىڭ كۇنىن قالپىنا كەلتىرۋ دە ۇسىنىلادى. ال اتالعان ەلدى ناتسيستەر 1941 جىلى باسىپ العان بولاتىن. سوعىس ۋاقىتىندا لاتىشتىڭ اسكەري بولىمدەرى قىزىل ارميا قاتارىندا ءىس-قيمىل تانىتقانى دا راس.
قىسقا قايىرىپ ايتقاندا:
اقش-تىڭ وڭتۇستىك كارولينا شتاتىنداعى كونۆەي قالاسى ۋنيۆەرسيتەتىنىڭ جاتاقحاناسىندا بەلگىسىز بىرەۋ وق اتىپ, وق تيگەن 19 جاسار ستۋدەنت ەنتوني دارنەلل ليددەلل قازا تاپقان.
گرۋزيا استاناسى – تبيليسي قالاسىنداعى اسا ءىرى جيھاز ساۋدا ورتالىعىنداعى ءورت سالدارىنان جالپى سوماسى 1 ميلليون دوللار تۇراتىن جيھاز كۇلگە اينالعان. م ۇلىك ساقتاندىرىلماعان ەكەن.
مەكسيكانىڭ سيۋداد-اكۋنيا قالاسىندا ميني-يۋبكا كيۋگە جانە ەرلەردىڭ ايەل كيىمىن كيىپ كوشەگە شىعۋىنا تىيىم سالىندى. اتالعان قالا مەكسيكا مەن اقش-تىڭ شەكاراسىندا ورنالاسقان.
زاڭسىز ميگرانتتار سانى – 3 ملن.
فەدەرالدى ميگراتسيالىق قىزمەتتىڭ (فمق) باسشىسى كونستانتين رومودانوۆسكي رەسەيدە 3,3 ميلليون زاڭسىز شەتەلدىكتەر بار ەكەنى ەسەپتەلىپ شىعارىلعانىن مالىمدەدى. ولاردىڭ اراسىندا ەڭ كوبى وزبەكتەر ەكەن – 900 مىڭ ادام.
ۋكراينالىقتار 500 مىڭ ادامدى قۇراسا, تاجىكستاننان كەلگەندەر سانى شامامەن 400 مىڭداي ەكەن. فمق باسشىسىنىڭ سوزىنە قاراعاندا, ميگرانتتاردىڭ رەسەيدە زاڭدى بولۋىنا مۇمكىندىك بەرەتىن 3 ايلىق مەرزىم الدەقاشان ءوتىپ كەتكەن, سوندىقتان ولاردىڭ ءبارى بۇگىندە زاڭسىز تۇردە جۇمىس ىستەۋدە. جالپى العاندا, رەسەيدە قازىر 10,2 ميلليون شەتەلدىك بولسا, ولاردىڭ 2,3 ميلليونى وزبەكتەر, 1,3 ميلليونى ۋكرايندار, 1 ميلليونى تاجىكتەر كورىنەدى.
التىن كەنىشىندەگى جەمقورلىق
قىرعىزستاننىڭ باس پروكۋراتۋراسى ەلدەگى اسا ءىرى التىن كەن ورنى – «قۇمتور» توڭىرەگىندەگى جەمقورلىققا بايلانىستى قىلمىستىق ءىس قوزعادى. جەمقورلىققا كەن ورنىندا التىن وندىرۋمەن اينالىساتىن كومپانيالارمەن 1992-2009 جىلدار ارالىعىندا كەلىسىم جاساسقان جەرگىلىكتى شەنەۋنىكتەردىڭ قاتىسى بار دەلىنىپ وتىر.
قىلمىستىق ءىس جەمقورلىق, قىزمەت بابىن اسىرا پايدالانۋ جانە قىرعىز رەسپۋبليكاسىنىڭ مۇددەسىنە ساي كەلمەيتىن كەلىسىمدەر جاساسۋ دەگەن باپتار بويىنشا قوزعالعان. «رەيتەر» اگەنتتىگىنىڭ اقپاراتىنا قاراعاندا, «قۇمتور» قىرعىزستان ىشكى جالپى ءونىمىنىڭ 12 پايىزىن جانە ەكسپورتىنىڭ جارتىسىنان استامىن قامتاماسىز ەتەتىن كورىنەدى. قىرعىزستاندا كەن ورنىن مەملەكەت مەنشىگىنە الۋ جونىندە ۇسىنىستار وقتىن-وقتىن ايتىلىپ كەلە جاتقانىمەن, ول ەل باسشىلىعى تاراپىنان ءالى كۇنگە قولداۋ تاپپاي وتىرسا كەرەك.
كيت اۋلاۋدىڭ ماقساتىن اتادى
جاپونيا ۇكىمەتى كيتتەردى عىلىمي ماقساتتا ەمەس, تاماق رەتىندە اۋلاۋعا رۇقسات بەرىلگەنىن رەسمي تۇردە العاش رەت مويىندادى. بۇل جونىندە ەلدىڭ بالىق شارۋاشىلىعى ءمينيسترى يوسيماسا حاياسي مالىمدەدى.
ي.حاياسي جاپوننىڭ كيت اۋلاۋ پراكتيكاسىنا نارازى شەتمەملەكەتتەر مەن حالىقارالىق ۇيىمداردىڭ ۇستانىمىن سىن تەزىنە الدى. ونىڭ ايتۋىنشا, كيت اۋلاۋ كاسىپشىلىگىنە شابۋىل جاپون مادەنيەتىنە شابۋىل بولىپ تابىلادى. كيت كاسىپشىلىگى جونىندەگى حالىقارالىق كوميسسيا كيتتەردى اۋلاۋعا تىيىم سالعانىمەن, جاپونيا ونى اۋلاۋدى جالعاستىرىپ كەلەدى. بۇعان دەيىن كيتتەر عىلىمي ماقساتتا اۋلانادى دەپ بۇركەمەلەنسە, ەندى ولاردىڭ ەتتەرى كوپ جاعدايدا مەيرامحانالاردان تابىلاتىنى بەلگىلى بولىپ وتىر.
ينتەرنەت ماتەريالدارى نەگىزىندە ازىرلەندى.
