«قازاقستان» قوناقۇيىندە جۋرناليستەرمەن ءباسپاسوز ءماسليحاتىن وتكىزگەن پولشادان كەلگەن بايقاۋشى ۆيولەتتا پوروۆسكانىڭ سوزىنشە, مەملەكەت تاريحىنداعى تاعدىرشەشتى وقيعا بارلىق تالاپتارعا ساي ءوتتى.
«قازاقستان سايلاۋعا جوعارى دەڭگەيدە دايىندالعان. حالىقارالىق بايقاۋشىلاردىڭ جۇمىسىنا ەشقانداي شەكتەۋ قويىلعان جوق. ءبىز ءبىر-بىرىمىزبەن ەركىن پىكىر الماسىپ, بارلىق پروتسەستى باقىلاپ وتىردىق. مەن ءبىر ۋچاسكەدە 47-ءشى بايقاۋشى بولىپ قاتىستىم. بۇل دەگەنىڭىز سايلاۋدى كوپتەگەن ەلدىڭ بايقاۋشىلارى باقىلاپ وتىردى دەگەن ءسوز. سايلاۋ ءادىل ءارى اشىق ءوتىپ جاتىر دەپ ايتا الامىن. مۇمكىندىگى شەكتەۋلى ازاماتتاردىڭ تاريحي وقيعادان تىس قالماۋى ەسكەرىلگەنى قۋانتادى», دەيدى ۆيولەتتا پوروۆسكا.
رۋمىن ەلىنەن كەلگەن قوس بىردەي بايقاۋشى تريف رارەش پەن يۋركان جوناش فلوريش تە وسى پىكىرگە توقايلاستى. الماتىداعى 10 سايلاۋ ۋچاسكەسىنە بارىپ, پروتسەستى ءوز كوزدەرىمەن باقىلاعان ساراپشىلار ەشقانداي زاڭبۇزۋشىلىق ارەكەتىن بايقاماعاندارىن جەتكىزدى.
«ماعان قازاقستانداعى سايلاۋ پروتسەسىن باقىلاۋ وتە قىزىق بولدى. سايلاۋعا جاستاردىڭ بەلسەندى تۇردە قاتىسقانىن انىق بايقادىم. بۇل – جاس بۋىننىڭ ەل ەرتەڭىنە نەمقۇرايلى قارامايتىنىن اڭعارتسا كەرەك. ءتۇسكە دەيىن سايلاۋشىلاردىڭ 20 پايىزى داۋىس بەرۋگە كەلدى. بۇل – وتە جوعارى كورسەتكىش», دەيدى يۋركان جوناش فلوريش.
«ەشقانداي زاڭعا قايشى جاعدايدى بايقاعان جوقپىن. تەك ءبىر ايەل ازامات ءوزىن داۋىس بەرۋشىلەر تىزىمىنەن تاپپادى. ونداي جاعدايلار ءجيى بولىپ تۇرادى. سايلاۋشىلاردىڭ اراسىندا ستۋدەنتتەردىڭ كەزەكتە تۇرعانىن باقىلادىق. بۇل – ازاماتتىق قوعامداعى دەموكراتيانىڭ سالتانات قۇرعانىن كورسەتەدى», دەدى حالىقارالىق ادام قۇقىقتارىن قورعاۋ ۇيىمىنىڭ كەڭەسشىسى رارەش تريف.
№40 مەكتەپتە ورنالاسقان سايلاۋ ۋچاسكەسىنە وتباسىمەن كەلىپ تاڭداۋ جاساعان قالا اكىمى باۋىرجان بايبەك بولاشاعىمىزدى ايقىندايتىن ساتتە ەلىم دەگەن ءاربىر ازامات سايلاۋدان قالىس قالماۋ قاجەت دەيدى. بۇدان بولەك التىنبەك قورازباەۆ, روزا رىمباەۆا سىندى ونەر مايتالماندارى بارشا قالا جۇرتشىلىعىن بەلسەندى بولۋعا شاقىردى. №54 سايلاۋ ۋچاسكەسىندە داۋىس بەرگەن ەلىمىزدەگى «100 جاڭا ەسىم» جوباسىنىڭ جەڭىمپازى, پيانيست راحات-بي ابدىساعىن ەلدىڭ جارقىن بولاشاعى ءۇشىن سايلاۋعا يتاليادان ارنايى ۇشىپ كەلگەنىن ايتتى.
تاعى ءبىر ايتا كەتەرلىگى, ايتۋلى كۇنى قالاداعى بارلىق قوعامدىق كولىكتەر جولاۋشىلارعا تەگىن قىزمەت كورسەتتى.
ارمان وكتيابر,
عالىم سۇلەيمەن,
«Egemen Qazaqstan»
الماتى
