باشار اساد قاشاندا كەشىگىپ قالادى
جۇما, 22 اقپان 2013 7:02
داماسكىدەن ءبىر جاقسى حابار ەستىلدى. ەل پرەزيدەنتى باشار اساد العاش رەت قارۋلى وپپوزيتسيا وكىلدەرىمەن كەلىسسوز جۇرگىزۋگە ىقىلاس ءبىلدىرىپتى. بۇل جونىندەگى حاباردى ەلدىڭ ۇلتتىق كەلىسىم جونىندەگى ءمينيسترى الي حايدار ايتتى.
جۇما, 22 اقپان 2013 7:02
داماسكىدەن ءبىر جاقسى حابار ەستىلدى. ەل پرەزيدەنتى باشار اساد العاش رەت قارۋلى وپپوزيتسيا وكىلدەرىمەن كەلىسسوز جۇرگىزۋگە ىقىلاس ءبىلدىرىپتى. بۇل جونىندەگى حاباردى ەلدىڭ ۇلتتىق كەلىسىم جونىندەگى ءمينيسترى الي حايدار ايتتى.
جاقسىلىق حابار ەكەنى داۋسىز. بىراق وعان ءبىر ءتۇرلى كوڭىل سەنبەيدى. ويتكەنى, سول باشار اساد بۇعان دەيىن كوتەرىلىسشىلەرمەن ەشقانداي كەلىسسوزگە بارمايتىنىن تالاي رەت مالىمدەگەن. رەسمي بيلىك وكىلدەرى كوتەرىلىسشىلەردى لاڭكەستەر سانايدى. ءتىپتى اسادتىڭ ءوزى ساتقىندارمەن جانە باتىستا جاسالعان قۋىرشاقتارمەن ەشقانداي ءۇن قاتىسۋ مۇمكىن ەمەس دەپ شەگەلەپ ايتقان.
كەلىسسوزگە بارۋدى وعان بۇۇ قاۋىپسىزدىك كەڭەسى مەن اراب مەملەكەتتەرى ليگاسى دا تالاي رەت ۇسىنعان. وسى ەكى ۇيىمنىڭ ايىرىقشا بەدەلدى وكىلى كوفي اننان باشار اسادپەن بىرنەشە رەت كەزدەسىپ, ونى كوتەرىلىسشىلەرمەن, وپپوزيتسيا وكىلدەرىمەن كەلىسسوزگە وتىرعىزا الماعان. ونىڭ مۇنداي توڭمويىندىق كورسەتۋىنىڭ باستى سەبەبى – اسادتىڭ جوسىقسىز قىڭىرلىعىنا رەسەي مەن قىتايدىڭ قولداۋ كورسەتۋى. بۇۇ قاۋىپسىزدىك كەڭەسى تاراپىنان داماسكىگە قاتقىلداۋ شارا قولدانۋ جونىندەگى بۇۇ قاۋىپسىزدىك كەڭەسىنىڭ شەشىمى ازىرلەنسە, وعان اتالعان ەكى ەل ۆەتو قۇقىن پايدالانىپ, ونى قابىلداتپاي تاستايدى.
حالىقتىڭ تالابىنا كەزىندە قۇلاق اسپاۋ, قۇلاق اسسا دا كەشىگىپ قۇلاق اسۋ باشار اسادتىڭ تۇبىنە جەتىپ وتىرعان اۋرۋ دەسە دە بولعانداي. «اراب كوكتەمى» باستالىپ, ونىڭ تولقىنى سيرياعا جەتكەندە, ازىرگە قارۋلانباعان حالىق پرەزيدەنتتەن ەلدەگى توتەنشە جاعدايدى جوي, ۇكىمەتتى اۋىستىر, وعان حالىقتى قاتىستىر دەگەن تالاپ قويدى. ەندى ەلدە وتىز جىلدان اسا ۋاقىت توتەنشە جاعدايدىڭ ورناپ كەلگەنى ەستىگەن قۇلاققا دا ەرسى جاي. ءبىر قيىن-قىستاۋ كەزەڭ ەمەس, تۇراقتى تۇردە توتەنشە جاعدايدا ءومىر ءسۇرۋ دەگەن سۇمدىق. سونى بىلە تۇرىپ اساد ونى جويۋدان باس تارتتى.
كوتەرىلگەن حالىق مۇنىمەن كەلىسپەدى. كوشەگە شىعىپ, كۇشىن كورسەتتى. ءدال وسىنداي كۇشپەن حالىقتىڭ ءبىراز ەلدىڭ باسشىلارىن قۇلاتقانىن كورگەن اساد توتەنشە جاعدايدى جويىپ, حالىققا تىلەكتەرىڭدى ورىندادىم دەگەندە, ەندى ءوزىنىڭ كۇشىنە كوزى جەتكەن حالىق: مۇنىڭ كەش, دەگەندى ايتتى. ۇكىمەتتى ورنىنان ءتۇسىرۋ جونىندەگى تالاپ تا وسىلاي بولدى. الدىمەن كونبەي, كەيىن كەلىسكەنىنە حالىق كونبەي, قارۋلى كۇرەسكە شىقتى. ول بۇگىنگى دەيىن سوزىلىپ كەلەدى. سونىڭ سالدارىنان 70 مىڭداي ادام قازا تاپتى.
جوعارىدا ايتىلعانداي, باشار اسادقا وپپوزيتسيا مەن كەلىسسوزگە وتىرۋ جونىندە تالاي ۇسىنىس جاسالعان, وعان پرەزيدەنت كونبەگەن. ەندى ءوزىنىڭ ۇسىنىس جاساعانىنا كوڭىل سەنبەگەنمەن, بۇل ءساتتى پايدالانعان ءجون-اق. مينيستر الي حايدار سەندىرىپ وتىر: «ەل پرەزيدەنتى بىزگە ساياسي تۇرعىدا قارسىلاستاردىڭ ارقايسىمەن كەلىسسوز جۇرگىزۋگە تىرىسامىز, ءتىپتى قارۋ قولدانۋشىلارمەن دە كەلىسسوز جۇرگىزۋگە ارەكەت جاسايمىز دەدى», – دەيدى ول.
كەلىسسوزدىڭ بولعانى جاقسى. ونى ەۋرووداق سىرتقى ساياسات جەتەكشىسى ك.ەشتون دا قۇپتايدى. ول بۇل رەتتە سيريانىڭ وپپوزيتسيالىق كواليتسياسىنىڭ كوسەمى مۋاز ءال-حاتىبتىڭ ساياسي ۇنقاتىسۋعا ازىرلىگىن العا توسادى. سويتسە دە كەلىسسوز وڭايعا سوقپاسا كەرەك. ءال-حاتىب ءبىراز شارت قويادى. ونىڭ ءبىرى – بيلىك 160 مىڭ ساياسي تۇتقىندى بوساتسىن, دەيدى. باشار اسادتىڭ مۇنداي تالاپتى ورىنداۋى قيىن-اق. ال ورىنداماسا, ونىڭ جاعدايى ودان دا قيىنداۋى ابدەن مۇمكىن. ءسىرا, بۇل پرەزيدەنتتىڭ سوڭعى مۇمكىندىگى شىعار. بۇل جولى كەشىگەر بولسا, ول مۇلدەم كەشىگەدى.
ماماديار جاقىپ,
«ەگەمەن قازاقستان».
