الدىن الا مالىمەتتەر جاريالانعاننان كەيىن قاسىم-جومارت توقاەۆ وزىنە سەنىم بىلدىرگەن بارشا وتانداستارىنا العىسىن ءبىلدىردى.
– سايلاۋالدى ناۋقان وركەنيەتتى ءارى جۇيەلى تۇردە جۇرگىزىلدى. شىن مانىندە بۇل ناۋقان باعدارلامالاردىڭ باسەكەسى بولدى. حالىق بىزگە سەنىم ارتىپ, ءوز تاڭداۋىن جاسادى. سوندىقتان الدىمىزدا اۋقىمدى جۇمىستار كۇتىپ تۇر, – دەدى قاسىم-جومارت توقاەۆ.
ول ۇگىت-ناسيحات كەزەڭىنە قاتىسقان رەسپۋبليكالىق قوعامدىق شتابتىڭ مۇشەلەرىنە, بارلىق بەلسەندى ازاماتتارعا جانە پارتيا جاقتاستارىنا اتقارعان جۇمىستارى ءۇشىن العىسىن ءبىلدىرىپ, ەلەكتورالدى ناۋقاننىڭ اۋقىمى مەن تەحنولوگيالىق مۇمكىندىگىن اتاپ ءوتتى.
– بۇكىل الەمدەگى سياقتى ءبىزدىڭ ەلىمىزدە دە جاعدايدىڭ وزگەرگەنىن كورىپ وتىرسىزدار. الەمدىك قاۋىمداستىقتىڭ ءبىر بولشەگى بولعاندىقتان قازاقستانعا جاھاندىق وقيعالاردىڭ دا ىقپالى بولارى ءسوزسىز. سوندىقتان ءبىز ەلىمىزدىڭ جارقىن بولاشاعى ءۇشىن جۇدىرىقتاي جۇمىلۋىمىز كەرەك, – دەدى ق.توقاەۆ.
جينالعاندارعا ارناعان سوزىندە قاسىم-جومارت كەمەل ۇلى قازاقستاننىڭ بۇگىنگى جەتىستىكتەرى ەلباسى ەسىمىمەن تىعىز بايلانىستى ەكەنىن ايتتى.
– قازاقستاننىڭ تۇڭعىش پرەزيدەنتى – ەلباسى نۇرسۇلتان ءابىش ۇلى نازارباەۆ بۇكىل الەم مويىنداعان قۋاتتى, كوپ ۇلتتى مەملەكەت قۇردى. ءبىزدىڭ ەندىگى ءمىندەتىمىز – قولداعى بارىمىزدى قادىرلەپ, جەتىستىكتەرىمىزدى ساقتاپ, ورلەۋ مەن جاسامپازدىق جولىندا بولاشاققا باتىل قادام باسۋ, – دەدى ق.توقاەۆ.
رەسپۋبليكالىق قوعامدىق شتابتىڭ جەتەكشىسى, Nur Otan پارتياسى توراعاسىنىڭ ءبىرىنشى ورىنباسارى ماۋلەن اشىمباەۆ الداعى ۋاقىتتا پارتيانىڭ ەلباسى جولىن ءارى قاراي جالعاستىرىپ, سايلاۋالدى باعدارلامانى جۇزەگە اسىرۋ ءۇشىن بار كۇش-جىگەرىن جۇمسايتىنىن ايتتى.
– بۇگىن قازاقستاندىقتاردىڭ باسىم بولىگى ءبىزدىڭ كانديداتىمىز قاسىم-جومارت توقاەۆقا داۋىس بەرۋ ارقىلى ەلباسى ساياساتىنىڭ ساباقتاستىعىنا جانە بىرلىك پەن تۇراقتىلىققا قولداۋ ءبىلدىردى, – دەدى م.اشىمباەۆ.
سونىمەن قاتار ءىس-شارادا رەسپۋبليكالىق شتابتىڭ مۇشەلەرى, ايماقتىق شتابتار مەن «Team Qazaqstan» جاستار قاناتىنىڭ وكىلدەرى ءسوز سويلەدى. ولار exit-pool-دىڭ ناتيجەسىنە ءبىراۋىزدان قولداۋ ءبىلدىرىپ, قازاقستان حالقىن وتكەن پرەزيدەنت سايلاۋىمەن قۇتتىقتادى.
سايلاۋالدى ناۋقان كەزىندە ەلىمىز بويىنشا كانديداتتىڭ 228 شتابى جۇمىس ىستەدى. ءموبيلدى ۇگىت-ناسيحات توبىنىڭ قۇرامىندا بولعان 20 مىڭنان استام سەنىمدى وكىل «ەسىكتەن ەسىككە» اكتسياسى اياسىندا سايلاۋشىلارمەن كەزدەستى. ەلىمىز بويىنشا كانديداتتىڭ 228 قوعامدىق قابىلداۋى تۇراقتى جۇمىس ىستەپ, 21 مىڭنان استام ازاماتتى قابىلدادى.
