09 ماۋسىم، 2019

سەنساتسيا. شىعىس قازاقستاننان ساقتاردىڭ تۇڭعىش قونىسى تابىلدى

3307 رەت كورسەتىلدى

ەلدىڭ ءبارى ساقتاردى كوشپەلى، اندا-مۇندا كوشىپ جۇرگەن دەپ ويلايدى. سونداي ستەرەوتيپ قالىپتاسقان. بۇل ەسكەرتكىش ولاردىڭ وتىرىقشى بولعاندىعىن، ەگىنشىلىكپەن شۇعىلدانعاندىعىن كورسەتىپ وتىر.

وسىنداي سەنساتسيالىق جاڭالىقتى شىعىس قازاقستان وبلىسى اكىمىنىڭ ورىنباسارى اسەم ءنۇسىپوۆا ءوزىنىڭ فەيسبۋكتەگى پاراقشاسىندا جازدى. «بۇگىن، سايلاۋ كۇنىندە بەلگىلى ارحەولوگ زەينوللا ساماشەۆ وبلىس اكىمى دانيال احمەتوۆكە ۇلان اۋدانى اۋماعىنداعى اقباۋىر ۇڭگىرىنىڭ ماڭىنان (بەستەرەك اۋىلى) وسىنداي سەنساتسيالىق جاڭالىق اشىلعانىن حابارلادى» دەيدى وبلىس اكىمىنىڭ ورىنباسارى.

ءبىز بۇل جاڭالىقتى ەستىگەن سوڭ بىردەن ارحەولوگ زەينوللا ساماشەۆكە تەلەفون شالدىق. «بۇل – ەجەلگى ساقتاردىڭ قونىسى. وتە قۇندى ەسكەرتكىش. قۇندىلىعى، بىزدە ساقتاردىڭ قونىستارى جوق قوي. ەلدىڭ ءبارى ساقتاردى كوشپەلى، اندا-مۇندا كوشىپ جۇرگەن دەپ ويلايدى. سونداي ستەرەوتيپ قالىپتاسقان. بۇل ەسكەرتكىش ولاردىڭ وتىرىقشى بولعاندىعىن، ەگىنشىلىكپەن شۇعىلدانعاندىعىن كورسەتىپ وتىر. قازبا بارىسىندا بيدايدى ۇنتاقتايتىن قۇرالدار تابىلدى. ولاردىڭ مەكەن ەتكەن دوڭگەلەك ۇيلەرىنىڭ ورىندارى شىقتى. بۇل  - ۇلكەن قونىس. ءبىز سونىڭ تورتتەن ءبىر بولىگىن باستاپ قازىپ جاتىرمىز. ەكى-ءۇش كۇننەن كەيىن «ەلەكە سازىنا» كەتەتىندىكتەن مۇنداعى قازبا جۇمىستارىن كەلەسى جىلى جالعاستىرامىز» دەگەن ارحەولوگ بۇل قونىستىڭ كولەمى شامامەن 3084 شارشى مەتر ەكەندىگىن، مۇنداي ەسكەرتكىش شىعىس قازاقستان اۋماعىنان تۇڭعىش تابىلىپ وتىرعاندىعىن جەتكىزدى.

«بۇل - اسىقپاي، 6-7 جىل قازىلاتىن دۇنيە. ساقتار ءداۋىرىنىڭ العاشقى كەزەڭىنە جاتاتىن قونىس. بۇل - مالشىلىقپەن، قولونەر ىسىمەن بىرگە ەگىنشىلىكپەن، كەن ءوندىرۋ ىسىمەن شۇعىلدانعان ساقتاردىڭ ءبىر توبى. تابىلعان قۇمىرا سىنىقتارىنىڭ ءوزى مىڭنان اسادى. ونىمەن قاتار جەبە، پىشاق سەكىلدى وتكىر قۇرالداردى قايرايتىن قايراقتار تابىلدى. ەڭ قۇندى جادىگەر – ءداندى-داقىلداردى ۇنتاقتايتىن ديىرمەن. قازاقتىڭ ديىرمەنى دوڭگەلەك ءپىشىندى بولسا، بۇل تەكشە» دەيدى ز.ساماشەۆ.

ارحەولوگتىڭ ايتۋىنشا، بۇل ەسكەرتكىشتىڭ تابىلۋىنا وبلىس اكىمى دانيال احمەتوۆ سەبەپكەر بولىپتى. ول كىسى بىلتىر ارحەولوگقا «وسى جەردى قازىپ كورشى، استىندا بىردەڭە بار سەكىلدى» دەگەن ەكەن. «قازساق، ساقتاردىڭ قونىسى بولىپ شىقتى. عاجاپ!» دەپ تاڭدانادى زەينوللا ساماشەۆ.


شىعىس قازاقستان وبلىسى

ۇلان اۋدانى


سۋرەتتەر اسەم ءنۇسىپوۆانىڭ فەيسبۋكتەگى پاراقشاسىنان الىندى

سوڭعى جاڭالىقتار

ۇقساس جاڭالىقتار