ايماقتار • 09 ماۋسىم، 2019

تالعات تەمەنوۆ ورال تەاترىندا شىڭعىس ايتماتوۆتىڭ شىعارماسىن ساحنالادى

439 رەت كورسەتىلدى

حاديشا بوكەەۆا اتىنداعى باتىس قازاقستان وبلىستىق قازاق دراما تەاترىندا شىڭعىس ايتماتوۆتىڭ «شىنارىم مەنىڭ، شىرايلىم مەنىڭ» پوۆەسى بويىنشا «ارمانىم - اسەلىم» اتتى ليريكالىق دراماسىنىڭ پرەمەراسى ءوتتى. شىعارمانى ساحناعا لايىقتاپ، قويعان – قازاقستان رەسپۋبليكاسىنىڭ حالىق ءارتيسى، شىڭعىس ايتماتوۆ اتىنداعى حالىقارالىق سىيلىقتىڭ لاۋرەاتى تالعات تەمەنوۆ.

ەكى كۇن قاتارىنان قويىلعان پرەمەرادا تەاتردا ينە شانشار ورىن بولمادى. ورالدىق كورەرمەن ايگىلى قىرعىز جازۋشىسىنىڭ قالامىنان تۋعان شىعارمانى ىستىق ىقىلاسپەن قابىلدادى.

- كەشەلى بەرى ءبىزدىڭ وڭىرىمىزدە ەلەۋلى مادەني وقيعا – جاڭا قويىلىمنىڭ تۇساۋكەسەرى بولىپ جاتىر. شىنىندا دا حاديشا بوكەەۆا اتىنداعى قازاق دراما تەاترىنىڭ ءار پرەمەراسى – ءبىز ءۇشىن ۇلكەن جەتىستىك. ونىڭ ۇستىنە بارىمىزگە تانىمال تالعات تەمەنوۆ اعامىز نۇر-سۇلتان قالاسىنان ارنايى كەلىپ، ورالدىق تەاتر ۇجىمىمەن ءبىر ايدان بەرى قويان-قولتىق جۇمىس ىستەپ، وسىنداي تاماشا دۇنيەنى اق جايىق كورەرمەندەرىنە ۇسىنىپ وتىر. ءبىز بۇعان وتە قۋانىشتىمىز. تالعات اعامىزعا زور العىسىمىزدى بىلدىرەمىز. ءبىزدىڭ وڭىرگە كەلگەن ونەر ادامدارى ءجيى ايتىپ جۇرگەندەي، ورالدىڭ اۋديتورياسى بولەك، كورەرمەندەرى ەرەكشە. شىنايى ريزاشىلىقتان تۋعان ىقىلاسىمىزدى قابىل الىڭىز! – دەدى باتىس قازاقستان وبلىسىنىڭ اكىمى التاي كولگىنوۆ رەجيسسەر تالعات تەمەنوۆكە العىس حات پەن گۇل ۇسىنىپ تۇرىپ.

كوپشىلىك قوشەمەتىنە بولەنگەن تالعات تەمەنوۆ تە ساحنادا تۇرىپ تولقي سويلەدى:

- مەندە ترايباليزم جوق، بىراق جەتى اتا-بابام وسى وڭىردە، بوكەيلىكتە جاتىر. سوندىقتان، اقىن ايتقانداي، «مەيلىڭ باتىر، مەيلى عالىم، داناسىڭ، ءبارىبىر سەن تۋعان جەرگە بالاسىڭ!» دەگەن راس ەكەن. «ماحاببات بەكەتى» فيلمىندەگى باستى كەيىپكەردىڭ ەسىمى ورال بولۋى دا پەرزەنتتىك ىقىلاسىمنىڭ بەلگىسى بولاتىن. وسى كەزگە دەيىن الەمنىڭ 80 ەلىن ارالادىم، ونەر كورسەتتىم، بىراق اتاجۇرت ساحناسىندا تۇڭعىش رەت قويىلىم قويعانىم وسى ەكەن. سوعان ىڭعايسىزدانىپ تا تۇرمىن، - دەيدى رەجيسسەر.

ءبىر ساعاتتان ءسال اساتىن ۋاقىتقا عانا سوزىلعان سپەكتاكل بارىسىندا كورەرمەن ءبىر قۋانىپ، ءبىر جىلاپ، سان ءتۇرلى كۇيگە تۇسەدى. قازاقستان جازۋشىلار وداعىنىڭ مۇشەسى داريعا مۇشتانوۆا ايتقانداي، «ءومىردىڭ وزىندەي شيىرشىق اتىپ كوز الدىڭنان ءوتىپ جاتقان xيكايات تەبىرەنتپەي، كوزىڭە جاس الدىرماي قويمايدى. ءاپ- ادەمى باستالعان ءومىرىن ءوز ەركىمەن قور ەتىپ، مازداي جانىپ تۇرعان باقىت شىراعىن ءوزى ۇرلەپ ءوشىرىپ تاستاعان ادامنىڭ ەندى تۇزەتۋگە كەلمەس قاتەسىنە كۋا بولاسىز. وزىنە رياسىز سەنىپ، ەتەگىنەن ۇستاعان سۇيگەن جارىنا سەنىمدى سەرىك تە بولا الماي، تۋعان ۇلىنىڭ باسقا ادامدى اكە دەۋىنە دە ءوزى سەبەپكەر بولعان تالاي ءىلياستار بۇگىنگى قوعامدا دا جۇرگەنى راس قوي».

قويىلىمنىڭ باستى كەيىپكەرى ءىلياس ءرولىن – جاسقايرات ۆاليۋلليەۆ، اسەلدى – جاس ونەرپاز نۇرجيان حاسانوۆا سومدادى. سونداي-اق تەاتردىڭ تانىمال ارتىستەرى نارگيز شادىەۆا، مۇساعالي بەكتەنوۆ، گۇلجيان شىنتەمىر دە ءوز بەينەلەرىن نانىمدى الىپ شىقتى.

جاڭا قويىلىمدى تىك تۇرىپ كورىپ، ونى ساحنالاعان رەجيسسەر مەن سۋرەتشىگە، ارتيستەردى گۇلمەن كومكەرگەن كورەرمەن قاۋىم تاعى ءبىر قۋانىشتى جاڭالىققا كۋا بولدى. باتىس قازاقستان وبلىسىنىڭ اكىمى التاي كولگىنوۆ ورال قالاسىندا جاڭا مادەنيەت سارايى سالىناتىنىن، بارلىق شەشىمدەر قابىلدانىپ، بايقاۋ وتكەنىن حابارلادى. جاڭا مادەنيەت وشاعىنىڭ قۇرىلىسى ماۋسىم ايىندا باستالماق.


باتىس قازاقستان

سوڭعى جاڭالىقتار

اقش – الەم چەمپيونى

سپورت • بۇگىن، 07:59

ەل چەمپيوندارى انىقتالدى

تەننيس • بۇگىن، 07:57

الەم كۋبوگىندا توپ جاردى

سپورت • بۇگىن، 07:55

جىگىتتەر جاراپ تۇر

سپورت • بۇگىن، 07:52

جادىگەردە – الاش بەلگىسى

احمەت بايتۇرسىن ۇلى • بۇگىن، 07:45

بەس ءوندىرىس ورنى ىسكە قوسىلادى

ايماقتار • بۇگىن، 07:44

تۇلعاعا تاعزىم

رۋحانيات • بۇگىن، 07:41

الدىمىزداعى ۇلكەن مىندەتتەر

ساياسات • بۇگىن، 07:40

باستى قادام

پىكىر • بۇگىن، 07:39

جەتى جىل – جەتكىلىكتى ۋاقىت

پىكىر • بۇگىن، 07:37

العاشقى ۇمىتكەر

ساياسات • بۇگىن، 07:35

وڭىرگە ەرەكشە ءمان بەرىلەدى

پىكىر • بۇگىن، 07:33

وتاندى ءسۇيۋ – ەڭبەكتەن

پىكىر • بۇگىن، 07:32

جاستاردى دەمەيتىن باستاما

پىكىر • بۇگىن، 07:30

اقاڭنىڭ تويى – الاشتىڭ مەرەيى

احمەت بايتۇرسىن ۇلى • كەشە

«اق ءپىل» سيندرومى

قوعام • كەشە

امبەباپ وقۋ ورتالىعى

ءبىلىم • كەشە

بىلىمدىگە جول اشىق

ءبىلىم • كەشە

يت يەسىنە تارتادى

قازاقستان • كەشە

كوكشەدەگى جارمەڭكە

ايماقتار • كەشە

ءجۇز جىلعى قۇدىق

تانىم • كەشە

ۇقساس جاڭالىقتار