قوعام • 08 ماۋسىم، 2019

تۇركىستاندا 300 مەملەكەتتىك قىزمەتشى باسپانالى بولادى

900 رەت كورسەتىلدى

بيىل وبلىس ورتالىعى تۇركىستاندا 1836 وتباسى قونىس تويىن تويلايدى. ولاردىڭ 300-ءى مەملەكەتتىك سالانىڭ قىزمەتكەرى بولسا، 1200-ءى الەۋمەتتىك جاعىنان از قامتىلعان وتباسىلار.

مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى اليك شپەكباەۆ تۇركىستانعا ساپارى كەزىندە سالىنىپ جاتقان تۇرعىن ۇيلەردى ارالاپ كوردى. اگەنتتىك توراعاسى الدىمەن اكىمدىك جانىنان اشىلعان جوبالىق كەڭسە جۇمىسىمەن تانىستى. وسىدان ءۇش اي الدىن قۇرىلعان كەڭسە بەس باعىت بويىنشا جۇمىس ىستەيدى. مۇنداعى ماماندار وڭىردەگى جوبالاردى جەدەل جۇزەگە اسىرۋدىڭ تەتىكتەرىن قاراستىرادى. ول ءۇشىن كەڭسەدەگى سالا ماماندارى ءاربىر جوبانى دەر كەزىندە سارالاپ كەم-كەتىگى بولسا تولىقتىرادى. ودان كەيىن ءتيىستى ورىندارعا ۇسىنادى. ءوڭىردىڭ دامۋىنا ۇلەس قوسقىسى كەلگەن تۇرعىن ءوز جوباسىن كەڭسەگە ۇسىنا الادى. مامانداردىڭ مالىمەتىنە سۇيەنسەك، بۇگىنگە دەيىن كەڭسەگە 1364 جوبا كەلىپ تۇسكەن. ولاردىڭ باسىم بولىگى ينفراقۇرىلىم سالاسىن دامىتۋعا باعىتتالعان.

ازاماتتارعا ءبىر تەرەزە قاعيداسى بويىنشا قىزمەت كورسەتەتىن ميگراتسيالىق حالىققا قىزمەت كورسەتۋ ورتالىعى جۇمىسىمەن تانىسقان اگەنتتىك باسشىسى تۇرعىنداردىڭ تىركەلۋ بارىسىن باقىلادى. اتالمىش ورتالىق قالالىق حالىققا قىزمەت كورسەتۋ ورتالىعىنىڭ قاسىندا ورنالاسقان. ياعني تىركەلۋگە كەلگەن ازامات بىردەن ەكى مەكەمەگە دە سوعىپ تىرلىگىن تىندىرا الادى.

تۇركىستانعا جۇمىس ساپارى كەزىندە اگەنتتىك توراعاسى وبلىس اكىمىمەن بىرگە  تسيفرلاندىرۋ جۇيەسى ۇزدىك دەپ تانىلعان تۇركىستان قالالىق ورتالىق ەمحاناسىنداعى جاڭا تەحنولوگيالارمەن تانىستى. ەمحانادا تسيفرلاندىرۋعا بايلانىستى ينفوكيوسك، كۋاركود، ونلاين  حابارلاۋ، كولل- ورتالىق، تىكەلەي كميس-كە قوسىلعان تەرمينال، اۆتودوزۆون مەن پۋش ىسكە قوسىلعان. سونداي-اق،  ناۋقاستارعا سمس- حابارلاما جەتكىزۋ ءىسى قولعا الىنىپ، تىركەۋ ورنىندا از ۋاقىت ىشىندە كۇردەلى وزگەرىستەر مەن جاڭارتۋلار جاسالعان. ءوز كەزەگىندە اليك شپەكباەۆ ەمحانا قىزمەتىن نۇر-سۇلتان قالاسىنىڭ مەديتسينا مەكەمەلەرىندەگى زاماناۋي جابدىقتارمەن سالىستىرا وتىرىپ، جوعارى باعالادى. ەمحانانىڭ تىركەۋ ورنىندا "ادالدىق الاڭى" مەن الەۋمەتتىك قىزمەت كورسەتۋ ورىندارى جۇمىس ىستەۋدە. وندا دەنساۋلىق ساقتاۋ مينيسترلىگىنىڭ بۇيرىعىنا سايكەس، مۇمكىندىگى شەكتەۋلى  جاندارعا الەۋمەتتىك قولداۋ كورسەتىلىپ، ترياج جۇيەسى ارقىلى حالىققا قىزمەت ەتەدى.

 

سوڭعى جاڭالىقتار

تاعى 1650 قازاقستاندىق ىندەت جۇقتىردى

كوروناۆيرۋس • بۇگىن، 09:00

ۇقساس جاڭالىقتار