07 ماۋسىم، 2019

شقو-دا كوپبالالى وتباسىلاردىڭ وقۋعا تۇسۋىنە جەڭىلدىك جاسالادى

1091 رەت كورسەتىلدى

بيىل كوپبالالى وتباسىلاردىڭ ستۋدەنتتەرىنە 3 ميلليارد تەڭگە قاراستىرىلىپ وتىر.

ءتورت اي بۇرىن وسكەمەندە وتكەن «نۇر وتان» پارتياسى وبلىستىق فيليالىنىڭ ءححىى كونفەرەنتسياسىندا شىعىس قازاقستاندا كوپبالالى جانە مۇمكىندىگى شەكتەۋلى بالالاردىڭ اتا-انالارى بالاباقشاداعى تاماقتانۋ تولەمىنەن بوساتىلاتىنى، وڭىردەگى الەۋمەتتىك تۇرعىدان از قامتىلعان جانە كوپبالالى وتباسىلاردىڭ كوللەدجدە وقيتىن بالالارى تاماقپەن جانە شاكىرتاقىمەن تەگىن قامتىلاتىنى، سونىمەن قاتار ايماقتاعى از قامتىلعان جانە كوپبالالى وتباسىلاردىڭ مەكتەپ جاسىنداعى بالالارىنا فورما ساتىپ الۋعا 500 ميلليون تەڭگە كولەمىندە جاردەم كورسەتىلەتىنى جايىندا ايتىلعان ەدى.

قازىر وڭىردە كوپبالالى جانە از قامتىلعان وتباسىلاردان شىققان بالالارعا الەۋمەتتىك كومەك كورسەتۋ ماسەلەسى قارالۋدا. 5 ماۋسىمدا وسكەمەندە اتاۋلى الەۋمەتتىك كومەكتىڭ تاعايىندالۋى بويىنشا وتكەن جيىندا بايانداما جاساعان وبلىس اكىمىنىڭ ورىنباسارى اسەم ءنۇسىپوۆانىڭ كەلتىرگەن دەرەكتەرىنە سۇيەنسەك، بيىل ايماقتاعى كوپبالالى جانە از قامتىلعان وتباسىلاردىڭ 1087 وقۋشىسى (ونىڭ ىشىندە 898-ءى 9 سىنىپتى، 189-ى 11 سىنىپتى اياقتاماق) مەكتەپ بىتىرمەك. اعىمداعى جىلى تەگىن كاسىپتىك-تەحنيكالىق ءبىلىم بەرۋ ءۇشىن وبلىستىق بيۋدجەتتەن 6200، رەسپۋبليكالىق بيۋدجەتتەن جۇمىسپەن قامتۋ جانە جاپپاي كاسىپكەرلىك باعدارلاماسى بويىنشا 1730 ورىن ءبولىنىپتى. وسى ماقساتقا جەرگىلىكتى بيۋدجەتتەن جىلىنا 4،5 ميلليارد تەڭگە، ونىڭ ىشىندە بيىل كوپبالالى وتباسىلاردىڭ ستۋدەنتتەرىنە 3 ميلليارد تەڭگە قاراستىرىلىپ وتىر ەكەن. اۋداندىق جانە قالالىق ءبىلىم بولىمدەرى قازىرگى ۋاقىتتا كوپبالالى جانە از قامتىلعان وتباسىلاردىڭ بالالارىنىڭ وبلىس كوللەدجدەرىندە ءبىلىم الۋعا تىلەك بىلدىرۋشىلەرىن انىقتاۋ جۇمىستارىمەن شۇعىلدانىپ جاتقان كورىنەدى. «جاقىندا سەمەيدە بولعانىمدا ماعان ءبىر كوپبالالى وتباسى بالاسىنىڭ جەكە مەنشىك كوللەدجدە وقيتىنىن ايتتى. بۇل ماسەلەنى قالاي شەشۋگە بولادى؟» دەپ سۇرادى جيىندا ايماق باسشىسى ورىنباسارى اسەم ءنۇسىپوۆادان. وبلىس اكىمىنىڭ ورىنباسارى بۇل ماسەلەنى مەملەكەتتىك تاپسىرىس اياسىندا شەشۋگە بولاتىنىن تىلگە تيەك ەتتى. «وڭىردەگى قالا مەن اۋدان اكىمدەرى وبلىستىق ءبىلىم باسقارماسى مەن ءبىلىم بولىمدەرىمەن بىرلەسە بۇل ماسەلەنى تىكەلەي باقىلاۋىنا السىن. 1087 تۇلەكتىڭ ىشىندە وقۋعا تۇسكىسى كەلەتىندەردى انىقتاپ، ولارعا ءتيىستى جەڭىلدىكتەر جاسالۋى كەرەك. ءبىز ۋادە بەردىك، سوزىمىزدە تۇرۋىمىز كەرەك»، – دەدى وبلىس اكىمى.


وسكەمەن  

سوڭعى جاڭالىقتار

ۇقساس جاڭالىقتار